Rétt skal vera rétt ... og burt með spillingarliðið!

 Sagan um að Sigurjón Árnason fv. Landsbankastjóri hafi verið að stöfum í bankanum þar til í þessari viku mun ekki eiga við rök að styðjast. Mér er ljúft og skylt að koma þessu áleiðis hér, þar sem í færslunni hér á undan er vísað til fregna um að Sigurjón Árnason og Halldór J. Kristjánsson hefðu báðir haldið áfram að starfa í bankanum þar til nýlega. Nú hefur þetta verið borið til baka af Viðskiptaráðuneytinu, eins og fram kemur á eyjunni.

Rót þessara "fregna" er m.a. tölvupóstur sem gekk á netinu fyrir helgi um að Sigurjón væri enn allt í öllu í Landsbankanum, hann legði bílnum í sitt gamla bankastjórastæði og hefði sérinnréttaða skrifstofu á efri hæð Reykjavíkurapóteks. "Fréttin" varð höfð eftir starfsmanni í bankanum sem "blöskraði" þetta ástand og "gat ekki orða bundist". Orðalag og yfirbragð var mjög trúverðugt, en málið var fyrst tekið upp í Orðinu á götunni og flaug þaðan eins og eldur um sinu.

Þá vitum við það .... en það er afleitt þegar óstaðfestar sögusagnir fá byr undir báða vængi í ástandi sem þessu þar sem tilfinningaútrásin er tekin við af bankaútrásinni.

Það breytir ekki hinu, að fjöldi starfsmanna og millistjórnenda gömlu bankanna er enn að störfum í nýju bönkunum og gegna þar margir hverjir lykilhlutverki.

Og enn og aftur árétta ég það sem ég hef áður sagt, að það þarf að gera þetta mál upp, hreinsa spillinguna út úr bönkunum og stjórnkerfinu.

Burt með spillingarliðið, hvar í flokki sem það stendur!

Athugasemdir

[Jenný Anna Baldursdóttir, 8.11.2008 kl. 22:53]

Þetta er haft eftir manni í bankanum.  En auðvitað geta svona sögur verið ósannar, enda var ég brjáluð þegar ég las þetta.

Eins og það sé ekki nóg samt.

Kveðjur

[Jakobína Ingunn Ólafsdóttir, 8.11.2008 kl. 22:55]

Björgvin Sigurðsson fullyrti í fréttum í gær að engum gögnum hefði verið eytt í bönkunum. Kannski hafa Sigurjón og Halldór verið að gá að þessu fyrir Björgvin og allir haldið að þeir væru mættir í vinnuna

[J. Trausti Magnússon, 8.11.2008 kl. 23:03]

Þetta er nokkuð merkileg yfirlýsing frá Björgvin G. Heldur hann að ef að einhverjum gögnum sé eytt í bönkunum að þá sé hringt í hann og hann látinn vita. Ætli að það sé ekki frekar þannig að ef einhverjum gögnum er eytt að þá sé það gert þannig að sem fæstir eða öllu heldur enginn annar en gerandinn verði var við það.

[Jakobína Ingunn Ólafsdóttir, 8.11.2008 kl. 23:09]

Já og ég hef verið að velta því fyrir mér hvort engum öðrum en mér finnist þetta findið. Það mætti halda að Nixon væri ráðgjafi Björgvins.

[Sigurður Sigurðsson, 8.11.2008 kl. 23:26]

Hvar vorum við öll þegar spillingarliðið óð uppi og sigldi öllu í þrot?

Við sem sátum hjá, berum við enga ábyrgð?

En þessu verður öllu að linna. Ef ruglið heldur áfram þá fer þetta allt í klessu.

Hannes Hólmsteinn er með talsvert yfirgripsmikið viðtal í Viðskipablaðinu í dag og þar segir hann að 3 fjölskyldur hafi hirt völdin i landinu af pólitíkusum. Var það ekki Hannes sem vildi einkavæða allt og koma öllu í hendurnar á einkaaðilum.

En hvað er Hannes að segja? Að pólitíkusar hafi séð að sér og vilji nú taka völdin aftur? Hvernig? Með því að keyra bankana í kaf og fara með samfélagið út á ystu brún gjaldþrots - þurrka út alla einkaaðila?

