Friggjarspuni í skýjum

  Sólin er horfin úr firðinum - við sjáum hana ekki aftur fyrr en 25. janúar. En í dag hefur gyðjan Frigg spunnið gullþræði sína í nóvemberhimininn. Sólgyllt ský svífa yfir fjöllum og ljómi þeirra speglast í lognkyrrum haffletinum. Þetta er fallegur dagur - verst hvað myndavélin mín er lúin. Ég veit ekki hvort hún nær að fanga þessa sjón - skelli samt inn mynd sem ég tók áðan út um stofugluggann minn. Tek þó fram að litirnir eru mun skærari og bjartari en þessi mynd ber með sér.

Í dag er mikið um að vera. Menningardagskrá um Vestfirsku skáldin í Holti í Önundarfirði hefst kl. 16:00. Við í Vestfjarðaakademíunni höfum verið að undirbúa þessa dagskrá í samstarfi við afmælisnefnd Guðmundar Inga Kristjánssonar. Ég verð með yfirlitserindi um vestfirsku skáldin, en auk þess verða flutt erindi um Guðmund Inga Kristjánsson, Jón úr Vör, Jakobínu Sigurðardóttur og Steingerði Guðmundsdóttur. Sungin verða vestfirsk lög, kveðnar þulur og vísur og Grasa-Gudda úr Skugga-Sveini mun mæta til leiks, kaffiveitingar o.fl.

Já þetta er fallegur dagur til þess að mæra menningararfinn - svo sannarlega. Guð láti gott á vita.

Athugasemdir

[Sigurður Þór Guðjónsson, 18.11.2007 kl. 13:22]

Úr því sólin sést ekki í tvo mánuði á veturna hlýtur hún líka að koma seint upp yfir fjöllin og ganga fljótt í hann aftur á sumrin. Það er gallinn við firði með há fjöll. En sólinn ætti samt að geta lýst upp himininn fallega  þó hún sjáist ekki sjálf.

[Ásdís Sigurðardóttir, 18.11.2007 kl. 22:58]

Er þetta ekki svolítið skrítið?? engin sól ??

[Sigríður Jósefsdóttir, 18.11.2007 kl. 23:25]

Sá hana nú samt gægjast upp yfir Engidalnum úr götuhallanum um tvöleytið í dag.  Það er ekki sama hvar í firðinum þú ert stödd.  Hamingjuóskir með frammistöðuna á föstudagskvöldið, þið voruð okkur öllum til sóma.  Kveðjur,

[Gísli Bergsveinn Ívarsson, 19.11.2007 kl. 00:23]

Ef maður hefur enga sól þá verður maður að vera með sól í hjarta