Eigum við að fara í kröfugöngu?

  Síðustu daga hafa verið líflegar umræður hér á síðunni hjá mér um sjávarútvegsmál og ágalla fiskveiðistjórnunarkerfisins, eins og lesendur geta séð í færslunum hér á undan. Ágallar þessa kerfis verða sífellt augljósari, og atburðirnir á Flateyri einna gleggsta dæmið um það hvernig farið getur á versta veg í þessu kerfi. Skýrsla Hafró er sömuleiðis til vitnis um að kerfið hefur ekki aðeins brugðist byggðunum, heldur líka þorskinum - og þá fer nú að verða áleitin spurning til hvers sé verið að halda þessu til streitu.

Í þeim líflegu umræðum sem hér hafa orðið hefur fæðst sú hugmynd að efna til samstöðu- og kröfugöngu til stuðnings þeim sem hafa orðið fyrir barðinu á þessu kerfi -- göngu þar sem krafist er úrbóta á kvótakerfinu þannig að byggðum landsins og fiskinum í sjónum stafi ekki beinlínis hætta af því.

Í Kárahnjúkamálinu kom samtakamáttur almennings í ljós - það var hinsvegar of seint.

Það er ekki of seint að bjarga byggðum landsins: Láta stjórnmálamenn finna að þjóðin stendur með sjávarbyggðunum og fiskverkafólkinu; að fólki er orðið ljóst að við svo búið má ekki standa lengur. Það þarf að grípa til vitrænna ráðstafana - og það strax!

Því skyldum við þá ekki krefjast úrbóta á kvótakerfinu - og sýna hug okkar í verki með því að ganga saman niður aðalgötur helstu þéttbýlisstaða, og þó víðar væri.

Hvað segið þið lesendur góðir - eruð þið til? 

Nýtt kvótaár hefst þann 1. september - væri það ekki góður dagur til þess að fá sér göngutúr? Spáið í það 

Athugasemdir

[Sigurður Þórðarson, 7.6.2007 kl. 08:49]

Þú ert kraftmikil kona Ólína, ég heiti á þig að hafa forystu um þetta mál og láta ekki deigan síga.  Ég stundaði sjó frá Flateyri og rennur blóðið til skyldunnar. Mun ekki telja eftir mér að leggja báðar hendur á plóginn og spyrna.  S: 5333222, 8200625.  Líklega er  betra að gera þetta strax í sumar.

Baráttukveðja 

[Ársæll Níelsson, 7.6.2007 kl. 08:58]

Hamra járnið á meðan það er heitt. Kýla á þetta við fyrsta tækifæri.

"Í Kárahnjúkamálinu kom samtakamáttur almennings í ljós - það var hinsvegar of seint."

September gæti verið of seint fyrir okkar málstað. (A.m.k. fyrir mig þar sem ég verð þá fluttur til Danmerkur)

[Hagbarður, 7.6.2007 kl. 09:14]

Þetta er góð hugmynd Ólína! Halda útifund og skipuleggja síðan baráttuna gegn þessu óréttlæti. Stofna jafnvel samtök sem halda úti baráttunni.

[Bjarni Pálsson (IP-tala skráð) 7.6.2007 kl. 10:29]

Döh.  Hverju á eiginlega að mótmæla?  Hagræðingu í undirstöðuatvinnuvegi þjóðarinnar???  Eða á kannski að mótmæla því að EKKI sé verið að niðurgreiða starfsemi einna (Vestfirðinga) á kostnað annarra ríkisborgara?

Svo er nú lágmarkið að vera með einhverja uppbyggilega tillögu og það ætti doktorinn að vita.

[Þórunn (IP-tala skráð) 7.6.2007 kl. 12:11]

Döh. segir síðasti mælandi hér og spyr hverju eigi að mótmæla. Viljum við ekki öll halda landinu í byggð? Hann spyr hvort eigi að greiða niður starfssemi einna á kostnað annarra? Hvað á hann við? Höfum við (Vestfirðingar og aðrir landsbyggðamenn) ekki sama rétt og aðrir landssmenn? Er hann ef til vill einn þeirra sem álítur að landsbyggðin eigi að enda sem sumarbústaðaland fyrir efnamenn og aðra þá sem halda að allir eigi að flytja suður eða að Reykjavík haldi landsbyggðinni uppi? Býr ekki ein þjóð í þessu landi? Eigum við ekki að standa saman og sjá sóma okkar í þvi að viðurkenna jafnrétti allra til atvinnu og góðrar afkomu í þessu ríka landi? Ekki getum við öll flutt á suðvesturhornið.  Ég er hlynnt þessari tillögu Ólínu um um einhvers konar baráttusamtök landsbyggðarinnar og jafnvel kröfugöngu til að styðja þau. Kannski ættum við að bíða dálítið lengur eftir því hvað ,,nýja''  stjórnin gerir. Vonandi verður staðið við einhver kosningaloforðanna. Mig langar að trúa því.

[Ólína Kjerúlf Þorvarðardóttir, 7.6.2007 kl. 14:25]

Sæl öllsömul.

Ég vil sérstaklega bjóða velkomna fyrstu KONUNA sem tekur til máls í þessari lotu um fiskveiðistjórnunarkerfið - hélt um tíma að ég væri ein.

Mér er fúlasta alvara með þessa hugmynd - og ég finn ekki betur en að fleiri séu sama sinnis, ef marka má símtöl sem ég hef fengið í dag.

Það kann þó að vera að þann 1. sept. sé full seint að gera eitthvað, þannig að mér finnst vel mega athuga þetta fyrr. Hinsvegar fara sumarleyfi nú í hönd - sjálf verð ég erlendis næstu tvær vikurnar. Þá er spurningin hvort einhver annar vill taka forystuna (a.m.k. á meðan ég er í burtu). Eins gætum við leyft þessu að meltast aðeins og tekið svo upp þráðinn í lok júní. Þá er kannski komin skýrari mynd á það hvað ríkisstjórnin ætlar að gera.

