Hvað er svo glatt sem góðra vina fundur?

   Þetta hafa verið ógleymanlegir dagar - helgaðir vinum, samverkafólki, ástvinum og félögum, samtals á þriðja hundrað manns sem gerði sér ferð vestur að Núpi í Dýrfirði til þess að vera með okkur Sigga og samfagna fimmtugsafmælum okkar og silfurbrúðkaupi um helgina.

Veislan bar þessu fólki öllu vitni, enda einvalalið sem steig á stokk og skemmti afmælisbörnunum - og einvalalið sem skemmti sér í sætum sínum og tók undir með hlátri og söng. Allt fór þetta fram undir styrkri stjórn Halldórs Jónssonar veislustjóra og blaðamanns m.m. sem með sínum einstaka húmor hélt samkvæminu við efnið af stakri snilld.

                                

Eins og við mátti búast var mikið sungið. Tveir kórar - Sunnukórinn og Valkyrjurnar - tróðu upp með miklum bravör og fjöri. Hljómsveitin Melneiophrenia sem kom sérstaklega sunnan úr Reykjavík til að heiðra tilefnið,  vakti verðskuldaða athygli og gladdi okkur mjög. Stefanía Svavarsdóttir - sigurvegari Samfés - geypilega efnileg söngkona, aðeins sextán ára gömul, sló algjörlega í gegn. Magga vinkona færði mér málverk eftir sjálfa sig sem gæti heitið "Sjáðu jökulinn loga" - mjög falleg mynd. Að sjálfsögðu brá hún Óðni Valdimarssyni á fóninn af því tilefni og allur salurinn tók undir með honum: Ég er kominn heim!

Margar góðar ræður voru fluttar - vænst þótti mér um ræðuna hennar Halldóru systur sem var sérlega kærleiksrík (ég tala nú ekki um ljóðið eftir hana sem beið svo falið inni í pakka). Nonni Baddi, systursonur minn, sýndi og sannaði að hann er mikill húmoristi. Síðast en ekki síst vil ég nefna barnahópinn minn sem í lok dagskrár fluttu í sameiningu frumsamið lag til okkar foreldra sinna, sem Saga söng við undirleik bræðra sinna, Hjörvars og Péturs. Hún klykkti svo út með því að dansa fyrir mannskapinn.

Að lokum stigu á stokk þrír fyrrverandi nemendur mínir úr Menntaskólanum undir forystu síns gamla tónlistar-mentors Kristins Nielssonar og trylltu mannskapinn með Stones-syrpu. Síðan var dansinn stiginn til kl. 04.

Margir lögðu á sig langa ferð til að vera með okkur. Saga dóttir mín flaug milli landa og fékk lítinn svefn - þurfti að vera mætt á Keflavíkurflugvöll fáum klst eftir að hún kom akandi suður aftur úr afmælinu. Föðurbróðir minn og hans kona - fólk á níræðisaldri - lét sig ekki muna um að koma akandi frá Reykjavík til að taka þátt. Og það gerðu þau svikalaust, stigu svo dansinn til kl. tvö um nóttina.

 Önnur kær vinahjón komu sömu leið þrátt fyrir annríki, en urðu svo að rífa sig upp kl fimm um morguninn til að vera komin í flug um miðjan næsta dag vegna opinbera skyldustarfa erlendis. Þau fengu fjögurra tíma svefn hið mesta - en létu sig hafa það til að gera samglaðst okkur.

Systir mín elskuleg lét þetta líka ganga fyrir öðrum skyldum og kom með alla fjölskylduna þó hún þyrfti að fara til baka snemma næsta dag til að taka á móti sláturbílnum heim á bæ síðdegis í gær. 

Og svipaða sögu má segja af ýmsum sem settu þetta í forgang hjá sér að koma vestur og vera með okkur.

Við erum öllu þessu fólki af hjarta þakklát. Og mikið lifandis skelfingar ósköp var gaman að skemmta sér með því öllu á laugardagskvöldið.

 

 Og hér sjáið þið svo þann hluta kjarnafjölskyldunnar  sem sá sér fært að mæta í myndatöku s.l. vor. Þarna vantar Sögu og Dodda (sem er kominn með sína eigin fjölskyldu) - þau voru bæði í afmælinu. Það var Maddý hins vegar ekki, en hún er á myndinni. Dæmigert fyrir þennan fjölskylduhóp sem hefur í svo mörgu að snúast. En svona er lífið

Athugasemdir

[María Anna P Kristjánsdóttir, 8.9.2008 kl. 10:54]

Hjartanlegar hamingjuóskir í tilefni afmælisins.