Sigurður Einarsson sagði í Markaðnum í dag að Davíð Oddsson hefði hótað honum að koma KB Banka í þrot.

Spáið í þetta

[Sverrir (IP-tala skráð) 8.11.2008 kl. 23:29]

Skjóta fyrst og spyrja svo. Mjög týpiskt fyrir bloggara. Afsaka svo kanski daginn eftir.

[Jakobína Ingunn Ólafsdóttir, 8.11.2008 kl. 23:40]

Sigurður það er órofa samhengi milli ábyrgðar og valda, áhrifa og upplýsinga.

Þeir sem ekki hafa völd, áhrif og upplýsingar geta ekki borið ábyrgð.

[Lára Hanna Einarsdóttir, 8.11.2008 kl. 23:50]

Ég trúi ekki nokkrum manni þessa dagana, enda búið að ljúga svo miklu. Ég er ekkert frekar tilbúin til að trúa Viðskiptaráðuneytinu en manninum á götunni.

[Guðrún (IP-tala skráð) 9.11.2008 kl. 08:49]

Ég myndi vilja að´hún Birna Einarsdóttir bankastjóri í Nýja Glitni fari, finnst hún ekki trúverðug og er ábyggilega ekki ein um það

[Jakob Falur Kristinsson, 9.11.2008 kl. 10:01]

Ég las um það í Morgunblaðinu að gerðir hefðu verið sérstakir starfslokasamningar við Halldór J. Kristjánsson og Sigurjón Árnason fv. bankastjóra Landsbankans.  En hinsvegar mun Sigurjón starfa enn með skilanefnd bankans en þiggur ekki laun fyrir.

[María Richter, 9.11.2008 kl. 10:35]

Það er gott ef Sigurjón er ekki enn að störfum.  En hitt er ekki haft eftir manninum á götunni að besti vinur Baugsmanna Tryggvi Jónsson er að störfum fyrir bankann.  Þar er hann í ráðgjafastörfum í lánamálum og virðist hafa mikið um það að segja hvort fyritæki lifa eða deyja og í leiðinni hvað margir missa vinnuna.  Ég hef miklar efasemdir um heilindi hans og hlutleysi.  BURT MEÐ SPILLINGARLIIÐ

[Eyleifur (IP-tala skráð) 9.11.2008 kl. 11:00]

Þetta er skrítinn pistill. Hvað sem viðskiptaráðuneytið segir þá er Sigurjón enn að störfum í Landsbankanum. Skrítið að enginn fjölmiðill skuli ekki fara niður í Reykjavíkurapótek og mynda skrifstofurnar þar. Svo hefði líka verið hægt að fylgjast með því þegar hann renndi inn í bílastæðaskúrinn við aðalbankann. Hann er nú sennilega hættur því núna. Því miður virðast stjórnvöld ekki vita (eða vilja ekki vita) hvað nú fer fram í hinum svokölluðu nýju bönkum. Ég ítreka, Sigurjón er enn að störfum og lét fyrir örfáum dögum innrétta nokkur skrifstofuherbergi fyrir sig. Ég get tæpast verið nær atburðarásinni :)

[Benedikt Halldórsson, 9.11.2008 kl. 11:20]

"Það breytir ekki hinu, að fjöldi starfsmanna og millistjórnenda gömlu bankanna er enn að störfum í nýju bönkunum og gegna þar margir hverjir lykilhlutverki. "

Og hvað með það? Viltu láta reka alla sem ekki voru óbreyttir liðsmenn og senda hina burt. Mér sýnist það á hinu misheppnaða slagorði "burt með spillingarliðið" og minnir á menningabyltinguna í Kína. Viljið þið kannski senda lykilstjórnendur bankanna upp í sveit þar sem þeir geta mjólkað kýrnar og mokað flórinn!

Fyrst var talað um að "nýfrjálshyggjan" væri  dauð en að vísu skildi ég ekki hvað átt var við með orðinu. Frjáls markaður mun alltaf standa fyrr sínu með leikreglum. Núna keppast bloggara við að útmála hina og þessa bankamenn sem spillta og gerspillta sem hafi komið okkur á kaldan klaka.

