Lítill fugl í vanda

 Maríuerlan í garðinum mínum komst í hann krappan í morgun. Þegar mér varð litið út um eldhúsgluggann sá ég hvar hún var komin inn fyrir öryggisnetið í trampólíninu í næsta garði. Þarna flögraði hún ráðvillt um fyrir innan netið og lengi vel leit út fyrir að hún fyndi enga leið úr prísundinni. 

Ég fylgdist með henni góða stund og furðaði mig á hátterni hennar, því í rauninni átti hún greiða leið í frelsið.

Hvað eftir annað tókst henni - þó með erfiðismunum væri - að fljúga upp á bandið sem hélt netinu uppi. Þaðan hefði hún auðveldlega getað flogið út í garðinn. En ... nei, hún var svo örvingluð orðin að aftur og aftur hoppaði hún niður röngu megin við netið, föst í sínu sjálfskipaða fangelsi, og þar upphófst sama baksið á ný.

Ég var að því komin að hlaupa út til að blanda mér í þetta þegar hún skyndilega rambaði fram á litla rifu á netinu niðri við dýnuna. Og án þess að hún eiginlega stjórnaði því sjálf, þá stóð hún allt í einu í þessu litla gati, og viti menn ... hún hoppað út í grasið, frjáls úr prísundinni.

Ekki veit ég hvernig á því stóð, en þar sem ég virti fyrir mér atganginn innan við netið, varð mér hugsað til stöðu okkar Íslendinga í samfélagi þjóðanna þessa dagana.

Og nú læt ég lesendum eftir að leggja út af sögunni.

Athugasemdir

[Ragna Birgisdóttir (IP-tala skráð) 29.7.2009 kl. 19:46]

Það eru alltaf leiðir til ef að vel er að gáð og skynsemin  látin ráða.Góða helgi til þín og fjölskyldu þinnar Ólína mín.

[Ásdís Sigurðardóttir, 29.7.2009 kl. 20:50]

Skemmtileg saga og samlíkingin við þjóð okkar ekki fjarri lagi.

[Ía Jóhannsdóttir, 30.7.2009 kl. 00:23]

Þjóð sem losar sig úr fjötrum á endanum.  Tekur bara dálítinn tíma.

[Byltingarforinginn, 30.7.2009 kl. 00:31]

Hlóstu ekki bara að henni?

[Páll Blöndal, 30.7.2009 kl. 17:53]

Ágætis innlegg hjá þér Ólína,
en eru alþingismenn bara dúlla sér úti í móum á meðan AGS
er í þann mund að drekkja okkur?

[Ólína Kjerúlf Þorvarðardóttir, 30.7.2009 kl. 19:56]

If you only knew ...