Hvað segið þið? Vill einhver taka málið að sér?

[Sigurður Þórðarson, 7.6.2007 kl. 15:30]

Sæl aftur Ólína,

við Kristinn P. frá Bakkafirði getum tekið við keflinu í bili og verðum í góðu sambandi við þig.  Netfangið mitt er:  [e-mail]  (í vinnunni)  og [e-mail] (heima)

Ég hef heyrt í nokkrum í dag sem hafa verið að hugsa í þessa veru, þannig að það er greinilega mikill hljómgrunnur.

[Snorri Hansson, 7.6.2007 kl. 18:16]

Ólína,  Ólán Flateyrarbúa er að tilvera þeirra byggist á einu fyrirtæki. Fyrirtæki eiga það til að hætta störfum vegna gjaldþrots, greiðsluerfiðleika eða að eigendur vilja flytja t.d. suður. Svona er það og svona hefur það verið, löngu fyrir daga kvótakerfisins. Má ég mynna á Kísilgúrverksmiðjuna við Mývatn. Sú starfsemi dagaði uppi og eftir sátu fjöldi íbúa með nýbyggð hús og enga vinnu. Kvótakerfið er ekki fullkomið en mikið vildi ég að Vestfirðingar gætu talað um mál án þess að blanda kvótakerfinu samanvið það alltafhreint og eilíflega. Stundum eru fyrirtæki ekki rekstrar hæf. Einhver kostnaðarliður er of hár og eigendur hætta rekstri eins og vera ber. Sá kostnaðarliður getur verið flutningskostnaður, orkuverð, húsaleiga,laun starfsmanna eða leigukvóti. Eða þetta altsaman. Vandræðin á Flateyri eru alveg skelfileg og óskandi væri að einhver rekstaraðili sjái tækifæri í ódýru atvinnuhúsnæði og vinnufúsum höndum.  

[Sævar Helgason (IP-tala skráð) 7.6.2007 kl. 20:01]

það er greinilega hugur í fólkinu ,að þrýsta á okkar stjórmálamenn með sýnilegum og öflugum hætti. Það sýnist orðið alveg ljóst að þessu fiskveiðistjórnunarkerfi verður að umbreyta. Mér lýst vel á að upphafið verði á Ísafirði, höfuðstað Vestfjarðanna og að Ólína leiði baráttuna fyrir landið í heild. Mikilvægt er að fá sem flesta , öfluga og þekkta borgara , í framlínuna... og leggja með því allt það vægi sem þarf til að þjóðarvilji komi fram með sýnilegum og afgerandi hætti.

[Árni Gunnarsson, 7.6.2007 kl. 20:11]

Snorri Hansson. Þú telur þig vera að ræða af einhverri föðurlegri ábyrgð um mikið alvörumál. Þessu ættir þú að sleppa. Það er lágmarkskrafa að menn hafi þekkingu á málum sem þeir ætla að ræða af vandlætingu.

Þessar tilvitnanir í vandræði fyrirtækja s.s. Kísilgúrverksmiðjunnar er þessu máli óviðkomandi.

Málið snýst um það að fjölmörg sjávarþorp hér við land byggðust upp vegna nálægðar við fiskimiðin. Þetta urðu útgerðarþorp með tilheyrandi fjárfestingum í vinnslustöðvum og öðru sem tilheyrði. Utan um þetta byggðist síðan ýms þjónusta sem byggði afkomu sína á nýtingu þessarar auðlindar.

Þegar svo er komið vegna pólitískrar stýringar að íbúar þessara byggðarlaga þurfa að kaupa af einhverjum nýjum EIGENDUM aðgang að auðlindinni fyrir verð sem gengur einfaldlega ekki upp skapast að sjálfsögðu vandamál.

Þessum vandamálum verður ekki drepið á dreif með einhverjum aulalegu bulli eða samanburði við óskyld dæmi. Ég ráðlegg þér að reyna að skilja þetta, en hef fulla trú á að þú sért ákveðinn í að skilja það ekki.

[Sigurjón Þórðarson, 7.6.2007 kl. 21:33]

Mér líst vel á þetta hjá Ólínu og svo á hún auðvitað að lemja á sínu fólki í samstarfsflokki Sjálfstæðisflokksins.

[Hafsteinn Viðar Ásgeirsson, 7.6.2007 kl. 23:09]

Sé að þetta ætlar vel af stað, trúi ekki öðru en að það megi ná til fólks með svona mál...

[Bjarni Pálsson (IP-tala skráð) 8.6.2007 kl. 21:20]

:Döh: Auðvitað mega menn fara í kröfugöngu AF ÞVÍ BARA. EN, að blanda saman rekstri fyrirtækja í sjávarútvegi og búsetu er EKKI ástæða til að fara í kröfugöngu.

Guð hjálpar þeim sem hjálpar sér sjálfur og því segi ég að ekki eigi að eyða kröftunum í eitthvert eldhúsnöldur og niðurrif.

[Guðmundur Þór (IP-tala skráð) 11.6.2007 kl. 02:30]

Ég hef fullan hug á að verða með í MEÐMÆLGÖNGUNNI, ætlum við ekki að mæla með breytingum á fiskveiðistjórnunekerfinu ??

[Ársæll Níelsson, 13.6.2007 kl. 22:14]

Sæll Guðmundur Þór.

Gaman að sjá að MEÐMÆLAGANGAN fær stuðning  
Það er alltof mikið verið að mótmæla alltaf.