Ef við einhverja að sakast er það við stjórnvöld, seðlabanka og eftirlitsstofnanir. Þá er ég að tala um eðlilegt eftirlit sem þær áttu að sinna án þess að kæfa markaðinn.  Alþingi brást líka. Neyðarlögin voru kolólögleg samkvæmt EES samningnum og allir þekkja framhaldið. Þjóðnýting Glitnis voru mistök. Það voru mistök að ráða Davíð sem seðlabankastjóra og svo framvegis en vonandi læra menn af reynslunni.

[Ólína Kjerúlf Þorvarðardóttir, 9.11.2008 kl. 12:45]

Sæll Benedikt.

Oftúlkanir á borð þvið þessa sem þú berð hér á borð eru ekki gott innlegg umræðuna að mínu mati - þú fyrirgefur.

Að sjálfsögðu brugðust margir: Bankarnir, Seðlabankinn, stjórnvöldin og aðrar eftirlitsstofnanir.  Hér eru ekki efni til þess að metast á um það hver brást mest - eða hverjum beri að fara fyrst. Hér brást allt - ekki síst peninga- og útþengslustefna bankanna. 

Það segir sig sjálft að þeir sem bera ábyrgð á og tóku þátt í því sukki að fella niður skuldir útvalinna starfsmanna í bönkunum bera ríka ábyrgð.

Burt með spillingarliðið!

[Benedikt Halldórsson, 9.11.2008 kl. 13:13]

Spilling er stórt orð og spillingarlið er enn stærra. Ef sanngirni er gætt er óviðeigandi að tala um spillingarlið og alls ekki gott innlegg í að bæta ástandið til að læra af reynslunni. Eitt er að viðurkenna mistök, annað er að samþykkja að vera spilltur í spillingarliði.  Erlendis taka dómstólar að sér að meta hvort um spillingu sé að ræða eða ekki.

Það er reginmunur á mistökum, að eitthvað hafi brugðist, eftrilitsleysi og spillingu. Við getum verið sammála um að ýmislegt hafi brugðist en það er ekki þar með sagt að um spillingu sé að ræða.

[Benedikt Sigurðarson, 9.11.2008 kl. 13:19]

Rétt Ólína - - þeir sem komu okkur í vandræðin og bera á því meginábyrgð - verða að víkja.   Í slíkri aðgerð felst enginn endanlegur dómur um sekt eða nein tegund af refsingu - - slíkt bíður þeirrar rannsóknar sem við verðum að njóta liðsinnis annarra en IMF til að framkvæma.   Þegar við höfum leitt í ljós hvað gerðist og hvernig okkur bar í þetta strand . . . . þá kann að koma upp sú staða að ekki sé forsenda til að stinga inn heilum hundruðum manna - - þannig að við látum kannski duga að fyrirmuna þessu fólki forystu í stjórnmálum og í fjármálalífi.

Lausnir á vandanum verða einfaldlega ekki til undir forystu og leiðsögn þeirra sem eru uppteknir af því að verja sínar fyrri gerðir og draga þannig athyglina frá því hver ætti að vera þeirra ábyrgð.

Nýtt fólk þarf að leiða uppbygginguna . . . . . . .  það er nú bara þannig

[Hákon Jóhannesson (IP-tala skráð) 9.11.2008 kl. 13:59]

Það er mjög sérkennileg umræða í þjóðfélaginu í dag...og reyndar nýlunda, a.m.k. í mínum eyrum að heyra framámenn/konur; fullorðið - reynt viðskiptafólk með góða menntun og áratugareynslu í rekstri og stjórnun úr einkageiranum eða þeim opinbera kenna hvort öðru um ófarirnar í bankahruninu og aðdragandanum.

Ég skal reyna hvað ég get til að vera skýr á þessum fallega degi með dæmisögu og hér kemur hún:  Þjófur nokkur stundaði innbrot um nokkurt skeið í verslanir.  Hann var einbeittur, skipulagður og vel undirbúinn og var ávalt búinn að kynna sér vel aðstæður og öryggisbúnað allan og var búinn að finna leiðir framhjá þannig að þa náðist aldrey í hann á vettvangi. En dag einn var hann gripinn. 

