Guð er að bjóða góða nótt - í geislum sólarlagsins

 Var að koma af björgunarhundaæfingu á Geithálsi í kvöld. Það var yndislegt veður, skafheiður himinn og kvöldsólarljómi yfir Heiðmörk og Hellisheiði. Frábært útsýni.

Æfingin gekk vel - gaman að hitta Reykvísku félagana svona af og til þegar maður er staddur í Höfuðborginni.

En veðurdýrðin varð til þess - þar sem ég stóð efst á Geithálsinum og virti fyrir mér sólarlagið við sjóndeildarhringinn - að rifjaðist upp fyrir mér undurfögur vísa eftir Trausta Reykdal:

• Þýtur í stráum þeyrinn hljótt
• þagnar kliður dagsins.
• Guð er að bjóða góða nótt
• í geislum sólarlagsins.

Góða nótt gott fólk.

Athugasemdir

[Gísli Baldvinsson (IP-tala skráð) 12.6.2008 kl. 08:47]

Sungið af karlakórum með fallegu lagi Jóns Ásgeirssonar, að ég held. Annars er ég leiðréttur.

Höfundur:
Trausti Árnason Reykdal fiskmatsmaður Siglufirði. f.1888 - d.1964
Um höfund:
Fæddur á Mýlaugsstöðum í Reykjadal.