Jón eða séra Jón: Jakob Frímann eða Markús Örn

 Hvar voru hinir ágengu fréttahaukar þegar Markús Örn Antonsson var ráðinn sem forstöðumaður Þjómenningarhúss, án auglýsingar fyrir skömmu - með 1,1, mkr á mánuði? Enginn fjölmiðill hefur mér vitanlega spurst nánar fyrir um launakjörin - eða fett fingur út í ráðningaraðferðina. Hvað þá að nokkur maður hafi verið kallaður til viðtals. Hvernig skyldi standa á því?

Vísir.is sagði þannig frá ráðningunni að Markús Örn hafi verið ráðinn frá 1. sept. n.k., hann muni leysa af hólmi Guðríði Sigurðardóttur sem hættir störfum að eigin ósk. Síðan er rakinn stuttlega ferill Markúsar. Enginn hneykslunartónn, ekki orð um launakjör.

Mbl.is sagði frá með svipuðum hætti. Enginn hneykslan - allt bara sjálfsagt og eðlilegt. Þar segir að Markús hafi verið "fluttur til í starfi".

Eyjan.is er raunar eini vefmiðillinn sem tekur fram að starfið hafi verið veitt án auglýsingar - en ekki er gert neitt með þá staðreynd að öðru leyti. 

Ég minnist þess ekki að Kastljósið eða Ísland í dag hafi skipt sér neitt af þesu máli - þið leiðréttið mig ef það er misminni hjá mér.

Áleitin fréttamennska? Varðstaða fyrir almenning? Hmmm ...

Athugasemdir

[Ásdís Sigurðardóttir, 12.5.2008 kl. 13:38]

Það virðist oft vera mikill munur á hvort fréttamenn telja ástæðu til að fjalla um mál eða ekki, þó svo þau séu keimlík þá er einhvernvegin gert upp á milli. 

[Ásgerður Jóna Flosadóttir, 12.5.2008 kl. 13:39]

Sammála þér.  Fréttamatið er stundum skrítið.

Eigðu góðan dag.

[Brynjar Jóhannsson, 12.5.2008 kl. 15:19]

það er einmitt þessvegna sem ég er alltaf svo tvístígandi þegar stöðuráðningar eru gagnríndar. Ég hef einfaldlega ekki forsendur fyrir mér til að gagnrína hana einfaldlega vegna þess að upplýsingarnar sem ég fæ eru þvers og kruss. Mín upplifun er sú að politík er uppfull af vissri hræsni. Stjórnarandstaðan ,sama hver hún er hverju sinni gagnrínir þá sem ríkja fyrir það sem þeir væru sjálfir vísir til með að gera sjálfir.

[Sigurbjörn Friðriksson, 12.5.2008 kl. 15:19]

Markús Örn er ekki pólitískt bitbein, og enginn pólitískur ávinningur fyrir VG, Femínista o.s.frv., að gera honum lífið leitt.  Ef fjölmiðlar hefðu vakið athygli á þessu, þá hefði enginn nennt að hlusta eða lesa um það.  Það er ekkert gaman að galdrabrennum, ef enginn er nornin á bálkestinum.

Kær kveðja, Björn bóndi.

[Þorsteinn Briem, 12.5.2008 kl. 15:42]

Enginn fær sem sagt að keppa við Markús Örn um þennan góða starfa, ekki einu sinni ræstingakonurnar tvær í húsinu, þær Ásdís og Ingigerður, sem eru með tífalt lægri laun en Krúsi. Jamm, hvar eru fréttahaukarnir nú?!

Þjóðmenningarhúsið heyrir undir forsætisráðuneytið og forsætisráðherra skipar forstöðumann hússins. Forstöðumaður við opnunina 20. apríl 2000 var Guðmundur Magnússon, sagnfræðingur, en hann lét af störfum sem forstöðumaður 27. febrúar 2002 og Sveinn Einarsson var settur forstöðumaður til ágústloka 2002.

Guðríður Sigurðardóttir tók við sem settur forstöðumaður hússins 29. september 2002 í leyfi frá embætti ráðuneytisstjóra í menntamálaráðuneytins en Guðríður fluttist milli embætta og var skipuð forstöðumaður Þjóðmenningarhússins 16. mars 2003. Og frá 1. maí síðastliðnum hefur Guðrún Garðarsdóttir verið settur forstöðumaður hússins en hún hefur áður starfað sem staðgengill forstöðumanns í veikindaforföllum hans.

[Þorsteinn Briem, 12.5.2008 kl. 16:01]

Hann Krúsi er milljón kall,
kominn nú á Hverfisgötu,
geysivel þar í gatið small,
gott er að vera á ríkisjötu.

