Að græða á daginn og grilla á kvöldin

Hannes Hólmsteinn Gissurarson hefur nú sett fram skilgreiningu á fyrirbærinu Sjálfstæðismaður. Það gerði hann í þættinum Mannamál á Stöð-2 um helgina, eins og bloggvinkona mín hún Lára Hanna bendir réttilega á í færslu sinni í dag. Skilgreining Hannesar er svohljóðandi:   

Sjálfstæðismenn eru mjög foringjahollir og það er dálítill munur kannski ef maður tekur þetta svona... Sjálfstæðisflokkinn annars vegar og vinstri flokkana hins vegar þá er... í Sjálfstæðisflokknum er eiginlega fólk sem að hugsar ekkert mikið um pólitík og er frekar ópólitískt. Það hljómar dálítið einkennilega kannski en... og ég á kannski ekki að segja það svona, en til einföldunar má segja að Sjálfstæðismenn eru menn sem vilja græða á daginn og grilla á kvöldin. Vinstri menn eru menn, sem halda að með masi og fundahöldum þá sé... og sko ljóðalestri, þá sé hægt að leysa einhverjar lífsgátur. Þarna er dálítill munur. Þannig að vinstri menn eru miklu pólitískari heldur en hægri menn. Þess vegna eru þeir ekki eins foringjahollir. Hægri mennirnir, þeir eru bara að reka sín fyrirtæki, þeir vilja leggja á brattann, þeir vilja bæta kjör sín og sinna, þannig að þeim finnst hérna... gott að hafa mann sem sér um pólitíkina fyrir þá og Davíð var slíkur maður.
 

Hér er sko engin "sjúrmjólk í hádeginu og seríós á kvöldin" - ó, nei. Hér er grætt og á daginn og grillað á kvöldin!

Þarna hefur Hannes Hómsteinn tekið ómakið af andstæðingum Sjálfstæðisflokksins og sagt hreint út það sem þeir hafa aldrei kunnað við að segja upphátt. (Hafi hann þökk fyrir það að hreinsa andrúmsloftið með þessum hætti).

En nú læðist fram lítil vísa:

• Sjálfstæðismenn þeir sitja um völdin,
• af syndum er Hannes kvitt:
• Græðir á daginn, grillar á kvöldin
• og gerir í bólið sitt.

Athugasemdir

[Gísli Baldvinsson (IP-tala skráð) 21.1.2008 kl. 10:05]

HHG hefur alltaf verið hin tæra rödd Sjálfstæðisflokksins og segir það sem hinir þora...ekki.

[Kristín Helga (IP-tala skráð) 21.1.2008 kl. 12:00]

Frábær vísa Ólína.

Mér finnst Hannes svo sannarlega hafa gert í bólið sitt með þessari skilgreiningu - þó hún sé auðvitað sönn, eins og við vitum.

[Ásdís Sigurðardóttir, 21.1.2008 kl. 12:05]

Verð líklegast að fá mér grill.     

[Forviða (IP-tala skráð) 21.1.2008 kl. 15:09]

* Vinstrimenn þeir vöndinn munda,

* vandræði þeir sífellt baka.

* Við ljóða þeir sér lestur dunda,

* líkast almennt út' að aka.

[Hallmundur Kristinsson, 21.1.2008 kl. 21:26]

Þótt ég vart í gróða glitti,
gaman þótti mér
þegar naglann Hólmsteinn hitti
í höfuðið á sér.

[Forviða (IP-tala skráð) 21.1.2008 kl. 21:52]

Sósjalistar eldinn skara,

að sjálfs-síns köku og ekkert annað.

Í borginni hreinlega bulluðu bara,

bjargræði Víkur er nú mjög vel mannað.

[Lísa Margrét Kristjánsdóttir (IP-tala skráð) 21.1.2008 kl. 22:06]

Ætli Hannes þurfi ekki að fara í aðgerð til að láta losa varirnar af botni Davíðs þar sem þær eru orðnar fastar

[Marta B Helgadóttir, 21.1.2008 kl. 22:11]