Óstarfhæf borgarstjórn.

 Það er stjórnarkreppa í Reykjavíkurborg. Sjálfstæðisflokkurinn ekki stjórntækur. Oddviti hans, rúinn trausti, streitist við að sitja sem fastast, þrjóskur eins og skólastrákur, eftir að hafa orðið uppvís að ósannindum og blekkingum, ítrekað - að ekki sé nú minnst á umboðsleysi hans við stórar ákvarðanir.

Borgarfulltrúar hins svonefnda Tjarnarkvartetts hafa svarist í fóstbræðralag, og lýst því yfir að þeir muni ekki starfa með Sjálfstæðisflokknum eftir allt sem á undan er gengið. Núverandi meirihlutasamstarfi veltur á einum einasta borgarfulltrúi sem hefur ekki einu sinni næstu menn á lista til stuðnings við sig, og má ekki fá kvef, þá er kominn nýr meirihluti! Sá fjórði á þessu kjörtímabili.

Það er aðeins eitt orð yfir ástandið: Stjórnarkreppa. Borgarstjórn Reykjavíkur er ekki starfhæf eins og á stendur.

Alþingi Íslendinga ætti að sjá sóma sinn í því að höggva á þennan hnút og setja bráðabirgðalög sem heimila nýjar kosningar í Reykjavík. Fyrir því er fordæmi frá árinu 1934 þegar bæjarstjórn Ísafjarðar var óstarfhæf.

Þeir borgarfulltrúar sem sitja í núverandi meirihluta verða einfaldlega að endurnýja umboð sitt. Það er ekkert annað í stöðunni. Það hlýtur hver heilvita maður að sjá.

Athugasemdir

[Heimir Lárusson Fjeldsted, 11.2.2008 kl. 15:50]

Þetta verður allt í lagi Ólína þegar þið utanbæjarfólkið hættið að skipta ykkur af innri málefnum okkar Reykvíkinga ;-)

[Ólína Kjerúlf Þorvarðardóttir, 11.2.2008 kl. 15:57]

Ekkert svona Heimir - ég er Reykvíkingur eins og þú veist vel, og held þar mitt annað heimili. Mér kemur þetta við. Raunar kemur öllum landsmönnum þetta við, Reykjavík er höfuðborg landsins. Hegðun stjórnmálamanna er ekki þeirra einkamál og hefur áhrif langt út fyrir héraðsmörk.

[Heidi Strand, 11.2.2008 kl. 15:58]

Það er engin leið að hætta

[Guðrún Magnea Helgadóttir, 11.2.2008 kl. 16:06]

Rétt Ólína. Öllum landsmönnum kemur stjórn Reykjavíkurborgar við...Þetta er höfuðborg landsins alls..Ég horfði á Vilhjálm á blaðamannafundi, ströglast við að sitja áftam í borgarstjórninni...Rúinn öllu trausti borgarbúa og samflokksaðila...Hanna Birna og Gísli Marteinn flýðu af vettvangi fyrir fundinn...Það segir sitt um samstöðu meðal sjálfstæðismanna.

[Tiger, 11.2.2008 kl. 16:17]

Ég er sammála því að kreppan í borginni er orðin mjög undarleg. Oddviti sjálfstæðismanna í borginni er hættur að vera þrjóskur - þrjóska hans er hætt og heimska hans er tekin við.

Hann ætlar sér(sennilega að ráði Landspabba) að sitja af sér orrahríðina með von um að borgarbúar og landsmenn allir verði búnir að gleyma þessum hamagangi og að hann geti bara með góðu móti og engum mótmælum - sest í borgarstjórastólinn að ári liðnu. Oddviti Sjálfstæðismanna - sem og líklega sjálfstæðismenn allir - vona að Gullfiska minni okkar verði búið að gleypa allt sem nú er búið að ganga á.

Málið er líka athyglivert ef maður spáir í það að það virðist enginn raunverulega þora að taka af skarið - stíga niður fæti og segja nú er nóg komið. Allir borgarfulltrúar í núverandi meirihluta eru hræddir um sitt sæti og sitt fylgi og þora ekki að standa upp og mótmæla. Þessi Mýflugnasveimur hérna mun halda áfram að ota og pota sínum tota í blóðugan borgarbúann og stinga hann án eftirmála.