[Baldur Gautur Baldursson, 12.5.2008 kl. 16:16]

Sennilega hefur Markúsi Erni verið hlíft við niðurlægingu og þar með því að vera veginn og metinn með fleiri umsækjendum. Sennilega vegna þess að hann hefði ekki staðist samkeppni við velmenntað, drífandi og áhugavert fólk.  Nei ég veit ekki. Þetta virkar bara dæmigert fyrir það hvernig ríkið starfar. Skal ekki skv. reglugerðum eða lögum auglýsa allar opinberar stöður?    Þetta er afskaplega niðurlægjandi fyrir mann sem er búinn að sitja í ég veit ekki hvað mörgum ráðum og embættum - að það þurfi að skaffa honum oflaunað embætti og ríkistryggingu fyrir ellilaunum og fínum veislum í framtíðinni.   Niðurlægjandi finnst mér! 

[Grímur (IP-tala skráð) 12.5.2008 kl. 17:43]

Það er nú enn verra þegar verið er að draga fólk á asnaeyrunum að sækja um  stöður sem búið er að úthluta. Þess vegna er ég þeirrar skoðunar að afnema eigi þessi lög þau eru bara til vandræða og fjölmargar leiðir notaðar til að komast framhjá þeim t.d. með tímabundum ráðningum og skipunum.

[Liberal, 12.5.2008 kl. 19:18]

Ætli VG og Samfylkingin hafi ekki verið með öll vatnsglösin sín í uppvaskinu þá, enda margir stormarnir sem í þeim hafa verið undanfarið.  Svo verður Svandís að fægja geislabauginn öðru hverju, svona mitt á milli þess sem hún göslast áfram á frekjunni.

[Valsól (IP-tala skráð) 12.5.2008 kl. 22:21]

Þó ég ætli ekki að fara verja það neitt sérstaklega en þá er það þannig samkvæmt stjórnsýslulögum að það er hægt að færa embættismenn á milli embætta án auglýsinga. Þannig að þegar Markús var fluttur til í embætti innan stjórnkerfissins þá þurfti ekki að auglýsa. En aftur á móti má spyrja sig þeirrar spurningar, hvers vegna var gengið fram hjá konunni sem stóð fyrrverandi yfirmanni þjóðmenningarhúss næst í röðinni, konu sem gegnt hafði embættinu í fjarveru yfirmanns síns með miklum sóma? En bara af því Geir Harrde vildi setja vin sinn og flokksfélaga í þetta embætti þá mátti þessi kona sætta sig við það að gengið væri fram hjá henni.  Ömurlegt lið. Hvað varðar Jakop Frímann þá var það spilling og ekkert annað og við þegnarnir eigum ekki að verja þannig ráðningar hvort sem við erum sammála þeim eða ekki. Við eigum ekki að sætta okkur við að kjörnir fulltrúar okkar láti með störf eins og þau séu þeirra eigin til úthlutunar. Við eigum að gagnrýna svona spillingu hvaðan sem hún kemur.

[soffia (IP-tala skráð) 13.5.2008 kl. 08:29]

Sæl Ólina   ,

                       ég  er alveg   sammála  þér  ,við ættum að vera  í evrópusambandinu,þá væri

                             þetta ekki hægt  ,  þetta er  alveg óþolandi  ,afhverju  var konan tildæmis  ekki lengur.

                                             Þetta  er svipað og í Seðlabankanum það ætti að þurfa  að auglýsa  allar

                                                    svona stöður.

                                                                                           Soffía.

[Erla (IP-tala skráð) 13.5.2008 kl. 10:12]

Fjallað var um launakjör Markúsar Arnar í forsíðufrétt í DV þar sem fram kom m.a. að hann héldi sendiherralaununum sem forstöðumaður Þjóðmenningarhúss, og hefði þannig hærri laun en forverinn.

Sjá útdrátt. http://dv.is/frettir/lesa/5649

[Gísli Baldvinsson (IP-tala skráð) 13.5.2008 kl. 10:57]

Svo það sé á hreinu þá er sendiherrasukkið frá tíð Davíðs Oddssonar sem utanríkisráðherra. Sukklistinn er athyglisverður og langur.

[Þorsteinn Briem, 13.5.2008 kl. 10:58]

Krúsi kemst í bíó hundrað sinnum á mánuði, þrisvar á dag:

"Markús Örn Antonsson verður á mun hærri launum í Þjóðmenningarhúsinu en forveri hans í starfi forstöðumanns. Markús fær 92 þúsund krónum meira á mánuði eða um 1,1 milljón króna meira á ári."

[Skarfurinn, 13.5.2008 kl. 11:30]

Enn heldurðu áfram að verja Jakob Frímann, er þetta eitthvað persónulegt eða hvað ? að maðurinn skuli fá 862.000 kr á mánuði og þar af heilar 238.000 fyrir óunna yfirvinnu hlýtur að mega gagnrýna sérstaklega í ljósi þess að staða var ekki auglýst. Hitt er svo annað mál að færslan á Markúsi  ætti að sjálfsögðu eitthvað að kanna nánar, fréttablöð eiga að gæta sanngirni.

[Þorsteinn Briem, 13.5.2008 kl. 11:47]

En Krúsinn greiðir náttúrlega skatta af þessu öllu saman, sem ganga til þjóðfélagsins, þannig að þegar laun ríkistoppanna hækka eykst velferðin í þjóðfélaginu. Ekki satt?

