Hveitibrauðsdagar þingmanna

Við erum brosmildar og vonglaðar á myndinni þessar fimm þingkonur sem röltum yfir Austurvöllinn í vorblíðunni til þess að taka kaffisopa saman á Café Paris eftir fundalotu dagsins.

Eins og alþjóð veit eru stjórnarmyndunarviðræður nú langt komnar. Okkur þingmönnum hefur gefist kostur á því að koma að málefnavinnunni sem hefur gengið hratt fyrir sig í starfshópunum síðustu daga. Ég fór í sjávarútvegsmálin - þóttist vita að í þeim málaflokki yrði lítið framboð á konum, svo ég skellti mér.  

Nú fara hveitibrauðsdagar nýkjörinna þingmanna í hönd. Þetta eru dagarnir sem allt er nýtt og spennandi, allir brosmildir, vingjarnlegir og vongóðir. Skemmtilegir dagar. Vor í lofti - brum á trjám.

Sjálft þingið hefur að vísu ekki verið kallað saman, en engu að síður hefur verið í ýmsu að snúast og margt að setja sig inn í.  

Á náttborðinu mínu liggur til dæmis lítið kver: Þingsköp Alþingis - óbrigðult svefnmeðal. Ég mæli með því. 

-----------

Á myndinni eru frá vinstri: Ólína, Sigríður Ingibjörg, Katrín Júl, Þórunn Sveinbjörns og Oddný Harðar - allt Samfylkingarkonur. Myndina tók glaðbeittur ungur maður sem átti leið hjá.

Athugasemdir

[Ragna Birgisdóttir (IP-tala skráð) 5.5.2009 kl. 18:53]

[Sigrún Jónsdóttir, 5.5.2009 kl. 19:38]

Flottar konur þarna á ferð

[Steingrímur Helgason, 5.5.2009 kl. 20:44]

~Alþjóð veit þá þingkonur vita~, greinilega. (sic!)

[Sigurjón, 6.5.2009 kl. 00:01]

Skil ég þetta rétt?  Fórst þú ekki í málefnavinnu sjávarútvegsmála vegna þess að þú hafðir sérþekkingu á því sviði eða mikla hugsjón?  ,,Skelltir" þú þér bara vegna þess að þér fannst ólíklegt að margar konur tækju þátt í því?  Er þetta rétt ályktun hjá mér?

Svo segir: ,,Á náttborðinu mínu liggur til dæmis lítið kver: Þingsköp Alþingis - óbrigðult svefnmeðal. Ég mæli með því."

Mér finnst þetta lýsa ótrúlegu virðingarleysi við æðstu stofnun landsins og það af nýkjörnum þingmanni!

Úr því þú nefnir hveitibrauð og París, langar mig að rifja upp orð, eignuð konu einni sem bjó í Frakklandi (þó ekki sé vízt að hún hafi nokkurn tímann sagt þau): ,,Qu'ils mangent de la brioche".

Vonandi getið þið, með 520.000 kallinn á mánuði, notið ljúfa kaffisopans og kökunnar á Café París meðan almenningur á bráðum ekki fyrir brauði...

[Sigurjón, 6.5.2009 kl. 00:04]

...og það er ekki vízt að stór hluti almennings í þessu landi verði lengi spenntur, brosmildur, vingjarnlegur og vongóður, eða finnist komandi dagar skemmtilegir...

[Ólína Kjerúlf Þorvarðardóttir, 6.5.2009 kl. 11:39]

Sæll Sigurjón.

Ég "skellti mér´" í sjávarútvegsmálin vegna þess að ég hef þekkingu á þeim málaflokki og hugsjón varðandi breytingar á kvótakerfinu.

Ég hef líka mikla þekkingu á menntmálum og hugsjón í þeim málaflokki, sömuleiðis velferðarmálum ýmiskonar, lýðræðismálum og umhverfismálum. En ég varð að velja um málefnanefnd - og ákvað þess vegna að láta til mín taka í sjávarútvegsmálunum.

