Horn skella á nösum - og hnútur fljúga um borð

 Sorglegt er að sjá hvernig komið er fyrir stjórnarháttum í höfuðborg landsins. Framsóknarmenn eru að hugsa um að ganga til meirihlutasamstarfs við Sjálfstæðisflokkinn. Guðni Ágústsson segir flokkinn reiðubúinn að "axla ábyrgð" eins og hann orðar það. Fréttir herma að framsókn setji skilyrði um að Ólafi F. Magnússyni verði ýtt út - Sjálfstæðismenn eru að hugsa málið.

Ég spái því að þetta verði niðurstaðan, enda er ekki á nokkurn mann treystandi í þessum herbúðum eins og sakir standa og dæmin sanna. Yfirstandandi fundahöld Hönnu Birnu og Ólafs F í Ráðhúsinu í dag eru trúlega bara dauðateygjur þessa meirihlutasamstarfs. Sagan sýnir okkur að borgarfulltrúar Sjálfstæðisflokksins svífast einskis þegar svo ber undir - enda virðist borgarstjórnarflokkur Sjálfstæðismanna gjörsamlega heillum horfinn. Þar er ástandið eins og hjá Goðmundi á Glæsivöllum í frægu kvæði eftir Grím Thomsen ...

 ... trúðar og leikarar leika þar um völl,
en lítt er af setningi slegið.

 Og eins og í því ágæta kvæði er allt "kátt og dátt" á yfirborðinu ...

... en bróðernið er flátt mjög og gamanið er grátt
í góðsemi vegur þar hver annan.

 Nú sannast það sem sagt var þegar grafið var undan 100 daga meirihlutanum: Borgarstjórn Reykjavíkur er óstarfhæf.  Þarna er engum að treysta - samningar og handsöl eru einskis virði - allt er falt fyrir völd og áhrif. Upplausnin er algjör. Undirferlið sömuleiðis og uppdráttarsýkin.

Horn skella á nösum
og hnútur fljúga um borð,
hógvær fylgja orð;
en þegar brotna hausar og blóðið litar storð,
brosir þá Goðmundur kóngur.

Já, þetta er Reykjavík í dag. Svei.

Athugasemdir

[Jenný Anna Baldursdóttir, 13.8.2008 kl. 18:08]

Var ekki 100-daga meirihlutinn búinn að gera með sér samkomulag að fara ekki í að redda eða valda íhaldið?

Það er eins og mig minni það.

Það þarf lyndiseinkunn refs til að skilja þessa tegund af póltík.

[Ólína Kjerúlf Þorvarðardóttir, 13.8.2008 kl. 23:12]

Mikið rétt Jenný. Menn töluðu fjálglega um samstöðu milli flokkanna þriggja, eftir valdatöku Sjálfstæðisflokksins og Ólafs F. Var ekki annað að skilja en nú yrði einn fyrir alla og allir fyrir einn.

En Framsóknarflokkurinn er nú einu sinni með þeim ósköpum að missa ráð og rænu alltaf þegar boðið er að kjötkötlunum, hvað svo sem á undan er gengið. Þetta er ótrúleg framkoma. Og ódrengileg.

[Lára Hanna Einarsdóttir, 13.8.2008 kl. 23:26]

Einu sinni, endur fyrir löngu, var Framsóknarflokkurinn kallaður "pólitísk mella" í mín eyru. Lá undir hverjum sem var fyrir greiðslu, lesist peninga og völd. Dónalegt? Kannski. Satt? ........

[Ásdís Sigurðardóttir, 14.8.2008 kl. 01:44]

Vonandi færðu vinnuna sem þú sóttir um, þú værir frábær í starfið      

[Hildur Helga Sigurðardóttir, 14.8.2008 kl. 02:19]

Já, Ólína;  Heldur orðaði Grímur Th. þetta nú betur en þeir sem í dag tala um "...að axla ábyrgð" og "...hagsmuni borgarbúa".   Þessir blessaðir hagsmunir fara nú bráðum að vega nokkuð þungt á öxlum borgarbúa -og annarra landsmanna, ef svo heldur fram sem horfir.