Logandi harðsperrur - fimmtugsafmæli og fleira

Nú sit ég með logandi harðsperrur og strengi eftir að hafa gengið á Esjuna ásamt vinafólki á sunnudaginn í yndislegu veðri og frábæru útsýni. Jamm, það var lokahnykkurinn á frábærri borgardvöl í "sumarbústaðnum" okkar á Framnesvegi.

Já, þannig er það nú með okkur hjónin, að líf okkar skiptist í meginatriðum á milli tveggja heima, má segja: Vestfjarða og Reykjavíkur. Okkar sumarhús er ekki inni í skóglendi einhversstaðar utan þéttbýlis, heldur stendur það á horni Holtsgötu og Framnesvegar, innan um önnur hús  í Vesturbæ Reykjavíkur.

Í þetta gamla hlýlega hús, sem við höfum átt í 19 ár, sækjum við einatt hvíld og upplyftingu með þeim vinum og ættingjum sem tilheyra hinum Reykvíska hluta lífs okkar - auk þess sem það er aðsetur okkar í vinnuferðum og erindum ýmiskonar.

Tilefnið að þessu sinni var fimmtugsafmæli eiginmannsins, þann 13. júní síðastliðinn. Hann vildi lítið láta fyrir sér fara á  afmælisdaginn og var því "að heiman" (þ.e. ekki á Ísafirði) en þó "heima við" (á Framnesveginum). Þetta var rólegur en skemmtilegur afmælisdagur, því vinir og kunningjar litu við í tilefni dagsins og þáðu léttu léttar veitingar. Ekkert formlegt, bara afslappað rennerí og innlit fram eftir kvöldi.

Sjálf afmælisveislan verður svo haldin síðar - því ég stefni að því að ná honum í haust.  Þá langar okkur að halda sameiginlega afmælisveislu með tilheyrandi húllumhæi hérna fyrir vestan.

Í augnablikinu er ég sumsé gift "eldri" manni sem kominn er á sextugsaldur. ÉG ætla að njóta þess næstu tvo og hálfan mánuðinn að vera bara rétt rúmlega fertug - þ.e. "unga konan" í sambandinu.

 Hér sjáið þið afmælisbarnið með frumburði sínum, henni Sögu, dóttur okkar. Nú er aldursmunur þeirra tveggja (24 ár) orðinn minni en aldur hennar (26 ár). Já, svona líður lífið.

 

 

Athugasemdir

[Gústi (IP-tala skráð) 16.6.2008 kl. 13:07]

Til hamingju með afmælið kæri Sigurður og þú Ólína með bóndann á sextugsaldrinum.

[Jenný Anna Baldursdóttir, 16.6.2008 kl. 14:57]

Til hamingju bæði.

[Edda Agnarsdóttir, 16.6.2008 kl. 15:08]

Glæsileg mynd af föður og dóttur! Hún er greinilega saga ykkar beggja í útliti og heppin er hún að eiga þetta fallega nafn!

Til hamingju með kallinn Ólína mín og vonandi hef ég tækifæri á að óska þér líka til hamingju þegar kemur að þínu afmæli!

[Ía Jóhannsdóttir, 16.6.2008 kl. 19:49]

Til hamingju með þinn elskulega Ólína mín

[Sigrún Jónsdóttir, 16.6.2008 kl. 20:22]

Til hamingju með bónda og Esjugöngu Ólína mín

[Ólína Kjerúlf Þorvarðardóttir, 16.6.2008 kl. 23:22]

Þakka ykkur öllum fyrir góðar kveðjur

[Ragnheiður , 16.6.2008 kl. 23:41]

Til hamingju með bóndann og ég verð að segja það, dóttirin með þennan geysifallega háralit móður sinnar og auðvitað falleg sjálf eins og kyn og ættir segja.

[Ólína Kjerúlf Þorvarðardóttir, 17.6.2008 kl. 23:13]

[Lína Björg (IP-tala skráð) 18.6.2008 kl. 14:43]

Innilega til hamingju með bóndann Ólína.