Að vísu greiðir þjóðfélagið rikistoppunum laun og þau eru tekin af launum ræstingarkvennanna sem vinna hjá ríkinu, því það er bara ein ríkiskaka og þegar afmælið er búið er kakan búin. Krúsi og útvarpsstjórinn fengu stærstu kökubitana en ræstingarkonurnar fengu bara smartístöflurnar ofan á kökunni og vöskuðu þar að auki upp eftir afmælið.

Það er nú menning í því og fegurðin óendanleg.

[Ólína Kjerúlf Þorvarðardóttir, 13.5.2008 kl. 13:08]

Hér er ekki verið að verja Jakob Magnússon - hann sem persóna er þessu máli að sjálfsögðu óviðkomandi. Það er Markús Örn líka. Hvorugur ber ábyrgð á því hvernig að ráðningum þeirra hefur verið staðið. Það segir sig sjálft. 

[Þráinn Bertelsson (IP-tala skráð) 13.5.2008 kl. 16:32]

Flokkurinn beitir ekki gömlu flokkshestunum á Guð og gaddinn heldur reynir að finna gott graslendi þar sem þeir megi næðis njóta.

Nú eru stjórnmálaflokkarnir búnir að tryggja sér um 400 milljónir á ári af almannafé og það fer því að verða spurning hvort þeir taki ekki að sér sjálfir að setja upp verndaða vinnustaði handa þeim sem vankast hafa í baráttunni fyrir flokkinn í staðinn fyrir að misbjóða venjulegum skattborgurum. Þeir gætu þá ráðið eftirlaunakjörum sínum sjálfir.

[Sigurður Viktor Úlfarsson, 13.5.2008 kl. 19:58]

Það eru einfaldlega hagsmunir fulltrúa allra flokka í borgarstjórn að Jakob nái ekki markmiðum sínum í miðbænum því þá getur Ólafur skreytt sig með því í næstu kosningum.  Jakob er mjög öflugur maður og líklegur til að ná árangri.  Það vilja hinir borgarfulltrúarnir stöðva með öllum ráðum.  Honum verður pottþétt gert mjög erfitt fyrir í sínu starfi og hófst það við ráðningu.  Jafnvel getur verið að hann muni aldrei njóta sannmælis vegna þeirrar umræðu sem farið hefur fram undanfarið. 

Þó er ekkert athugavert við þessa ráðningu þar sem endalaus fordæmi eru fyrir því að tímabundnar ráðningar séu ekki auglýstar og nauðsynlegt að hann byrji strax þar sem við erum að fá 200 þúsund gesti í bæinn strax á næstu vikum.

[Rómverji (IP-tala skráð) 13.5.2008 kl. 20:07]

Pólitísk spilling í báðum tilfellum. Jakob Magnússon var þátttakandi í spillingu, í öðru tilfellinu. Markús Örn í hinu. Hefði vel mátt fjalla meira um það síðarnefnda.

Báðir bera þeir að sjálfsögðu ábyrgð á sínum þætti í spillingunni.

En hvað er svona erfitt? 

[Reyk-víkingurinn (IP-tala skráð) 15.5.2008 kl. 11:30]

Já Ólína mín, ég er nú sammála þér varðandi þessar ráðningar, hvers vegna er ekki fjallað með sama hætti um ráðningu og kjör Markúsar, og ráðningu og kjör Jakobs??

Hún hefur alltaf verið undarleg fréttamennskan hér á landi, svipuð og blessuð pólitíkin - undarleg tíkin sú arna, sammála þeim sem segir hvern valad sem á heldur - og allir framkvæma og gera eins þegar til valda er komið!! Þó svo að hinir sömu hafi fundið að framkvæmdum eða framkvæmdaleisi og störfum forvera sinna, ma. á Alþingi, þar getum við til dæmis tekið blessaðan samgönguráðherrann okkar, nú er hann í aðstöðu til að taka til hendinni í málum sem hann fann að svo um munaði þegar hann var í stjórnarandstöðu, en ekkert gerist, hann svarar bara út í hött og veltir kollhúfum þegar er spurt um "þessi atriði".

[Andrea J. Ólafsdóttir, 21.5.2008 kl. 20:47]

Er einhver leið að kæra svona ráðningar þannig að þær verði ekki svona tíðar?

Semsagt, hefur almenningur einhverjar leiðir til að kæra slíkt - eða kannski frekar að það sé opinber aðili sem leggur fram kæru, því það ættu að gilda einhverjar ákveðnar reglur um ráðningarferli slíkra opinberra starfsmanna... einnig eru launakjörin að mínu mati alveg fréttaefni eins og þú vekur athygli á - ótrúlegt í raun að maðurinn verði með hærri laun en alþingismenn.

Einnig myndi ég vilja spyrja - hversu miklu hærri eru launin hans núna heldur en laun konunnar sem var á undan honum???