Menntun er meðalið!

 Þegar atvinnuleysi og atgerfisflótti eru raunveruleg vá fyrir dyrum í litlu samfélagi er aðeins eitt að gera: Láta þekkinguna flæða. Mennta fólkið! Gefa því kost á endurmenntun, framhaldsmenntun, háskólamenntun, nýrri menntun ... já, bara menntun, hvaða nafni sem hún nefnist.

Menntun og þekkingarflæði eru eini raunhæfi kosturinn sem þjóðin á til að rækta mannauð sinn, halda honum við, halda fólkinu "í formi" ef svo má að orði komast. Maður sem verður atvinnulaus getur nýtt þau tímamót til þess að byggja upp nýja hluti í lífi sínu. Til dæmis að klára doktorsritgerðina sem hefur árum saman legið í skúffunni; taka vélastjórnarréttindin sem aldrei voru tekin; meiraprófið; ljósmóðurnámið; frumgreinanámið; skipstjórnarréttindin sem hann/hún hefur lengi látið sig dreyma um ... o. s. frv.

Það er ekkert meðal betra á þeim tímum sem við lifum en menntun.

Á málþingi sem Byggðastofnun hélt um nýja byggðaáætlun s.l. föstudag flutti ég erindi um gildi menntunar fyrir landsbyggðina.  Þetta var svona eldmessa sem ég nefndi "Háskóla í hvert hérað!"  og þið getið lesið í heild sinni HÉR ef ykkur langar (glærurnar eru hér).

Í stuttu máli sagt þá lagði ég út af þeim sjálfsögðu réttindum ungs fólks að geta sótt grunn- og framhaldsskóla í heimahéraði. Þetta þykir öllum eðlilegt nú, þó það hafi ekki alltaf þótt.  En hvenær mun þykja jafn sjálfsagt fyrir ungt fólk að sækja háskólanám á heimaslóðum - þó ekki væri nema grunnháskólanám?

Hugsið um það.

Þetta er dulítil undantekning frá annars góðu bloggfríi sem nú hefur staðið í heila fimm daga. Lifið heil, kæru lesendur mínir.

Athugasemdir

[Ásdís Sigurðardóttir, 4.12.2008 kl. 08:10]

Hafðu það gott í fríinu.  Kveðja frá Selfossi

[Hólmfrídur Ásta Pálsdóttir (IP-tala skráð) 4.12.2008 kl. 16:01]

Sæl Ólína. Ég les stundum bloggid thitt thegar ég hef séd thad út frá mbl.is og finnst thad alltaf skemmtilegt og fródlegt :)

Ég er alveg sammála thér ad menntunin er mikilvæg og sjálf var ég í framhaldsskóla á Selfossi á sínum tíma, í minni heimabyggd. Ég hef sjálf spád í thessu og mín skodun er sú ad háskólanám ætti ekki ad vera of dreift, bædi peningalega séd og einnig út frá gædum kennslunnar. Sjálf er ég í læknanámi í Danmørku thar sem hægt er ad læra thad á 3 stødum í landinu og verid er ad ræda um ad setja læknadeild á fót á fjórda stadnum, en sumum finnst thad ekki hægt thar sem umdæmid thjónar ,,einungis,, 500 thúsund manns (á thessum stad hefur thó alltaf verid verklegt nám og kennsla í kringum thad en nú er verid ad tala um ad taka upp alla kennslu og próf líka). En thad er reyndar kannski ødruvísi med læknanám en mørg ønnur háskólanám thar sem vid thurfum ad sjá sjúklinga :) Ég veit vel ad Háskólinn á Akureyri er ad gera góda hluti, nokkrir af mínum vinum hafa lært thar og módursystir mín er deildarforseti einnar deildar háskólans. En er gód hugmynd ad koma af stad háskólamenntun í ødrum hérudum á Íslandi ? Erum vid ekki of fá ? :)

Kvedja frá DK

[Hallgrímur Óskarsson (IP-tala skráð) 4.12.2008 kl. 22:06]

Já mikil gæfa yrði það ef menntunin myndi dreifast á áður óþekktum hraða um sveitir landsins.  Út úr slíku kæmi galdur.

Annars eru það næsta töfrum líkast að sjá og heyra Jón og Gunnu útí bæ - stóran hluta af þjóðinni - uppgvöta á umliðnum vikum hvað margir möguleikar eru fyrir hendi þrátt fyrir allt í þessu landi.  Þegar öllu er á botnin hvolft þá er margt að finna ef vel er leitað og auðveldara en við áður hugðum að minnka þá drepsótt er nefnd hefur verið viðskiptahalli.

 Hér er mör og hér er mysa
 hér er maðkur upp'á stöng
 hér er meiriháttar náttúra
 ef nepjan verður löng.

- - - -

Hafðu svo hléið ekki allt of langt