[Gísli Baldvinsson (IP-tala skráð) 11.2.2008 kl. 17:01]

Það hefði kannski átt að banna öðrum en akureyringum að tjá sig um Lúkasarmálið. Þetta er stóra axlarmálið, eða ekki stóra axlarmálið. Er ekki 112 dagurinn í dag? Sami fjöldi daga og klúðrið byrjaði?

[Jóhann P (IP-tala skráð) 11.2.2008 kl. 17:28]

Það er ekki stjórnarkreppa ef það er meirihluti við völd. Ef að það væri ekki hægt að mynda meirihluta vegna þess að það væru ekki til 8 borgarfulltrúar sem að vildu vinna saman, þá væri hægt að tala um stjórnarkreppu.

Það eru engin fordæmi fyrir því að Alþingi hafi bein afskipti af sveitarstjórnarmálum og satt best að segja litist mér illa á að Alþingi færi að gera það. Þá fara sveitarstjórnarmenn að biðla til Alþingis um íhlutun. Þá gætu flokkar eða sveitarstjórnarmenn sagt einfaldlega nei við samstarfi í þeirri trú að Alþingi blandist í málið. Það gæfi litlum flokkum ennþá meiri völd en nú er. Er ekki einmitt kvartað yfir því að litlir flokkar, flokkar sem að hafa einn mann hafi of mikil völd. Með svona íhlutun yrðu völd þeirra meiri.

[Þórður Runólfsson (IP-tala skráð) 11.2.2008 kl. 19:25]

Spurningin er:

Hvernig lendi Villi í þessu?

Hann skilur það ekki!!

Skiljið þið það?

[Ólína Kjerúlf Þorvarðardóttir, 11.2.2008 kl. 19:27]

Jóhann, það eru VÍST fordæmi fyrir því að Alþingi setji lög vegna stjórnarkreppu í sveitarstjórn. Það gerðist á Ísafirði árið 1934.

[J. Trausti Magnússon, 11.2.2008 kl. 21:40]

Hvað mundi svo sem breytast ef það yrðu kosningar í borginni. Villi gæfi ekki kost á sér en hinir sex sennilega allir. Dagur yrði áfram með Björk Vilhelms og Oddnýju Sturludóttur og næðu sennilega inn þeim fjórða.  Svandís Svavars næði kannski að draga einn með sér. Svo héngi Ólafur F inni. Sjálfstæðisflokkurinn fengi 34 - 36% Samfylking 30 - 34% VG 12 - 14% Ólafur F 8% og Framsókn þurrkaðist út. Breytingin, jú Samfylkingin fengi sennilega einum manni meira en hún hefði í dag og það á kostnað Framsóknar. Það mundi akkúrat ekki breyta neinu fyrir kjósendur og aðra landsmenn.

[Guðrún Fririksd (IP-tala skráð) 11.2.2008 kl. 21:41]

Það er alveg furðuleg hvað það er hægt að sparka oft í Villa Vill sérstaklega fólk á vinstri vægnum.Maðurinn er marg búinn að biðjast afsökunar á sínum mistökum sem engin skaðaðist á og ekkert fjárhagstap varð,en þá er samt sparkað í manninn aftur og aftur.Nú ef hann vill sitja áfram þá hann um það,og reynir að vinna sína vinnu ef hann fær frið til þess vegna sparka frá fólki sem getur ekki fyrir sitt litla líf tekið við afsökunarbeiðniEr nú ekki að mál linni og við horfum fram á við,og sjáum bara hvað setur sama hvar við búum á landinu.

[Gísli Baldvinsson (IP-tala skráð) 11.2.2008 kl. 22:45]

Mér sýnist að stjórnarskráin í dag hamli að almenn lög verði sett. Þá er ekki hægt að setja bráðabirgðalög á meðan þing situr og reyndar orðið ansi erfitt að setja slík lög. En stjórnskipun er sett með stjórnarskrá...sýnist mér. Persónulega vonast ég til að þessi "meirihluti" sitji til vors 2010 enda ekki annað að skilja á borgarstjóra.

[Magnús Paul Korntop, 11.2.2008 kl. 22:58]

Það er kominn tími á að Vilhjálmur axli ábyrggð á gerðum sínum og segi af sér,ef þetta væri í Þýskalandi eða Bretlandi þá væri búið að láta hann segja af sér.

Maðurinn er rúinn trausti frá A-Ö og hinir í borgarstjórnarflokknum treysta honum ekki með nokkru móti enda flýðu þau í burtu eins og hýenur rétt áður en þessi "blaðamannafundur"byrjaði.