[Ía Jóhannsdóttir, 8.9.2008 kl. 11:14]

Innilegar hamingjuóskir berast héðan yfir hafið frá Stjörnusteini

[Þorsteinn Briem, 8.9.2008 kl. 11:32]

Þið ættuð nú að fá stórriddarakrossinn út á þetta silfur. Það er raritet.

[Ragnheiður Ólafía Davíðsdóttir, 8.9.2008 kl. 13:53]

Elsku Ólína. Innilega til hamingju með afmælið og kærar þakkir fyrir síðast. Afæmlisveislan var yndisleg og sérstaklega ánægjulegt að fá að heimsækja ykkur hjón á þessum tímamótum. Gleðileganafmælisdag. Þín vinkona, Ragnheiður.

[Jenný Anna Baldursdóttir, 8.9.2008 kl. 15:06]

Innilegar hamingjuóskir til ykkar beggja.

Þið eruð eins og unglömb hjónin þó hundrað séu samanlagt.

[Guðrún S Matthiasd (IP-tala skráð) 8.9.2008 kl. 15:39]

Innilegar hamingjuóskir með daginn.

[Þorkell Sigurjónsson, 8.9.2008 kl. 17:44]

Góðar óskir með afmælið frá bloggvini þínum Þorkeli.. Kveðja.

[Lára Hanna Einarsdóttir, 8.9.2008 kl. 17:48]

Til hamingju með daginn, bæði tvö. Þetta hefur verið afmæli ársins, heyrist mér! 

[Pétur Kristinsson, 8.9.2008 kl. 18:54]

Til hamingju með daginn kæra Ólína. Njóttu dagsins.

[Ásta Björk Solis, 8.9.2008 kl. 18:54]

til hamingju med daginn baedi 2.

[Þóra Sigurðardóttir, 8.9.2008 kl. 19:44]

Innilegar hamingjuóskir til ykkar hjóna, kæra bloggvinkona

[Fríða Sjöfn og Benóný Valur (IP-tala skráð) 8.9.2008 kl. 19:50]

Elsku Ólína og Siggi. Innilega til hamingju með 100 árin. Ótrúlega stutt síðan við skemmtum okkur svo vel út á sjó í fertugsafmælunum. Gaman að kíkja hér inn annað slagið. Hafið það gott í allavega 50 ár í viðbót. Benni og Fríða brussubína

[Yngvi Högnason, 8.9.2008 kl. 21:33]

Til hamingju með daginn frú Ólína.

[Ragnheiður , 8.9.2008 kl. 21:36]

Innilega til hamingju með afmælið

[Magnús Geir Guðmundsson, 8.9.2008 kl. 23:51]

Mín kæra og elskulega Ólína!

Það er kannski að bera í bakkafullan lækin, en innilegar árnaðaróskir til þín í tilefni dagsins og þíns elskulega Sigurðar péturssonar sömuleiðis!

Ert já heillin "Höfuðrauð",

en hári undir eigi snauð.

Heldur rík af andans auð,

elli- sjálfsagt verður dauð!

Einn "vesalingur" til í eflaust hafsjó af öðrum!

[Óskar Helgi Helgason (IP-tala skráð) 9.9.2008 kl. 01:02]

Innilegar hamingjuóskir, með daginn. Lifið heil. 

                                            Óskar Helgi Helgason

[Hildur Helga Sigurðardóttir, 9.9.2008 kl. 05:17]

Er nýkomin frá útlöndum og því ekki alveg með sólarhringinn á hreinu. 

Sendi samt góðar afmæliskveðjur Vestur til ykkar hjóna

-ennfremur vinarkveðjur til Andresar frá Óðni Páli.

[Ólína Kjerúlf Þorvarðardóttir, 9.9.2008 kl. 09:20]

Hjartans þakkir fyrir kveðjur ykkar og velfarnaðaróskir - þær gleðja mig.

Og takk fyrir skemmtilega vísu, Magnús Geir.

[Ásthildur Cesil Þórðardóttir, 9.9.2008 kl. 12:11]

Síðbúin kveðja héðan, innilega til hamingju með afmælin og silfurbrúðkaupið glæsilegu hjón.

[Jón Snæbjörnsson, 9.9.2008 kl. 13:48]

Til hamingju með daginn

[Benedikta S Steingrímsdóttir, 9.9.2008 kl. 20:34]

Innilega til hamingju með afmælið og silfurbrúðkaupsafmælið.