Sólrisa í snjómuggu

 

 Í dag, 25. janúar, er hinn formlegi sólrisudagur okkar Ísfirðinga.     Ekki sjáum við þó til sólar í dag, snjómugga í lofti  og sjálfsagt skýjaður himinn. Síðustu daga höfum við þó séð sólinskin á fjallatoppum, og næst þegar sér til sólar mun hún gægjast yfir fjallsbrún. Þá munu geislar hennar ná alla leið niður á eyri - gylla húsþökin - og verma hjartað

 

Sól, þér helgum sigurlag

og syngjum lof af hjarta.

Þú breytir hríðar dimmu í dag

uns dægrin litum skarta.

Já, þiggðu okkar þakkarbrag

þokkagyðjan bjarta.

 

Þegar vetrar drunginn dvín

og dregur hægt að vori,

Þorri hörfar heim til sín

hrímþungur í spori,

þú feimin yfir fjallsbrún skín

og fyllir brjóstið þori.

 

Með blíðu kyssir klakatár

af klettsins hrjúfa vanga,

græðir viðkvæm svarðar sár

og sefar kulið stranga.

Þú vekur drauma, vonir, þrár

af vetrarsvefninum langa.

 

Sól, þér ómar ísfirsk þökk

upp af mjallar hjúpi

og í fuglsins kvaki klökk

kveðin fjalls af gnúpi:

Sigurbragur - söngva þökk

sungin úr bláu Djúpi.

 

Í dag á Hjörvar, yngsti drengurinn minn, afmæli  hann er fjórtán ára.

Á slíkum degi er við hæfi að fara með lofgjörð til sólarinnar. Þessi óður var ortur í tilefni af 70 ára afmæli Sunnukórsins fyrir fjórum árum.

Jónas Tómasson samdi fagurt lag við þennan texta af sama tilefni - en lagið er svo krefjandi fyrir söngraddir að kórinn  hefur aðeins flutt það tvisvar sinnum, svo ég muni.

Athugasemdir

[Ía Jóhannsdóttir, 25.1.2008 kl. 16:31]

Fallegt ljóð Ólína og til hamingju með táninginn þinn. Hér sást til sólar líka í dag eftir langa gráa daga janúarmánaðar.  Þarf ekki mikið meira en einn lítinn geisla til að gera daginn fallegan. Góða helgi.

[Erla Rún. (IP-tala skráð) 25.1.2008 kl. 20:49]

Sæl Ollý mín!

Óskaðu honum Hjörvari innilega til hamingju með afmælið frá okkur Dodda.

Hugsaðu þér, þegar við Doddi kynntumst var Hjörvar 5 ára  Þetta er fljótt að líða - og nú er litla barnið þitt bara orðið unglingur.

Bestu kveðjur úr kafaldsbyl á Álftanesinu,

Erla Rún.

[Ásdís Sigurðardóttir, 25.1.2008 kl. 21:42]

Það skein líka sól hér í dag, með hléum þó. Nú er rok og skafrenningur, gott að vera inni. Til hamingju með drenginn og sólardaginn ykkar.      

[Hallgrímur Óli Helgason, 25.1.2008 kl. 21:55]

Til hamingju með strákinn