Hringjum og syngjum!

 Ég var að hlusta á þáttinn hans Óla Þórðar á Rás-1, í morgun. Hann var að spila uppáhaldslagið mitt "Er völlur grær" með Óðni Valdimarssyni, og segja frá því að tvær konur - önnur á Ísafirði, hin í Reykjavík - hefðu það fágæta sið að hringja hvor í aðra þegar lag þetta heyrist í útvarpinu  og syngja það saman í símann. Um leið lagði hann til að "sú í Reykjavík" myndi nú hringja vinkonu sína vestur.

Ég kipptist við þegar ég heyrði þetta. Fyrstu tónar lagsins bárust frá útvarpstækinu - og viti menn, síminn hringdi! Magga vinkona hinumegin á línunni: "... og vetur dvín, og vermir sólin gruuuund - la, la, la, la"

Ég tók undir: "Við byggjum saman bæ í sveit, sem blasir móti sóóóól  ..... la la la la .... landið mitt mun ljá og veita skjóóóól".

Þannig kyrjuðum við báðar - eins og alltaf þegar lagið heyrist í útvarpinu. Sú sem fyrr heyrir það tekur upp tólið, og við brestum saman í sönginn: "Sól slær silfri á voga - sjáðu jökullinn loga ...."

Ýmsir hafa rekið upp stór augu þegar við hlaupum í símann. Sama hvernig á stendur í vinnunni eða á heimilinu. Við hringjum og SYNGJUM! Gleymum stund og stað og látum okkur engu skipta hverjir eru í kringum okkur á því augnabliki.

Þið megið kalla okkur skrýtnar. Okkur er sama. Við erum vaxnar upp úr spéhræðslunni - við erum vinkonur - og þetta er okkar stund, okkar leið til að treysta vináttuböndin, hvar svo sem við erum staddar þegar við erum minntar hvor á aðra. Þannig ræktum við okkar vináttuvöll. 

Hvernig væri að taka upp dag vináttunnar á Íslandi, undir slagorðinu: Hringjum og syngjum! Þetta er pottþétt mannræktarúrræði - myndi redda deginum hjá mörgum.

 Takk fyrir að hringja í morgun Magga mín Takk Óli fyrir að spila lagið okkar.

 

Athugasemdir

[Halldór Egill Guðnason, 31.7.2007 kl. 14:54]

Flott hjá ykkur. Var á báðum áttum, með að trúa Óla, en þú hefur staðfest frásögn hans. Lýst vel á "Hringjum og Syngjum" átak. Vera bara með á hreinu hver á að hringja, annars verður ansi víða á tali og lagið kannski búið, þegar samband loks næst.

[Ólína Kjerúlf Þorvarðardóttir, 31.7.2007 kl. 17:16]

Einmitt   mæltu manna heilastu r

[Þóra Sigurðardóttir, 31.7.2007 kl. 18:25]

Frábær vináttusaga og svei mér ef ég hef ekki heyrt og séð hana Möggu frænku mína, vinnufélag og vinkonu Einarsdóttur taka upp tólið og syngja   Getur það verið  

[Ólína Kjerúlf Þorvarðardóttir, 31.7.2007 kl. 22:55]

Ó, já - sú er konan