Hamagangur í öskjunni

 Það hefur verið hamagangur í öskjunni hjá mér síðasta sólarhringinn. Rassinn á mér stóð úr bókahillum og geymslum í allan gærdag þar sem ég var að sortera skjöl, henda og sameina í möppur. Þvílíkt og annað eins.

Ég held ég hafi losað einar tíu möppur og hent samsvarandi magni af gömlum pappírum. Ég er nefnilega að hætta í vinnunni og ganga frá á skrifstofunni. Og af því að starfið hefur verið m.a. kennsla og rannsóknir eru allskyns hlutir sem ég þarf að taka með mér heim - hitt og þetta sem ég hef sankað að mér, bæði skjöl og bækur. Þessu þarf ég öllu að koma fyrir á skrifstofunni heima - þar sem bóndi minn blessaður er nú þegar búinn að fylla hvern krók og kima með sínum skjölum og bókum. Þannig að ... það er margt sem þarf að skipuleggja.

Á meðan seyddust rúgbrauðin í ofninum hjá mér, stillt og rótt, óháð fyrirganginum í húsmóðurinni. Þau rýrnuðu talsvert - og voru ekki tilbúin fyrr en í morgun. En mikið lifandis ósköp eru þau samt bragðgóð. Ooohhhh, ég fékk mér eina volga sneið núna áðan með miklu smjöri.

Hér er uppskriftin:

5 bollar rúgmjöl
3 bollar heilhveiti
5 tsk matarsódi
3 tsk salt
1 1/2 lítri súrmjólk (eða ab-mjólk)
500 gr. sýróp

Öllu hrært vel saman og deiginu hellt til hálfs ofan í fjórar 1-líters mjólkurfernur sem látnar eru standa upp á endann í ofninum á neðstu rim. Sett inn í 150° heitan ofn og lækkað strax í 100°. Bakað í 8-10 klst eða lengur. Verður dökkbrúnt að utan fullbakað.

Sumir geyma brauðin í fernunum, ég tek þau úr þeim hálf volg.

Njótið vel - nú er ég að fara að baka kryddbrauð.

Athugasemdir

[Flosi Kristjánsson, 18.12.2008 kl. 13:06]

Maður má nú til með að prófa þetta við tækifæri! Fékk síðast heitt, heimabakað rúgbrauð upp úr miðri síðustu öld!

[Þorsteinn Briem, 18.12.2008 kl. 14:03]

Í rúgbrauðum þungur róður,
og raunalegur er sá ljóður,
þau Guð minn rýrna góður,
sem galinn markaðssjóður.

[Katrín, 18.12.2008 kl. 15:23]

Girnilegt:)

en hvað varð um:,, handagang í öskjunni"?'''

[Nína S (IP-tala skráð) 18.12.2008 kl. 21:53]

Líst vel á uppskriftina. Ætla að prófa hana sem fyrst. Hlakka til að fá ilmandi brauðið úr ofninum. Rúgbrauð með gammeldags íslenskri kæfu, eða osti, eða bara smjöri, jafnvel rúllupylsu. Frábær tilhugsun. En af hverju að hætta í vinnunni? Er það vegna niðurskurðar í fjárlagafrumvarpinu? Hvað tekur svo við? Gott að hafa nóg að gera við slíkar aðstæður, segi ekki annað, dreifir huganum.

[sandkassi (IP-tala skráð) 18.12.2008 kl. 22:36]

passaðu þig á smjörinu stelpa:)

[Ólína Kjerúlf Þorvarðardóttir, 19.12.2008 kl. 01:45]

,,Handagangur í öskjunni" er ennþá málsháttur Kata mín. En ég er sko að lýsa ALVÖRU hamagangi - var jafnvel að hugsa um að kalla það "hamagang í öskunni" af því ég hélt að rúgbrauðið myndi brenna við.  En það gerðist nú ekki sem betur fer - og útúrsnúningurinn nær því ekki lengra en þetta.

En nú er ég orðin kúguppgefin af þessum skjalatiltektum - klukkan að verða tvö um nótt, og ég farin að sofa.