Á fullu tungli

 Tungl er fullt í kvöld. Á fullu tungli er lífið löðrandi af magni og orku. Hundar verða órólegir, úlfar senda sín langdregnu væl út í nóttina - töfrasteinarnir og snjókristallar glitra í náttmyrkrinu. Fjöllin verða björt og hafið slegið silfurdregli.

Á fullu tungli fæðast börnin flest, elskendur finna lífsorku og ástríður ólmast í brjóstinu. Fullt tungl er tími fullkomnunar - samruna - fyllingar. Samningar eru undirritaðir, áföngum fagnað. Séu erfiðleikar í lífi fólks munu þeir trúlega ná hámarki á fullu tungli - sé lausn vandamáls í sjónmáli eða undirbúningi mun hún ná fram að ganga á fullu tungli.  

 

Í þrjá daga njótum við þessarar fyllingar - svo tekur tungl að myrkvast á ný. Þá dregur smámsaman úr framkvæmdagleði og atorku, kúfurinn minnkar og magn þess sem á undan er gengið sömuleiðis.

Nú er tími til að hreinsa skrifborðið, þvo þvottinn, taka til í herberginu, rífast og sættast, elskast.

Það er dásamlegt að vera til á fullu tungli. Njótum þess að horfa upp í himininn og anda að okkur birtu þessarar náttsólar - leyfa silfurgeislum hennar að streyma um æðarnar og fylla brjóstið. Þó ekki sé nema eitt augnablik. Það er þess virði.

Athugasemdir

[Ásdís Sigurðardóttir, 19.2.2008 kl. 22:55]

Var einmitt að stara á tunglið áðan, vona svo sannarlega að það verði bjart aðra nótt, ætla að stilla á mig klukku og kíkja út um 3 leytið.  GN.

[Sigurður Þór Guðjónsson, 19.2.2008 kl. 23:08]

Maður verður nú bara hálf tunglsjúkur af þessari mergjuðu lýsingu og fer að spangóla upp í tunglið. 

[Tiger, 20.2.2008 kl. 04:20]

Þetta var falleg færsla. Segi það sama og Sigurður - lá við að maður missti sig í smá spangól. Minn tími á tunglið var fyrr í kvöld er ég var stopp á rauðu ljósi í engri umferð á heimleið.

Óendanlega fallegt tunglið dróg mig að sér þannig að ég missti af þegar mín ljós komu og beið ég því bara tunglheillaður eftir þeim næstu - pollrólegur en töfraður. Galdrakvenndi í minni ætt eru margar og nokkrir seiðkarlar líka - en því miður hef ég ekkert af þeirra töfraljóma - nema kannski fölskvalausa stríðnina sem mér er svo samvaxin. Takk fyrir fallegan texta sem mun veita huga manns nógan eldivið er svefninn svífur á.

  

[Valdimar Samúelsson, 20.2.2008 kl. 11:42]

Fann að það var einkvað. Einhver meiri innri kraftur hefir verið viðvarandi núna. Kannski er það tunglið. Þetta er þá tími hugskeyta en þau draga lengst þegar það er fullt tungl. Já heimsálfa á milli. Þetta er satt.

[Ásthildur Cesil Þórðardóttir, 20.2.2008 kl. 21:17]

Flott færsla hjá þér Ólína, mystisk í samræmi við tilefnið.  Mér sýndist líka óvenju hásjávað í kvöld. 

[Steinunn Helga Sigurðardóttir, 20.2.2008 kl. 22:13]

þegar fullt túngl er þá opnast straumar frá Alheiminum sem gefa nýjar hugmyndir og ef á þarf að halda hjálp til sjálfshjálp !

Bless inn í kvöldið !

steina

[Hlynur Jón Michelsen, 21.2.2008 kl. 00:51]

Það var fullt tungl hjá Össuri Skarpa í gær...

[Þórarinn Þ Gíslason (IP-tala skráð) 21.2.2008 kl. 04:42]

Sæl Ólína.

já,sérstök færsla.