Jónsmessunótt

Nú fer Jónsmessunóttin í hönd - sú dulmagnaða nótt sem þjóðtrúin telur öðrum nóttum máttugri í mörgum skilningi. Þá nótt glitra óskasteinar í tjörnum, jarðargróður er þrunginn vaxtarmagni og lækningarmætti, döggin hreinsunarmætti. Því velta menn sér naktir í Jónsmessudögg enn þann dag í dag. Grasa- og galdrakonur fara á kreik og tína jurtir sínar sem aldrei eru máttugri en þessa nótt. Álfar sjást á ferli og kynjaverur sveima á heiðum og í holtum.

Annars er Jónsmessan kirkjuleg hátíð - og eins og flestar hátíðir kirkjunnar (t.d. jólin) þá var henni ætlað að leysa af heiðna sólstöðuhátíð þ.e. sumarsólstöðurnar sem eru tveim dögum fyrr. En sumarsólstöðurnar eru hinn náttúrulegi hápunktur sumarsins.

Það er dásamlegt að vera utandyra ef veður er gott um sumarsólstöður, t.d. á Jónsmessunótt og skynja kraftinn úr jörðinni - tína þá grös í poka og finna fallega steina. Vera einn með sjálfum sér.

Hér fyrir vestan hafa verið rigningarskúrir í dag. Jörðin er hrein og rök. Full af krafti. Það er svartalogn á firðinum og nýtt tungl á himni.

 

Athugasemdir

[Sigurður Þór Guðjónsson, 24.6.2009 kl. 00:09]

Ég tel sumarsólstöðurnar EKKI vera hinn náttúrulega hápunkt sumarsins ef sumar er skilið veðurfarslegum skilningi en ekki birtulegum. Hlýjasti og besti hluti sumarsins, náttúrulegur hápunktur er um það bil mánuði eftir sumarsólstöður alveg eins og háveturinn er ekki meðan skammdegið er mest heldur um það bil mánuði síðar.  

[Halla Rut , 24.6.2009 kl. 17:14]

Falleg mynd og falleg tal á annars erfiðum tímum fyrir okkur Íslendinga alla.

Ég hér með bið þig, Ólína, fyrir hönd mína, barna minna og annarra Íslendinga að samþykkja ekki ríkisábyrgð fyrir IceSave samkomulaginu. 

Ég bið þig um að hugsa sem sú rökfasta og heiðarlega manneskja sem ég veit að þú ert en ekki sem partur af þeim flokk sem þú hefur kosið þér að vera í.  Hér skipta flokkar ekki máli því slík er ábyrgð hvers þingmanns í máli sem varðar líf og framtíð okkar allra.

Á þingi starfar fólk fyrir þjóð sína en ekki ákveðna stjórnmálaflokka. Ef þú sýnir þann kjark og þor og segir NEI þá munt þú ljóta virðingu og lof þjóðarinnar fyrir. Vittu til.