Gefa á sjálfstæðisflokknum langt og gott frí frá völdum enda búinn að vera með þau OF LENGI.

Góður pistill Ólína.

[Ásdís Sigurðardóttir, 11.2.2008 kl. 23:21]

Góður pistill.  Þetta er mestmegnis innlitskvitt var að lesa þína skoðun er sammála að mestu.

[Magnús Geir Guðmundsson, 12.2.2008 kl. 00:06]

Já, ef menn létu skynsemina ráða, stæðu menn upp og bæðu um endurnýjað umboð,en slík virðing fyrir kjósendum sýnist mér nú ekki vera fyrir hendi!

Áfram skal leikin farsinn "Sirkús Reykjavík" og helst svo lengi sem "Fló á skinni" forðum daga!(sem L.A. er einmitt að taka til sýninga um næstu helgi held ég, skemmtileg tilviljun!?)

En mín ágæta, þetta datt út úr mér í dag og leyfi ég því að fylgja hér með.

(Í tilefni þess að Vilhjálmur sagðist nú hafa axlað ábyrgð)

Haldlítil hljóma þín rök,

heldur já finnst mér þau slök.

Og eigi vel valin,

verður þú talin

Dómari í sjálfs þíns sök!

[Jenný Anna Baldursdóttir, 12.2.2008 kl. 00:06]

En Ólína,þa' gerist ekkert, Davíð segir Villi situr og þá situr Villi.

[Emil Hannes Valgeirsson, 12.2.2008 kl. 00:12]

Hann má þó eiga það hann Vilhjálmur að hann er betri í því að tala af sér heldur en að segja af sér.

[Ólína Kjerúlf Þorvarðardóttir, 12.2.2008 kl. 09:34]

Sæl öll og takk fyrir skoðanaskiptin.

Guðrún, þú segir að það sé verið að sparka í Villa, sem sé ljótt af því hann hafi beðist afsökunar. Þú fyrirgefur en þetta finnst mér vera meðvirkni. Villi hefur vissulega beðist afsökunar, og svo bætir hann um betur og segir eitthvað sem rýr hann trausti á ný, t.d. ósannindi. Það er farsinn ... og þetta er búið að mola niður það álit sem maðurinn hafði.

J.Trausti reiknar út hér fyrir ofan hvað borgarfulltrúar myndu fá af atkvæðum ef kosið yrði aftur. Í raun skiptir það engu máli. Aðalatriðið er að þeir sem nú eru rúnir trausti og vilja sitja áfram geri það þá með nýju umboði (sem ég efast reyndar um að VIlli myndi fá) - en það er eina sanna leiðin til þess að kanna hug kjósenda í borginni og hverjum þeir treysta til verka.

Magnús Geir: Góð limra.

Villi er svo sannarlega betri í að tala af sér en segja af sér. Vel að orði komist Emil.

[joihn (IP-tala skráð) 12.2.2008 kl. 10:16]

Stjórnarkreppa ! Já það kann að vera. En það var líka stjórnarkreppa í þessa þrjá mánuði undir stjórn þessa dæmalausa Dags B. Eggertssonar sem talar og talar en framkvæmir aldrei neitt. Það litla sem var gert á þessum tíma var framkvæmt undir forystu Svandísar. Það er líka alveg klárt að ef þessi meirhluti springur þá verður Svandís næsti borgastjóri - ekki Dagur.

[Bjarni Kjartansson, 12.2.2008 kl. 11:02]

Síðan D-listinn hafði hreinan meirihluta til að stjórna borginni, já og öðrum stöðum líka, hefur allt farið á verri veg. 

Kratar, kommar, Rauðsokkur og annar ó.rifnaður vaðið uppi með allskonar tilbrygði af ,,meirihlutum" allt frá Selfossi og að borgarhliðunum.  Allt í tómu tjóni, úgjöld nánast stjórnlaus, glundroði á öllu og nú síðast eru vinstra liðið farið að kvarta undan gundroða, vegna þess, að þau fá ekki að taka þátt í honum, sem sagt --utan valda.--gott á ykkur.

 Hættið þið svo að röfla, öll heimsins vandræði eru nánast beint frá ykkur komin. 

Villi er bara fórnarlamb aðstæðna, hvar vinstra liðið keypti Binga til fylgilags við sig og véluðu af honum stólinn.

Svo varð liðið gersamlega spinnigal, þegar Villi felldi þau á þeirra eigin meðulum og fékk lækinn til að vera memm.