Hann var tekinn til yfirheyrslna.  Hvað sagði hann ?

(A) Ég játa brot mín og skal skal axla ábyrgðina af þeim.

eða

(B) Þetta er ekki mér að kenna, ég fer fram á því að vera sleppt því að öryggisbúnaðurinn var ófullnægjandi á öllum stöðunum.

Það kemur hver einstaklingurinn fram eftir öðrum og kennir "öryggisbúnaðinum" um bankahrunið.  Ég kalla þetta dónaskap og ósvífni við fólkið í landinu.

Kveðja Hákon.

[sigurvin (IP-tala skráð) 9.11.2008 kl. 14:10]

"Rétt skal vera rétt" ?? Hver VEIT hvað er rétt? Yfirlýsing frá viðskiptaráðuneytinu! Það eru til nokkurra vikna gamlar yfirlýsingar frá þessu ráðuneyti þar sem talað er um "mjög góða stöðu bankanna!!" Er þetta ráðuneyti trúverðugt?

[B.N. (IP-tala skráð) 9.11.2008 kl. 14:27]

Hvar er stjórnarandstaðan sem er á Alþingi?  Eru flokkarnir að reyna að búa til nýja ríkisstjórn með Sjálfstæðisflokknum fyrstur kemur fyrstur fær þ.a.s. ef kakan er ekki búin. Þögn Guðna, Steingríms, og Guðjóns Arnars vera mikill síðustu daganna kannski ekkert skrítið okkur kemur það ekkert við hvað þeir eru að bauka. Ég tel a.m.k að allir þessir aðilar vilja ekki kosningar á næstunni ef þeir komast í ríkisstjórn á næstu dögum svona er pólitíkin á Íslandi því miður.

Baldvin Nielsen Reykjanesbæ

[Jóhann G. Frímann, 9.11.2008 kl. 15:09]

Hvað er Samfylkingin að hugsa? Það er það sem ég er búinn að hugsa í margar vikur.

[Hákon Jóhannesson (IP-tala skráð) 9.11.2008 kl. 15:37]

Af spillingarmálum...  Áhugaverð umræða um spillingu og margir sem láta sig málið varða. En hvað er spilling, hvað er spilltur einstaklingur, hvað er pólítísk spilling (e. Political corruption) ?.  Væri gaman að fá skilgreiningu á hugtökunum, þ.e. hvað það er á máli sem fólk skilur. Spurning um lögfræðilega útskýringu líka ? Gæti glætt umræðuna, sem vissulega er tímabær og nauðsynleg núna. Fann þetta á wiki: http://en.wikipedia.org/wiki/Corruption

Það slær að manni hrolli.  Kveðja Hákon

[Gísli Sigurðsson (IP-tala skráð) 9.11.2008 kl. 17:18]

Gæti ekki verið að "svokallað spillingarlið" sem sagt var vera að störfum í bönkunum, (sennilega á vegum skilanefnda fjármálaeftirlitsins) hafi eða sé þar vegna þess að svokallað fjármálaeftirlit hefur aldrei haft neina þekkingu á þessum málum, (þessvegna er allt hrunið í dag) og "spillingar liðið" sé eða hafi verið að reyna að kenna og sýna fjármálaeftirlitunu þessa hluti sem það átti að hafa eftirlit með undan farin áratug eða svo? 

[Álfgrímur (IP-tala skráð) 9.11.2008 kl. 19:48]

Voru ekki menn eins og Benedikt Halldórsson kallaðir nytsamir sakleysingjar "i den tid" á vissum stöðum?

[Kristín Helga (IP-tala skráð) 10.11.2008 kl. 00:30]

Ég skil Ólínu þannig að spillingarliðið sem hún talar um sé víðar en í bönkunum. Og því er ég sammála.

[Benedikt Halldórsson, 10.11.2008 kl. 15:18]

Álfgrímur: Ég skora á þig að taka þátt í umræðum um málefni undir fullu nafni en ef þú kýst hinsvegar að vera nafnlaus skaltu sleppa því að gera gys að fólki.