Nei, hættið nú!

 

 Þegar ég var lítil stelpa skrifaði ég oft í minningabækur hjá vinkonum mínum. Þá setti ég gjarnan inn vísur sem ég kunni, teiknaði fugla og blóm í kringum þær og ... kvittaði svo undir alltsaman. Sama gerðu skólafélagar mínir, stelpurnar teiknuðu fiðrildi, hjörtu og blóm, strákarnir fjöll, sólskin og báta - en allir settu inn vísur eða kviðlinga ásamt "ég man þig - þú manst mig" og einhverju fleiru. Gott ef ég á ekki eina svona dagbók í fórum mínum frá gamalli tíð - og ef mér skjöplast ekki þá eiga dætur mínar svona bækur.

Nú hafa fundist tvær vísur sem Halldór Laxness skrifaði 12 ára gamall í minningabók hjá vinkonu sinni. Og menn eru farnir að fabúlera um að "hér sé kominn elsti varðveitti kveðskapur Halldórs Laxness". Það tók örfáar sekúndur að finna aðra vísuna með gúggli - eins og Guðmundur Magnússon sannreyndi og bloggaði um fyrr í dag.  Hann fann vísuna á hinum frábæra vef Skjalasafns Skagafjarðar þar sem finna má fjölmargar lausavísur eftir ýmsa höfunda. Ekki er að orðlengja það, að önnur vísan er þar kennd Þorleifi Jónssyni á Hjallalandi í Vatnsdal. Hún er svona:

Haltu þinni beinu braut
berstu því með snilli
gæfan svo þér gefi í skaut
guðs og manna hylli.

Í ljósi þessa er heldur ólíklegt að 12 ára gamall drengur hafi ort hina vísuna, svo spök sem hún er - jafnvel þó við séum að tala um Nóbelskáldið. En sú vísa er svona:

Vart hins rétta verður gáð
villir mannlegt sinni,
fái æsing æðstu ráð
yfir skynseminni.

Ég held hann hafi bara verið að skrifa vísu í dagbók - eins og þúsundir Íslendinga hafa gert á unga aldri, og gera enn.

 

Elsti varðveitti kveðskapur Halldórs Laxness í póesíbók á Vegamótastíg

Athugasemdir

[Haukur Nikulásson, 20.9.2008 kl. 22:09]

Einatt hafður að háði og spé

og halur margra fýsna

Hvað haldið þið að Halldór sé

höfundur margra vísna?

[Kristján Sigurður Kristjánsson, 20.9.2008 kl. 23:03]

Það gerðist að Hrafnabjörgum í Arnarfirði á þarasíðustu öld að kálfur hljóp fram af hömrunum þegar honum var hleypt út um vorið. Maður frá Lokinhömrum segir við bónda: "Það var ljóti skaðinn að kláfurinn skyldi hlaupa framaf".

Bóndi svarar: "Það er ekki skaðinn,............. en skömmin".

[Flosi Kristjánsson, 20.9.2008 kl. 23:19]

Góður punktur, Ólína! Í minningabókum fortíðar voru skrifaðar margar ágætar vísur, án þess greint væri frá höfundi. Mér er í minni það sem Hrefna Sigvaldadóttir, kennari minn í 6 ár í Breiðagerðisskóla, skrifaði í mína bók Anno 1959 eða 1960:

Trúðu á tvennt í heimi,
tign sem æðsta ber
Guð í alheims geimi
guð í sjálfum þér.

Ég veit ekki hvort Hrefna setti þetta saman

[Smyrill (IP-tala skráð) 20.9.2008 kl. 23:45]

Trúðu á tvennt í heimi... o.s.frv., ... er eftir Steingrím Thorsteinsson.

[Salvör Kristjana Gissurardóttir, 21.9.2008 kl. 00:11]

Já, datt líka í hug þetta með minningabækurnar. Sniðugt:-)

[Árni Gunnarsson, 21.9.2008 kl. 00:57]

Ég er svolítið sár við Halldór Guðmundsson, að hann -af öllum skyldi hlaupa svona klaufalega á sig. Seinni vísan er greinileg ein af mörgum heilræðavísum sem gengu milli fólksins í sveitum landsins á fyrri öldum og voru kenndar börnum. Vísnavefurinn á Héraðsskjalasafninu er alveg einstakur sjóður. En það er um hann eins og öll mannanna verk að þar eru innan um einhverjar villur, bæði innsláttarvillur og brenglað rím. Það er þó afar sjaldgæft enda er þessi vefur unninn af mjög færu fólki með rímformið innbyggt í sálina.    

[Þorsteinn Briem, 21.9.2008 kl. 11:15]

Jamm, nú er Guðmundur Magnússon sagnfræðingur búinn að eyðileggja þessa fallegu sögu um póesíbókina á Vegamótastígnum með einhverju gúggli! Það á aldrei að eyðileggja góða sögu með sannleikanum og allra síst með gúggli.

Hversu lágt geta menn lagst og hvað næst?! Jólaguðspjallið?!

"Er jólaguðspjallið bara falleg saga? Þegar við lesum jólaguðspjallið í 2. kafla Lúkasarguðspjalls, hefst það á orðunum "En það bar til um þessar mundir". Við þekkjum svo framhaldið hvernig Lúkas greinir frá fæðingu Frelsara heimsins og segir frá því sem þá bar við."

[Bjarni Baukur, 21.9.2008 kl. 15:59]

Sæl Ólina. Geturðu sett hér á vefinn Abba-textann sem þu snaraðir á íslensku ?

kv BjB

[Ólína Kjerúlf Þorvarðardóttir, 21.9.2008 kl. 17:23]

Takk fyrir skemmtilegar athugasemdir í bundnu og óbundnu máli.

Bjarni Baukur, textinn við Abba-lagið er kominn inn á bloggsíðuna mína í þessari færslu sem er sú fjórða á undan færslunni um Nóbelsskáldið. 

[Haraldur Arngrímsson (IP-tala skráð) 21.9.2008 kl. 20:33]

Flott innlegg hjá þér Ólína !

Já - hver man ekki eftir minningarbókunum sem nánast tröllriðu skólakerfinu hér áður.  Ég var nú svo ergilegur - ca. 13-14 ára - eftir allt eineltið sem ég hafði þurft að þola frá skólafélögum  - að skrifaði í eina (og auðvitað urðu þær ekki mikið fleiri minningarbækurnar sem mér hlotnaðist sá heiður að fá að skrifa í...) :

Ég er kominn á það stig,

í öllum mínum hugs(x)unum.

Gerið það fröken fyrir mig,

farið þér úr buxunum.

Hef ekki hugmynd um hver samdi - en ég hafði lært vísuna af móður minni - fyndin kona það...

Eftir þetta rita ég sögnina að hugsa - með x-i

[Jóna Á. Gísladóttir, 22.9.2008 kl. 00:18]

Úbbs.. hehe