Úrvinda og kem af fjöllum

 Jæja, ég kem af fjöllum - í orðsins fyllstu merkingu. Úrvinda eftir tæprar vikudvöl við björgunarhundaþjálfun á Steingrímsfjarðarheiði ásamt fjölda manns úr BHSÍ, og hef hvorki lesið blöð né komist á netið "allan þennan tíma."  Sem var reyndar frábært!

Veðurbarin og freknótt eins og rjúpa í vorlitum, sit ég nú og kasta mæðinni með kaffibolla í hönd og bloggsíðuna opna fyrir framan mig. Komin til byggða á ný, með þrjár frunsur og vott af millirifjagikt eftir snjómokstur og bægslagang í fannfergi og fjallshlíðum.

Annars er mesta furða hvað maður saknar lítið menningarinnar þegar maður er svona úti við og fjarri mannabyggð. Maður dettur bara einhvernvegin úr sambandi. Helsta og eina fjölmiðlaefnið sem nær til manns eru veðurfréttirnar, sem maður hlustar gaumgæfilega á að sjálfsögðu, og spekúlerar svo um við morgunverðarborðið: Hvort skafrenningnum fari nú ekki að linna, hríðinni að slota, vindinn að lægja og sólin að skína.

Annars fengum tvo fína daga. Þar fyrir utan var rysjótt veður, en það var allt í lagi - ekkert óveður svosem.

Nú kasta ég mæðinni, áður en ég blogga meira - sjáumst.

 

Athugasemdir

[Jenný Anna Baldursdóttir, 14.3.2008 kl. 12:15]

Velkomin heim af fjöllum.

[Lára Hanna Einarsdóttir, 14.3.2008 kl. 12:26]

Velkomin heim, það er gott að geta kúplað sig út úr fréttum og umstangi heimsins endrum og eins... 

[Tiger, 14.3.2008 kl. 14:29]

  Það er gott að þú ert komin í nánast heilu lagi ofan af fjöllum. Ég er svo sammála þér með að maður hreinlega dettur úr stressi og rútínu þegar maður fer í óbyggðir - og finnur bara mest lítið fyrir því í raun og veru. Vertu bara velkomin til baka og ég hlakka til að lesa fjallasögur, takk fyrir mig. 

[Ía Jóhannsdóttir, 15.3.2008 kl. 01:27]

Velkomin heim heil á húfi.  Góða og friðsama helgi  

[Guðrún Fanney Einarsdóttir, 15.3.2008 kl. 02:01]

velkomin heim;) stolt af þér að geta verið svona lengi á fjöllum, ég hefði orðið brjáluð;)