Ömmustúss

  

Ég er í ömmuleik.  Daði Hrafn kominn í helgarheimsókn með pabba sínum og mömmu (Dodda og Erlu Rún). Þau falla svolítið í skuggann, það verður bara að segjast eins og er - en þau fyrirgefa mér það.

Já, tíminn líður. Svo er "litla" barnið á heimilinu, hann Hjörvar minn, farinn að mæta á böll í næstu byggðarlögum - ekki fermdur einu sinni.   Hann fór með skólanum á mikla íþróttahátíð sem haldin var í Bolungarvík í gær. 8., 9. og 10. bekkir grunnskólans fjölmenntu og héldu svo grunnskólaball í gærkvöldi. Mikið fjör hlýtur að vera, a.m.k. var það ánægður drengur sem kom heim með rútunni um miðnættið í gærkvöldi, óræður á svip.

Í morgun var mannskapurinn vakinn fyrir allar aldir - Daði Hrafn kominn á stjá. Hann sér ekki sólina fyrir Sigga afa, sem veltist um gólfin með honum. Blíða er afbrýðisöm.

Áðan drifum við okkur með þann stutta í sleðabrekkuna neðan við húsið: Amma, afi, Hjörvar, Daði Hrafn og Blíða. Höfðum meðferðis gula kringlótta snjóþotu og Stiga-sleða. Blíða elti okkur niður brekkuna og kunni sér ekki læti.

Svo fengum við okkur að drekka og Daði tók miðdegislúrinn. Amma hvílir sig á meðan, því kl. hálf þrú er Hjörvar að fara að keppa í fótbolta í íþróttahúsinu. Þá verður fjölskyldan á áhorfendabekknum, að sjálfsögðu. 

Athugasemdir

[Ester Rut Unnsteinsdóttir, 3.11.2007 kl. 19:26]

um að gera að æfa Blíðuna í að draga sleða, þá verður hún líka minna afbrýðisöm - en ég er líka pínu afbrýðisöm útaf þessu hvíta kalda sem ég sé á myndunum, ætla líka bráðum að koma í heimsókn vestur með manninn minn, hundinn og skíðin

[Hjördís Ósk (IP-tala skráð) 3.11.2007 kl. 21:09]

Ohh get rétt ímyndað mér að Daði Hrafn skemmti sér vel í ömmu og afahúsi á Ísafirði :)

 Kveðja úr Firðinum, 

Hjördís vinkona Erlu Rúnar  

[Jóna Á. Gísladóttir, 4.11.2007 kl. 23:48]

Það er brjálað að gera hjá þér manneskja.

Yndislegar myndir alveg hreint og þetta er eins og að horfa í aðra veröld en við erum í hér í Reykjavíkinni núna.

[Ólína Kjerúlf Þorvarðardóttir, 5.11.2007 kl. 11:12]

Jamm, það er alltaf gaman þegar nóg er að gera

[Marta B Helgadóttir, 7.11.2007 kl. 00:32]

Flottur ömmustrákur.