Ingibjörg Sólrún og hennar framlag

Alþjóðlegur baráttudagur kvenna var í gær. Dagurinn færði íslenskum konum góða uppskeru í prófkjörum helgarinnar. Það skyggði þó á gleðina að þann sama dag ákvað einn atkvæðamesti kvenskörungur í íslenskum stjórnmálum, Ingibjörg Sólrún Gísladóttir, að kveðja þann vettvang um óákveðinn tíma.

Fáir stjórnmálamenn - ef nokkur - hafa lagt meira af mörkum til íslenskrar kvennabaráttu en Ingibjörg Sólrún Gísladóttir. Fyrir það verðskuldar hún þakklæti kvenna um land allt. Sem borgarstjóri kom hún miklum umbótum til leiðar í stjórnkerfi borgarinnar. Þær breytingar leiddu til nútímalegri stjórnsýslu með minni launamun milli kynjanna svo dæmi sé tekið. Hún leiddi málefni barnafólks í borginni til mun betri vegar með leikskólabyltingunni sem svo hefur verið nefnd og einsetningu skólanna.

Sem stjórnmálaforingi hefur Ingibjörg Sólrún sýnt fádæma dugnað og fórnfýsi.

Fyrr í dag samþykkti stjórn Kvennahreyfingar Samfylkingarinnar ályktun þar sem Ingibjörgu Sólrúnu er þakkað hennar merka framlag til íslenskra stjórnmála og samfélagsumbóta.

Hún er vel að þeim þökkum komin.

 

Athugasemdir

[Jóhannes Guðnason, 9.3.2009 kl. 21:58]

Sammála þér Ólína mín,Ingibjörg á sér engan líka,hennar verður sárt saknað,líka af körlum,en heilsan er no.1.Hún á eftir að koma aftur,þú Ólína mín tekur bara við,til hamingju með prófkjörið fyrir vestan,bið að heilsa Sigga.

                                                                                            Jóhannes.G

[Hilmar Gunnlaugsson, 9.3.2009 kl. 22:07]

Þakka þér fyrir þennan frábæra pistil Ólína. Ingibjargar verður sárt saknað og óska ég henni skjótum bata og vona að hún láti aftur taka til sín í stjórnmálum.

[Eggert Hjelm Herbertsson, 10.3.2009 kl. 17:39]

Sammála hverju orði sem þú skrifar hér. Ingibjörg Sólrún er afburðarmanneskja sama hvernig á það er litið. Við óskum henni skjóts bata og vonandi sjáum við hana aftur í stjórnmálunum fljótlega.