Magga flokkaflakkari, flakkaði lengra til vinstri og er svo langt gengin, að hún finnur hvergi glætu í þeirri vinstrivilluþoku sem hún nú berst í .

Miðbæjaríhaldið

Ætíð í stuði

[Sævar Helgason, 12.2.2008 kl. 11:15]

Bakþankar Fréttablaðsins þ.12.02 fjalla um málið:

Þar er vitnað til staðfastar skoðunar Vilhjálms Þ. ,þar sem hann fjallar um mál Þórólfs Árnasonar  fv. borgarstjóra í tengslum við olíusamráðsmálið og segir :

,Það er mjög alvarlegt mál þegar stjórnmálamenn segja ekki satt og rétt frá. Ég get einfaldlega sagt það að ef ég væri staðinn að svona löguðu þá myndi ég segja af mér. Hann verður hins vegar að gera þetta þetta sjálfur upp við sína samvisku.”

Þannig að Vilhjálmi er alveg ljóst hvað honum beri að gera .. eða hvað ?

[Einar Jón, 12.2.2008 kl. 12:09]

Alþingi Íslendinga ætti að sjá sóma sinn í því að höggva á þennan hnút og setja bráðabirgðalög 

Það er óþarfi fyrir alþingi að setja lög - þau eru til

26. gr. Sveitarstjórn óstarfhæf vegna neyðarástands.
Nú verður sveitarstjórn óstarfhæf tímabundið vegna neyðarástands í sveitarfélaginu, svo sem af völdum náttúruhamfara, og getur þá ráðuneytið að beiðni sveitarstjórnarinnar falið sveitarstjórn nágrannasveitarfélags að fara með stjórn sveitarfélagsins uns sveitarstjórnin verður starfhæf á ný.

Eru ekki allir að tala um hvað það er gott að búa í Kópavogi?

[Sigrún Jónsdóttir, 12.2.2008 kl. 14:33]

Ég held ég gæti ekki tekið þátt í borgarstjórnarkosningum í dag, þótt boðið yrði upp á það!  Er orðin leið á þessum flokkakosningum og myndi vilja kjósa um "menn" á þeirra eigin forsemdum.  En kannski mun mitt gullfiskaminni, sjá til þess að ég get valið "flokk" í næstu sveitarstjórnarkosningum eftir 2 ár eða svo!

Alltaf góðir pistlar hjá þér Ólína. 

[Edda Agnarsdóttir, 12.2.2008 kl. 14:39]

Sammála þér Ólína.

[Kolbrún Baldursdóttir, 12.2.2008 kl. 21:30]

Vilhjálmur þarf að finna það hjá sjálfum sér hvað hann vill gera.

Hann áfram ætlar að þola við,
ákveðinn segist ei víkja.
Með Sjálfstæðisflokkinn, það einvalalið,
þau hann seint munu svíkja.
(KB)

Gefum honum og öllu þessu nú smá tíma og sjáum hvernig mál þróast. 

[J. Trausti Magnússon, 12.2.2008 kl. 22:11]

Ég bendi öllum sem eru miklir áhugamenn um hvað Samfylkingin er æðislegur flokkur á síðustu færslu mína.

[Ía Jóhannsdóttir, 13.2.2008 kl. 02:01]

Gæti ekki verið meira sammála, en það bara gerist ekkert nema að þeir skipta um kónga í hásætinu þjóðinni til ama! 

[Magnús Bjarnason (IP-tala skráð) 13.2.2008 kl. 11:11]

En gleyma menn ekki síðasta trompi Sjálfstæðismanna í Reykjavík Gunnari L. Birgissyni! Því 26 grein Sveitarstjórnarlaga frá 1998 er eftirfarandi:

26. gr. Sveitarstjórn óstarfhæf vegna neyðarástands.
Nú verður sveitarstjórn óstarfhæf tímabundið vegna neyðarástands í sveitarfélaginu, svo sem af völdum náttúruhamfara, og getur þá ráðuneytið að beiðni sveitarstjórnarinnar falið sveitarstjórn nágrannasveitarfélags að fara með stjórn sveitarfélagsins uns sveitarstjórnin verður starfhæf á ný.

Gætti þá ekki aftur orðið jafn gott að búa í Reykjavík og í Kópavogi?

[Theódór Norðkvist, 13.2.2008 kl. 13:27]

Borgarstjórn er óstarfhæf vegna náttúruhamfara af manna völdum.