Nokkrir góðir dagar með BHSÍ

 Jæja, nú er orðið langt síðan maður hefur bloggað - enda brjálað að gera í sumarfríinu.  Nú sit ég hér sólbrennd og þrútin eins og steiktur tómatur, nýkomin af frábæru fjögurra daga sumarnámskeiði með Björgunarhundasveit Íslands sem haldið var á Gufuskálum 7. - 10. ágúst, að báðum dögum meðtöldum. Við fengum sól og blíðu alla dagana.

Að þessu sinni mætti ég með nýjan félaga til leiks: Skutul litla, hvolpinn minn sem ég fékk í sumar. Hann er að verða fjögurra mánaða. Þetta námskeið var mikil lífsreynsla fyrir hann og hann stóð sig með prýði. Sýndi sjálfstæði á æfingunum, fór býsna langt frá mér þótt ungur sé að árum og var í alla staði hinn efnilegasti. Datt inn á lykt strax í fyrsta rennsli og "fann" sinn mann. Það er mikið álag á ungan hvolp að meðtaka allt sem fylgir æfingum sem þessum. Samvera með öðrum hundum og ókunnugu fólki, dvöl í búri, annarleg hljóð og margt fleira er mikið áreiti. Þetta litla grey var meðal annars sett í sigbelti og híft með talíu upp undir rjáfur. Ekki lét hann sér bregða við það. Þá var hann settur upp í kyrrstæða þyrlu og fékk að skoða þar allt innanborðs. Það fannst honum spennandi. En þegar þyrlan var komin í gang og hann var teymdur í átt að henni, fannst honum nóg komið og spyrnti við fótum. Hann var að sjálfsögðu ekki neyddur um borð, enda hávaðinn þvílíkur að mér sjálfri var nóg um.

   Já, meðlimir í þyrlusveit Landhelgisgæslunnar voru okkur innan handar á þessu námskeiði. Þeir mættu á TF-Líf og kynntu fyrir okkur starf þyrlusveitarinnar. Hundarnir fengu að fara inn í þyrluna og reyndustu hundateymin voru látin síga úr henni. Við Skutull gengum að sjálfsögðu ekki svo langt - en hér sjáið þið myndir af undirbúningnum og hérna er myndband af þyrlusiginu. Við Skutull sátum álengdar og fylgdumst með af tilhlýðilegri virðingu.

      

Já þetta var í alla stað frábært námskeið. Hvað eru sólbruni og þrútnar varir á við nokkra dýrðardaga á Snæfellsnesi með skemmtilegu fólki?  

Athugasemdir

[Ásdís Sigurðardóttir, 11.8.2008 kl. 22:01]

Þetta hrefur greinilega verið bæði skemmtilegt og erfitt, gaman að hvutti litli stóð sig svona vel.  Kveðja vestur og vonandi hvílirðu þig smá núna.

[Guðrún Jónína Magnúsdóttir (IP-tala skráð) 12.8.2008 kl. 17:11]

Gaman að lesa um hann Skutul og hvað hann stóð sig vel. Ég þjáist af hundadellu en hef ekki tök á að eiga eintak. Kannski seinna. (átti einu sinni schafer tík sem hafði mjög sjálfstæðar skoðanir og poodle í 13 ár þær skildu báðar mjög margt sem við þær var sagt) Svo fór ég í algera nostalgíu þegar ég las um Bíltúrinn var þarna á ferðinni í fyrra og við hjónakornin fengum yndislegt veður. Amma mín var fædd í Auðkúluþorpinu og ólst þar upp til 8 ára aldurs, þá fór hún til Flateyrar. Síðar bjó hún í Álfadal á Ingjaldssandi. Ekkert er eins fallegt og Vestfirðir í góðu veðri.