Lúsaleit á bloggsíðunni - hvað skyldu þeir finna?

Nú er augljóslega verið að lúsleita bloggsíðuna mína. Venjulega eru flettingarnar helmingi fleiri en innlitin. Þessa dagana eru þær hins vegar tugfalt fleiri. Einn morguninn um níuleytið voru komnar 1500 flettingar þó að innlitin væru innan við 20 - það gera 75 flettingar á hvert innlit.

Menn hafa auðvitað gott af því að lesa vel það sem ég hef skrifað undanfarin tvö ár. Trúað gæti ég að þeir yrðu bara betri á eftir.

Annars er ég kúguppgefin. Búin að þeytast um allt Snæfellsnesið síðan á miðvikudag. Í dag lá leiðin suður á Akranes þar sem haldið var kjördæmisþing og endanlegur framboðslisti samþykktur með lófataki.  Þessi líka flotti listi (sjáið hér).  Ef marka má síðustu Capacent könnun erum við með þrjá þingmenn í kjördæminu.  

Á morgun  vonast ég til að geta hvílt mig. En á mánudag er stefnan tekin norður í land þar sem ég ætla að kíkja inn í fyrirtæki og hitta fólk, eins og á Snæfellsnesinu.

Þó ég sé lúin í augnablikinu hlakka ég til.

Athugasemdir

[Ragnheiður , 21.3.2009 kl. 21:41]

Vonandi finnst ekki lús ! Það þætti mér verra.

[Finnur Bárðarson, 21.3.2009 kl. 21:43]

Lúin og hlakka til ? Þú ert nú meiri orkuboltinn. Ég fer samstundis í horisontalis

[Gústaf Níelsson, 21.3.2009 kl. 22:37]

Iss, hafðu engar áhyggjur af lúsaleitinni, ég lendi oft í þessu.

[Júlíus Valsson, 21.3.2009 kl. 22:46]

"They out there"?

[TARA, 21.3.2009 kl. 23:37]

Hvað áttu við með þessari lúsarleit ? Er mbl að ritskoða skrif þín ?

[Snæbjörn Björnsson Birnir, 22.3.2009 kl. 01:46]

Það er magnað með íslenska pólitík. Þetta eru hrein trúarbrögð og þá er hægt að búast við hverju sem er af landanum. Sorglegt en þó satt.

Ég styð ekki SF, en styð "heiðarlega" pólitík og held að þú sést ein af þeim fáu, svo vonandi að þú náir kosningu á þing, svo við í VG getum haft gott samstarf við þig næstu 4 árin...!!!

[Ómar Bjarki Kristjánsson, 22.3.2009 kl. 10:15]

Skýringin gæti etv. verið að "pólitískir andstæðingar" væru að renna í gegn um það sem skrifað hefur verið í þeim tilgangi að hugsanlega finna eitthvað sem hægt væri að nota gegn viðkomandi í kosningabaráttu.

Eg hef reyndar stundum hugsað útí þetta.  Þ.e að þegar einhver er með skrif á netinu undir fullu nafni - þá er auðvitað á löngum tíma sagt eitt og annað í hita leiksins sem kannski gæti komið sér illa seinna meir við hin eða þessi tækifæri.

Þetta er þó auðvitað mjög persónubundið.  Td. engar líku að slíkt eigi við Ólínu enda þaulvanur skrifari.

[Kristín Ara, 22.3.2009 kl. 10:35]

Ólína þarftu að vera með svona mikla þráhyggju! það er bara gaman að lesa þetta hjá þér þó ég sé pólutískur andstæðingur þinn.

[Ólína Kjerúlf Þorvarðardóttir, 22.3.2009 kl. 11:33]

Engin þráhyggja hér, Kristín - bara eftirtekt á því sem er að gerast á síðunni. Ég hafði svolítið gaman af þessu og tek það þess vegna upp. Það sakar ekki að hafa pínulítinn húmor fyrir því sem gerist í kringum mann.

[Finnur Bárðarson, 22.3.2009 kl. 15:30]

Af hverju leitar enginn að neinu hjá mér ? Bara smá spældur.