Kvöldkyrrð

  Kvöldkyrrðin er ótrúleg - gulli sleginn hafflöturinn úti fyrir eyrinni þar sem sól er að setjast ofan í Djúpið. Inni á pollinum dúra værðarlegir fuglar á skyggðum sjónum. Ekki bærist hár á höfði.

Þrátt fyrir lognið kemur mér til hugar vísan fallega eftir Trausta Á. Reykdal:

• Þýtur í stráum þeyrinn hljótt
• þagnar kliður dagsins.
• Guð er að bjóða góða nótt
• í geislum sólarlagsins.

Ég fann þessa fallegu mynd á netinu - hún er tekin á Hesteyri í þann mund sem sólin tyllir sér á hafflötinn rétt áður en hún rís á ný. Leyfi ykkur að njóta hennar með mér - Ísafjarðardjúpið skartar einmitt þessum litum núna.

Athugasemdir

[HT (IP-tala skráð) 30.6.2007 kl. 01:41]

Þessi mynd er hrikalega falleg. 

Það er eitthvað skrítið með þetta veður.  Maður kann bara ekki að haga sér þegar verður hefur verið gott svona lengi í einu á Íslandi.  Ekkert að tuða yfir.  Það er nú fokið í flest skjól fyrir Íslendingi þegar hann getur ekki þusað yfir veðrinu.  En ég ætla að vona að það haldist sem lengst.

[Georg Eiður Arnarson, 30.6.2007 kl. 15:13]

Takk fyrir myndina hef reyndar oft séð fallegar myndir úr náttúrunni enda búsettur í eyjum.

[Sævar Helgason (IP-tala skráð) 30.6.2007 kl. 23:20]

Ég er á því að myndin sé tekin í Grunnavík.  Fjallið t.v myndi þá vera Geirsfjall og ljósmyndari snýr baki í Maríuhornið.  Síðan myndi fjallið t.h vera Teista og Grænahlíð.

Lágskýjabakki er síðan yfir hluta hafsins að Grænuhlíð .

En myndi er flott. 

[Ólína Kjerúlf Þorvarðardóttir, 1.7.2007 kl. 01:46]

hmm....... ekki get ég kveðið upp úr um þetta - en nafnið á myndinni var "Hesteyri". Veit ekki meir. Hinsvegar stefni ég á að ganga frá Hesteyri í Hornstrandaferð minni síðar í júlí (þeirri fjórðu frá því ég flutti vestur - alltaf farin ný leið á hverju ári)  Og þá mun ég væntanlega geta sannreynt framkomnar kenningar um það hvað sést og hvað ekki frá sjálfri Hesteyrinni um sólarlagsbil.

[Ólína Kjerúlf Þorvarðardóttir, 1.7.2007 kl. 02:01]

Við nánari athugun þá er málið enn einfaldara: Þetta er sennilega ekki Hesteyri (þó myndin heiti það á netinu), heldur Eyrarfjallið yfir Hnífsdal vinstramegin, Grænahlíð hægra megin. þessi mynd er m.ö.o. tekin úr Arnardal (hvað sem öllum nafngiftum á netinu líður). Dæmigerð sólarlagsmynd Ísifirðinga um miðsumar.

Af hverju  myndin heitir "Hesteyri" veit ég ekki - það skiptir engu heldur.

[Gísli Bergsveinn Ívarsson, 1.7.2007 kl. 02:19]

Ekkert er betra en íslensk sumarnótt