Maísólin okkar skein í dag

 1. maí gangan á Ísafirði í dag var sú fjölmennasta frá því ég flutti hingað vestur. Það var frábært að sjá hversu margir fylktu sér á bak við fána verkalýðsfélaganna við undirleik Lúðrasveitar Vestfjarða sem leiddi gönguna. Dagskráin var létt og skemmtileg og ræður góðar.

Ástæðan fyrir hinni miklu þátttöku er vafalaust efnahags- og atvinnuástandið í landinu. Það er líka vert að vekja á því athygli - eins og einn ræðumanna dagsins benti á - að baráttusöngur verkalýðsins sem ortur var á frönsku árið 1870 á við enn þann dag í dag. Kannski hefur hann aldrei verið betur viðeigandi en einmitt nú - sérstaklega niðurlag fyrsta erindis, sem ég letra hér með rauðu í tilefni dagsins (þýð. Sveinbjörn Egilsson).

Fram þjáðir menn í þúsund löndum
sem þekkið skortsins glímutök
nú bárur frelsis brotna á ströndum
boða kúgun ragnarök.
Fúnar stoðir burt vér brjótum!
Bræður, fylkjum liði í dag.
Vér bárum fjötra en brátt vér hljótum
að byggja réttlátt þjóðfélag.

:/  Þó að framtíð sé falin
grípum geirinn í hönd
því Internasjónalinn
mun tengja strönd við strönd./:

Annars var þetta frábær dagur. Við,  félagar Björgunarhundasveitinni, notuðum góða veðrið til þess að taka æfingu með hundana nú síðdegis. Við fórum inn í Álftafjörð þar sem sólin skein á lognværan og sindrandi sjóinn. Það var maísólin okkar. 

Við heyrðum í fugli og fundum lykt af rekju og vaknandi gróðri í vorblíðunni. Hundarnir réðu sér ekki af kæti og vinnugleði. Yndislegt.

 

Athugasemdir

[Hólmfríður Pétursdóttir, 2.5.2009 kl. 01:17]

Það er mikilvægt verkefni sem bíður ykkar sem voruð kosin á Þing, að skapa skilyrði til að byggja réttlátt þjóðfélag.

Ég treysti því að þú gerir þitt besta. 

Einhvern vegin held ég að þú komir til með að sakana margs að vestan.

[Ásdís Sigurðardóttir, 2.5.2009 kl. 14:47]

Til hamingju með þingsætið. Mun fylgjast með þér mín kæra.

kveðja frá Selfossi

[Valan, 2.5.2009 kl. 17:16]

Innilegustu hamingjuóskir með kosninguna Ólína - hlakka til að sjá þig láta til þín taka á þinginu og þá sérstaklega að koma á stjórnlagaþingi svo hægt sé að færa lýðveldið aftur til gömlu gildanna með sterkri, endurnýjaðri stjórnarskrá.

Kær kveðja frá Manhattan,