Á vængjum söngsins á Tónlistardaginn mikla!

 Í dag ætla ég ekki að hugsa um pólitík. Ég ætla bara að svífa "Á vængjum söngsins" í tilefni af því að nú er Tónlistardagurinn mikli framundan hér á Ísafirði næstkomandi laugardag. Þessi tónlistarveisla er haldin í tengslum við 60 ára afmæli Tónlistarskólans hér - og nú verður mikið um að vera. Allir kórarnir á svæðinu hafa verið virkjaðir í tónlistarflutning og íbúarnir sjálfir, því fólk mun geta komið inn á heimili bæjarbúa og hlýtt þar á tónlistarflutning heimafólks (sniðugt  minnir svolítið á fiskidaginn).

 Nú vill svo skemmtilega til að einkennislag Tónlistardagsins mikla er ABBA lagið "Thank you for the music" í íslenskri þýðingu. Lagið var valið í vor, áður en myndin Mama mia sló hér í gegn, áður en ABBA æðið gekk yfir landið. En nú fellur þetta alltsaman eins og flís við rass.

Ég fékk þann heiður að þýða textann og hann útleggst hjá mér "Á vængjum söngsins " . Þessari þýðingu hefur nú verið dreift í hús á Ísafirði, skilst mér, því það er ætlunin að allir taki undir með kórunum á Silfurtorginu á Ísafirði á laugardaginn. Ég verð sjálf fjarri góðu gamni, upptekin við að stjórna aðalþingi Neytendasamtakanna með meiru. En ég verð með í anda.

Fyrir þá sem vilja æfa sig, þá fer textinn hér á eftir. Og HÉR getið þið séð lagið sungið af ABBA.

En þýddi textinn er svona:

Látlaus ég virðist, ég verð sjaldan æst eða reið.
Ef ég segi sögu - þá syfjar þig trúlega um leið.
En leynivopn á ég - eitt dásemdarþing,
því kliðurinn þagnar þegar ég syng.
Það er hamingjugjöf
og mig langar að hrópa yfir höf.

Á vængjum söngsins hef ég svifið
í sorg og gleði,
sungið dátt með glöðu geði.
Án þess væri lífið svo laust við lit og róm.
Innihaldstóm
væri þá ævitilveran öll.
Á vængjum söngsins hef ég svifið
um lífsins tónahöll.

Dálítil hnáta ég dansaði af lífi og sál.
Ég dreymandi söng, því söngur var mitt eina mál.
Og oft hef ég hugsað hvers virði það er
að heyra og finna í brjóstinu á sér
þessa hljómkviðu slá,
hjartastrengina samhljómi ná.

Á vængjum söngsins hef ég svifið  ....

Þakklæti finn ég - þegar ég syng af hjartans lyst.
Rödd mína þen ég hátt svo allir heyri:
Þennan róm, þennan tón, þennan hljóm.

Söngs á vængjum svíf ég - í sorg og gleði.
Syng ég dátt með glöðu geði ,
án þess væri lífið - svo laust við lit og róm.
Innihaldstóm
væri þá ævitilveran öll.
Á vængjum söngsins hef ég svifið
um lífsins tónahöll.

-----

PS: Í dag (18. sept) leiðrétti ég textann sem var settur hér inn í fyrstu - ég hafði í ógáti tekið eldri drög að textanum. Þetta hefur nú verið lagað - þetta er endanlegi textinn hér fyrir ofan.

Athugasemdir

[Ómar Valdimarsson (IP-tala skráð) 16.9.2008 kl. 11:13]

Á þínu bloggi er notað gott mál og þess vegna leyfi ég mér að koma hingað með alveg óskylt mál (þótt ég óski þess vitaskuld að tónlistarveislan gangi vel): í Mogganum í dag og á Stöð 2 í gærkvöld var fjallað um konur sem bera börn fyrir aðrar konur. Þetta er kallað 'staðgöngumæðrun'. Eru þá konur sem eru vanfærar að eigin börnum 'í mæðrun'? Er þá barnauppeldi feðrun og mæðrun? Geturðu hugsað þér meira orðskrípi?

[Ólína Kjerúlf Þorvarðardóttir, 16.9.2008 kl. 12:10]

Já, ég er sammála þér Ómar.

Annaðhvort ætti að tala bara um staðgönguþungun - eða kalla þetta þá einfaldleg "mæðrun" (án staðgönguforskeytisins). Spáðu í það.

Kannski maður setji inn færslu um þetta seinna í dag.

[Sesselja Fjóla Þorsteinsdóttir, 16.9.2008 kl. 23:29]

Þú ert frábær.

[Yngvi Högnason, 17.9.2008 kl. 21:48]

Skemmtileg snörun.Takk fyrir.

[Hallgrímur Óskarsson (IP-tala skráð) 19.9.2008 kl. 15:20]

Virkilega vel snarað Ólína - fellur vel að laginu.  Það er ekki sjálfgefið að íslenskun texta gangi upp - sérstaklega þegar um þekkt lag er að ræða.  En mér sýnist að þetta hafi gengið mjög vel upp hjá þér, virkilega laglega gert.

Talandi um þýðingar á dægulagatextum þá er broslegt að rifja upp fyrstu skref íslenskra dægurtónlistamanna á því sviði.  Þá var stundum ekki þýtt skv. merkingu heldur aðeins skv. hljóðum orðanna, dæmi (Haukar, 1975):

  Return to sender  /  address unknown / No such number / no such zone.
  Þrjú tonn af sandi / Andrés fær nóg      / Mótatimbur        / já heilan skóg.

Þorsteinn Eggertsson er höfundur textans.  Svona gera aðeins snillingar!

[Jóna Á. Gísladóttir, 22.9.2008 kl. 00:21]

Frábær texti hjá þér. Ég er búin að syngja hann í gegn