Þá er það Útsvarið í kvöld

Jæja, þá er það Útsvarið í kvöld Lið Ísafjarðarbæjar að keppa við Akurnesinga í annarri umferð.

Við hittumst aðeins hérna hjá mér áðan og tókum léttar leiklistaræfingar og einn hring í Gettu-betur spilinu. Það verður að duga.

Eftir þáttinn í kvöld verður mér ekki til setunnar boðið. Á Snæfellsjökli verður landsnámskeið fyrir Björgunarhundasveit Íslands um helgina, og þangað stefni ég með minn hund strax að útsendingu lokinni. Ég verð búin að pakka mínu hafurtaski, hafa hundinn tilbúinn og svona. Gisti á Gufuskálum í nótt, svo byrja snjóleitaræfingarnar kl. 9 í fyrramálið.

En það er samt best að einbeita sér að einu í einu, og í réttri röð. Fyrst er það sumsé Útsvarið. Og við erum galvösk, Ragnhildur, Halldór og ég  - bítum í skjaldarrendur og munum gera okkar besta. 

Athugasemdir

[Kristín Björg Þorsteinsdóttir, 11.1.2008 kl. 17:13]

Þetta verður skemmtilegt - þrjár bloggvinkonur að keppa. Ég ætla að halda með ykkur að vestan - enda Hnífsdælingur í aðra ættina og vann þar í frystihúsinu sumarið 1979.

Áfram Ísafjörður!

[Ragnheiður Ólafía Davíðsdóttir, 11.1.2008 kl. 17:14]

Það er ekki á hverjum degi sem við kellur erum sama kvöldið í sjónvarpinu. Ég mun án efa sjá þig í Útsvarinu en þú nærð varla að horfa á mig í umræðu um fréttir vikunnar í Íslandi í dag í kvöld. En... við hittumst bara sprækar síðar. Næ varla að hitta þig í þessari kaupstaðaferð.

poj, poj.....í Útsvarinu.

[Sigríður Svavarsdóttir (IP-tala skráð) 11.1.2008 kl. 17:57]

Gangi ykkur vel í kvöld Ísfirðingar

[Ásdís Sigurðardóttir, 11.1.2008 kl. 18:39]

Alltaf líf og fjör hjá þér elskan mín. Gangi ykkur vel í kvöld.  Ætla að horfa á.  Farðu varlega á jökli.    

[Edda Agnarsdóttir, 11.1.2008 kl. 19:35]

Puff puff ekki meir í þetta skiptið - enda keppnin við mína heimabyggð! En ég veit....

[Ásdís Sigurðardóttir, 11.1.2008 kl. 21:22]

Þið stóðuð ykkur vel, erfitt að segja hvoru megin það dettur þegar komið er að síðustu spurningunum og munurinn nær enginn. Skagamenn voru líka flottir. Gaman að sjá ykkur blogg konur í TV.

[Lára Hanna Einarsdóttir, 11.1.2008 kl. 21:40]

Indverskir guðir og breskur róðrakappi! Fussumsvei!

Við hliðina á mér sat Breti sem vissi hvað róðrakappinn hét og ég kallaði það til ykkar. Þið heyrðuð ekki til mín, því miður. Bretinn var steinhissa á að hvorki þið né ég (og sjálfsagt ekki margir Íslendingar) hefði hugmynd um hver maðurinn er.

[Magnús Geir Guðmundsson, 11.1.2008 kl. 21:59]

Alltaf sárt að tapa jöfnum leik og það fyrir liði sem fyrirfram var talið veikara!

Mannaskiptin hafa kannski haft sitt að segja, en auðvitað heppni líka!

[Ingibjörg G. Guðmundsdóttir (IP-tala skráð) 12.1.2008 kl. 01:26]

:að sem ég reyndi að segja ykkur svörin við spurningunum um Indversku guðina en allt kom fyrir ekki. Þið stóðuð ykkur með sóma eins og fyrri daginn. Ég verð samt að viðurkenna að ég hefði alveg viljað sigur ykkur til handa. En svona er boltinn!

[Billi bilaði, 12.1.2008 kl. 13:08]

Synd að sjá á eftir svona góðu liði.  Ragnhildur líka flott í leiklistinni.

[Kolbrún Baldursdóttir, 12.1.2008 kl. 13:39]

Þið stóðuð ykkur mjög vel, miða við hversu absurd spurningarnar voru sem þið fenguð. Þið megið bara vel við una

[Marta B Helgadóttir, 12.1.2008 kl. 13:53]

Hér er Kolbrún búin að segja það sem ég hugsaði

Þið stóðuð ykkur mjög vel.  

[Þórarinn Þ Gíslason (IP-tala skráð) 13.1.2008 kl. 02:30]

Mér fannst þið standa ykkur vel.

Smá speki:  Sá sem kann ekki að tapa á ekki skilið að vinna.

(þetta er ekki eftir mig).Gangi vel næst.

[Ólína Kjerúlf Þorvarðardóttir, 13.1.2008 kl. 21:19]

Takk fyrir - já, þetta var svolítið skrítið alltsaman. Fyrst ætlaði ég að velja skjaldarmerkið - en félagar mínir vilodu loðnuna - nú þá kom hún upp. Þá vildi ég að hinir byrjuðu - en fékk ekki að ráða því. Og fyrir vikið fengu þau spurninguna um fjöturinn á fernisúlfi, sem ég hefði rúllað upp - þar fóru fimmtá stig!

Þetta er ákveðið happdrætti - eins og lífið sjálft. En það var gaman á meðan á þessu stóð.

[Máni Atlason (IP-tala skráð) 14.1.2008 kl. 23:21]

Sæl Ólína og takk fyrir síðast!  Útsvarið snýst auðvitað að miklu leyti um heppni.  En ég get alveg sagt þér hins vegar að við vorum búin að ákveða að ef við mundum byrja mundum við taka 10 stig.  Þið hefðuð ekki sloppið við forseta Lichtenstein ;)

[Ragnhildur Sverrisdóttir, 15.1.2008 kl. 10:21]

Uss, við áttum auðvitað ekkert að splæsa hringingunni á Lichtenstein, svona eftir á að hyggja (enda alltaf best og öruggast að vera vitur eftir á!) Hver annar gat þetta verið, óþekktur maðurinn hlaut að vera yfir örríki og hann hlaut að vera yfir þessu tiltekna örríki, með þetta þýska nafn, Hans Adam! Þetta sá ég allt svo undur ljóst -rétt eftir að keppni lauk

Gangi ykkur Skagamönnum sem allra best, Máni.