Að kvöldi "kvennafrídags" ...

... er ég uppgefin eftir annasaman, en skemmtilegan dag (vinnan, fjarkennsla í 3 klst., tveir fundir, kóræfing og hundaþjálfun með björgunarhundasveitinni). Er tiltölulega nýkomin heim og klukkan orðin ellefu.

Efst er mér þó í huga hvernig ég varði þessum degi - eða aðfararnótt hans - fyrir tuttugu og fjórum árum. Þá vann ég það lífsins afrek að fæða 15 marka son - 50 sentímetrar var hann fæddur, helblár í framan fyrstu sekúndurnar, en undurfallegur frá fyrstu stundu.

Hann kom með hvelli. Ég man hvað ég skalf eftir að vatnið skyndilega fór klukkan tvö um nóttina. Þetta var þriðja fæðing - og líkaminn kveið því augljóslega meir en sálin að takast á við það sem framundan var. En mér gafst lítið ráðrúm til að velta því fyrir mér - hríðarnar hvolfdust yfir mig eins og brimskaflar, og tveim tímum síðar var hann bara fæddur. Hann Pétur minn, sem er tuttugu og fjögurra ára í dag. Elsku drengurinn

 Hann hefur stundum verið baldinn við mig.  Já, beinlínis erfiður á köflum. En hann er að mannast - og mér finnst hann yndislegur með kostum sínum og göllum. Þessi misserin stundar hann nám við Háskólann í Reykjavík og stendur sig vel. Með náminu vinnur hann hjá tölvufyrirtæki í bænum.

Ég er stolt af honum eins og öllum mínum börnum - enda þekki ég það úr hestamennskunni að óstýrlátu tryppin eru yfirleitt gæðingsefni.

Athugasemdir

[Gísli Bergsveinn Ívarsson, 24.10.2007 kl. 23:44]

Alveg fór þessi dagur framhjá mér.

Til hamingju með daginn

[Ólína Kjerúlf Þorvarðardóttir, 24.10.2007 kl. 23:57]

Takk

[Marta B Helgadóttir, 25.10.2007 kl. 00:32]

Til hamingju með soninn.

[Jenný Anna Baldursdóttir, 25.10.2007 kl. 10:47]

Ég óska þér til hamingju með hvorutveggja, bæði soninn og daginn, þó seint sé.

Hvenær sjáum við þáttinn með bloggstelpunum?

[Ólína Kjerúlf Þorvarðardóttir, 25.10.2007 kl. 10:56]

Takk á ný.

Jenný, þátturinn verður á föstudag kl. 21:00. Nú krossleggjum við fingur