Úr handboltanum í Hátíðarkórinn - nei, annars: Sunnukórinn!

Þannig fór nú það 24:19. Annars var fyrri hálfleikurinn í þessum leik Íslendinga og Svía svo æsispennandi að ég þurfti að beita ofumannlegu afli til þess að hafa mig upp úr sófanum og snúa mér að öðru.   Ég þurfti að mæta á kóræfinu. Ó, já. Kóræfingu. Staðan 11:9 fyrir Svía, og ég gekk bara út úr húsinu.

Eftir á að hyggja er ég heilshugar fegin að ég tók kóræfinguna fram yfir seinni hálfleikinn.

Blessuð kóræfingin - ég var svo utan við mig vegna leiksins sem ég væri að missa af, að ég tók ranga kórmöppu og mætti, handviss um að ég væri komin á æfingu með Hátíðarkórnum. Fyrstu mínúturnar vissi ég semsagt ekkert með hvaða kór ég var að æfa. Þetta var nefnilega Sunnukórsæfing.  Þar sem ég átti auðvitað að vera - þó ég væri ekki alveg með á nótunum.   Ég sá ekkert athugavert þegar ég mætti í sal Tónlistarskólans, þar var sama fólkið og venjulega, enda báðir kórarni skipaðir sama mannskapnum að mestu leyti. Ég tók mér sæti og fór að blaða í Gloríunni eftir Poulenc. Þegar fólkið fór að syngja dillandi swing eftir Baldur Geirmunds áttaði ég mig loksins.

Já það er svo mikið að gera í kóralífinu á Ísafirði þessa dagana að maður er orðinn alveg ruglaður. Og nú er ég komin í þrjá kóra

Ég er í Hátíðarkór Tónlistarskólans sem er tímabundinn kór, settur saman í tilefni af sextugsafmæli skólans og heimsókn Sinfóníuhljómsveitar Íslands sem við eigum að syngja með á tónleikum þann 24. janúar. Mjög spennandi (það er altso ÞAR sem ég á að syngja Gloríuna eftir Poulenc ).

Ég er auðvitað líka í Sunnukórnum. Hann heldur sitt árlega Sunnukórsball (árshátíð sína) um sólrisuna, að þessu sinni þann 26. janúar. Og auðvitað þarf að æfa stíft fyrir það.  Karlakórinn Ernir ætlar að halda árshátíðina með okkur að þessu sinni og syngja með okkur við borðhaldið. Baldur Geirmunds er búinn að semja undurfallegt lag sem ég var beðin að gera texta við - og það verður frumflutt á árshátíðinni. Lag og texti falla vel að hvert öðru, svona eins og kærustupar, enda er textinn rómantískur. Ég spái því að þetta verði vinsælt kórlag.

Þriðji kórinn minn er svo kvennakórinn Vestfirsku Valkyrjunnar sem var stofnaður í fyrra. Hann samanstendur af skemmtilegum og framtakssömum konum. Þessi kór er fullkomlega vanræktur af minni hálfu þessa dagana, og verður það a.m.k. framyfir sólrisu.

En það má með sanni segja að ég dansi á vængjum söngsins þessa dagana   hvað sem líður gengi íslenska handboltalandsliðsins. Þeim verður bara að ganga betur næst.

 

Svíar sigruðu

Athugasemdir

[Marta B Helgadóttir, 17.1.2008 kl. 23:16]

Var fegnust þegar leikurinn var búinn, skelfilegur leikur

[Ásdís Sigurðardóttir, 17.1.2008 kl. 23:17]

Þú ert nú meiri söngfuglinn       

[Ólína Kjerúlf Þorvarðardóttir, 17.1.2008 kl. 23:19]

[Mosinn (IP-tala skráð) 17.1.2008 kl. 23:54]

Gott hjá þér að sjá þessa hörmung ekki.

Nú sakna ég Sigga Sveins og Valdimars Grímssonar, þeir hefðu þorað að taka af skarið!

Enda var sænski markmaðurinn af þeirra kynstofni!

Ævar

[Ragnhildur Sverrisdóttir, 18.1.2008 kl. 09:01]

Mikið vildi ég að ég hefði staðið upp frá sjónvarpinu í hálfleik! Þetta var nú meiri hörmungin

[Kristín Björg Þorsteinsdóttir, 18.1.2008 kl. 12:24]

Ég ætla nú rétt að vona að leikurinn á morgun verði betri! Annars eru ekki góðar fréttir af Ólafi Stefánssyni

En kórlífið er dásamlegt! Ég læt mér duga Dómkórinn (er þetta ekki góð vísubyrjun) en hér á árum áður þá vildi maður helst æfa alla daga vikunnar. Man þegar ég æfði með kórnum í MH þrisvar í viku og svo var ég í Fílharmoníunni tvisvar í viku. Og fór um allt í strætó og þótti ekki mikið....

[Margrét Össurardóttir (IP-tala skráð) 18.1.2008 kl. 17:46]

Syngur þú ekki í baði eða sturtu? Það geri ég og læt það duga

[Ólína Kjerúlf Þorvarðardóttir, 18.1.2008 kl. 18:52]

Jú, líka

[Edda Agnarsdóttir, 20.1.2008 kl. 02:03]

Þetta fór vel í kvöld Ólína! Heyja Ísland.