Þoka og fréttaþurrð

 Það er þoka í Skutulsfirðinum núna og stafalogn. Maður finnur samt fyrir sólinni einhversstaðar fyrir ofan - hún vefur birtu sína í þokumistrið, gerir það hlýrra. Kyrrð og værð yfir öllu. Hálfsofandi fuglar líða einn og einn um hafflötinn og skilja eftir sig V-laga rák.

Í morgun átti ég MSN-fund með mínu fólki á Skutli.is, líkt og alla aðra virka morgna. Þetta eru svona fréttafundir þar sem við ræðum atburði líðandi stundar og ákveðum hvað verður sett inn á vefsíðuna þann daginn. Nú brá svo við að það er ekkert í fréttum. Bara þoka.

Jamm, það koma svona dagar. Svo koma ráð.

 Eigið góðan dag í dag.

Athugasemdir

[Katrín, 15.5.2008 kl. 10:10]

Mér finnst nú ætlan ríkisstjórnarflokkanna að keyra í gegn breytingar á löhum um tekjuskatt þ.e. að gera söluhagnað af hlutabréfum skattfrjálsan,  nokkuð stór frétt.

[Katrín, 15.5.2008 kl. 10:10]

,,lögum" á þetta að vera

[Friðrik Þór Guðmundsson, 15.5.2008 kl. 10:52]

Bloggarar eru áhugaverður hópur. Eru þeir eins og fólk er flest og geta þeir talist spegilmynd af umræðunni og áherslunni í samfélaginu? Sjá lillo.blog.is.

[Þorsteinn Briem, 15.5.2008 kl. 14:16]

Tómu er Skutull í tjóni,
Tóta þó börnuð af Jóni,
allar skutlurnar æfa sig,
í engum fréttum fyrir mig.