Allir í hundana !

 Nú er mikið um að vera hjá okkur í Vestfjarðadeild Björgunarhundasveitar Íslands. Við erum að undirbúa viku vetrarnámskeið BHSÍ í næstu viku. Jamm - mannskapurinn ætlar að koma með hundana hingað norður í Ísafjarðardjúp, halda til í Reykjanesi og æfa snjóflóðaleit á Steingrímsfjarðarheiðinni. Þarna verða um tuttugu hundar ásamt eigendum sínum og aðstoðarfólki víðsvegar að af landinu við þjálfun og æfingar á heiðinni, samtals eitthvað á fjórða tug manna.

 

Já, það verður sko líf og fjör á Steingrímsfjarðarheiðinni 8. - 14. mars: Hundar og menn á ferð og flugi, bílar, vélsleðar, snjótroðarar, surg í talstöðvum og sannkölluð björgunarsveita stemning .

 

Vetrarnámskeiðið er árviss viðburður í starfi BHSÍ sem er deild í Slysavarnarfélaginu Landsbjörgu. Markmið þess er að þjálfa og taka út björgunarhunda í snjóflóðaleit og björgun við vetraraðstæður. Hundarnir eru  æfðir og prófaðir í svokölluð A, B og C- próf. A og B próf eru vottun um að hundur sé tækur á útkallslista, C-próf er vottun um að hundur sé hæfur sem björgunarhundur og tækur til þjálfunar fyrir B-próf.

   Af Vestfjörðum verða níu leitarteymi við æfingar á námskeiðinu, sex frá Ísafirði, tvö frá Patreksfirði og eitt úr Bolungarvík. Ísfirsku teymin eru meðlimir í Björgunarfélagi Ísafjarðar og fá þaðan aðstoð við þjálfunina. Teymin á Patreksfirði eru meðlimir í björgunarsveitinni Blakki á Patreksfirði.  Ísfirsku hundarnir hafa allir lokið undirbúningsþjálfun og því er stefnt á B-próf fyrir þá flesta á þessu námskeiði.

Nú er að krossleggja fingur og vona að veðrið verði okkur hagstætt - hundarnir í góðu formi og svona. Hér koma nokkra myndir frá fyrri námskeiðum.

Athugasemdir

[Gísli Bergsveinn Ívarsson, 28.2.2008 kl. 23:12]

Þetta er áhugavert og þarft starf.

[Kristín Helga (IP-tala skráð) 29.2.2008 kl. 10:44]

Þið eigið heiður skilið fyrir ykkar ötula og fórnfúsa starf. Það er mikið verk að þjálfa hund, veit ég. Þessi þjálfun er tímafrek og ekki sú auðveldasta.

Gangi ykkur vel.

[Tiger, 29.2.2008 kl. 14:13]

 Liðsfólk Björgunarsveitanna á Landsvísu eru stórkostlegar og eiga mikinn heiður skilið fyrir það mikla og áhættusama starf sem það leggur af hendi okkur landsmönnum til lífs. Ég styrki ætíð starf þeirra og hvet alla landsmenn til að leggja Björgunarsveitum landsins lið með öllum tiltækum ráðum. Ég tek sannarlega ofan fyrir ykkar fórnarlund okkur til handa!

[Bjarni Kjartansson, 29.2.2008 kl. 15:10]

Iss fáði ykkur Scheafera þeir sko Rokka feitt.

 Mitt fólk hefur sumt þjálfað slíka til björgunarstarfa.  ÞEtta eru svakalegir kraftakarlar og grafa hratt og eru duglegir, sterkir og yndislegir.  (sundfitin hjálpa vel til á svona hrömmum)

Gangi ykkur vinunum sem best og knúsaðu þinn fallega hund

Miðbæjaríhaldið

Fyrrum Tálknafjarðaríhald

[Ólína Kjerúlf Þorvarðardóttir, 29.2.2008 kl. 16:19]

Takk fyrir fallegar athugasemdir

Bjarni, vissulega geta Shaefferhundarnir verið frábærir. Við höfum nokkra í Björungarhundasveit Íslands - þetta eru tilkomumiklar skepnur og duglegar. Border Collie hundarnir taka þó öllu fram - fljótir eins og elding, áhugasamir og hlýðnir. 

Það segi ég með fullri virðingu fyrir kuldaskræfunni minni sem er auðvitað dugleg, sterk og gáfuð. En dalmatíuhundar eru ekki hannaðir fyrir íslenskar aðstæður. Ég þarf stundum að kappklæða hana í hlífðarföt þegar hún er að störfum á jöklum uppi -en þá "svínvirkar" hún líka.

[Ásdís Sigurðardóttir, 29.2.2008 kl. 18:30]

Aldeilis fjör hjá þér og hundinum.  Gangi þér vel í þessu frábæra starfi þínu.  Kær kveðja

[Forvitna blaðakonan, 1.3.2008 kl. 05:37]

Þú ert hörkutól Ólína; þér líkt að láta ekki duga að rölta spottakorn dag hvern með Blíðu þina eins og flestir hundaeigendur, heldur sérð henni fyrir nægri vinnu; nákvæmlega það sem flestir hundar elska; að hafa eitthvað fyrir stafni og vera úti með sínu fólki.

Ég dauðöfunda þig að vera í svona skemmtilegum félagskap manna og dýra.