Það er illa komið fyrir okkur öllum ef helgislepjan þarf að leka svo af hverjum manni að fólk megi ekki tala á léttum nótum um sjálft sig og sínar athafnir.

Ef þú ætlar með orðum þínum að reyna að gera úr mér og mínum líkum einhverja yfirstétt "með 520 þús á mánuði" sem nýtur kaffisopans á Café París á meðan alþýðan sveltur - þá virkar þessi málflutningur ekki á mig, enda er hann ekki málefnalegur. Þú fyrirgefur.

[Ólína Kjerúlf Þorvarðardóttir, 6.5.2009 kl. 11:57]

... ég lét mér ekki nægja kaffisopann heldur fékk mér með góðri samvisku pönnuköku með hunangi og sítrónu. Hún bragðaðist vel og rann ljúflega niður.

Ég er meira að segja að hugsa um að fara í bíó um helgina.

Ég held að meðalmaður á Íslandi geti vel leyft sér munað af þessu tagi - það eru ekki kaffihúsaheimsóknir og bíóferðir sem fara með fjárhag fólks um þessar mundir.

[Þórður Már Jónsson, 6.5.2009 kl. 13:30]

Sigurjón: Ég get staðfest að Ólína Þorvarðardóttir hefur mikið vit á sjávarútvegsmálunum. Þá er maðurinn hennar, Sigurður Pétursson, án nokkurs vafa einn sá besti á því sviði sem völ er á hér á landi. Þetta er mikið hugsjónafólk varðandi sjávarútveginn. Þannig að þú þarft ekki að hafa áhyggjur þó hún hafi "skellt" sér í sjávarútvegsmálin. Ég treysti engum betur fyrir þeim en henni.

[Sigurjón, 6.5.2009 kl. 18:24]

Gott og vel.  Þá hefði verið gott að það kæmi fram í texta færzlunnar.

,,það eru ekki kaffihúsaheimsóknir og bíóferðir sem fara með fjárhag fólks um þessar mundir."  - Nei, það er stefnu- og aðgerðarleysi stjórnmálamanna fyrst og fremst.  Svo hafa enda mjög margir einfaldlega ekki efni á því að leyfa sér svo mikið sem að fara einu sinni á kaffihús eða bíó.

Gaman þætti mér að vita hvernig þú útskýrir að málflutningur minn sé ekki málefnalegur.  Það þýðir ekki að segja svona án þess að styðja það með dæmi eða öðrum rökum.

[Sigurjón, 6.5.2009 kl. 18:25]

...og eftir stendur óvirðing þín gagnvart þingsköpum virðulegustu og æðstu stofnun landsins...

[Ólína Kjerúlf Þorvarðardóttir, 6.5.2009 kl. 22:44]

Sæll aftur Sigurjón.

Þingsköpin eru hundleiðinleg aflestrar - þú fyrirgefur. Það eru líka fjölmörg lagafrumvörp sem samin hafa verið ásamt reglugerðum. Ég ber fulla virðingu fyrir öllu þessu engu að síður - og þess vegna legg ég það á mig að lesa það.

Þú spyrð hvað sé ómálefnalegt - það er td ómálefnalegt þegar aðili reynir að sverta mótherja að ósekju. Ég fékk mér kaffibolla á veitingahúsi - þú reyndir að  láta líta svo út að ég hefði drýgt einhverskonar synd með þessu, sýnt fátæku fólki sketytingarleysi og óvirðingu með því að láta þetta eftir mér. 

Ef þú sjálfur hefur ekki efni á því lengur að kaupa þér kaffibolla og kökusneið, segjum einu sinní í viku, þá átt þú alla mína samúð. En þú hefur ekki svarað því sjálfur hvort svo illa sé komið fyrir þér fjárhagslega. Er það svo? Eða ætlar þú að heita því hér með að þú sjálfur munir aldrei drýgja slíkan verknað sem að fara á kaffihús á meðan kreppan stendur? Er það einhver samstaða með alþýðu manna? 

Ef þig langar að lesa þingsköp alþingis þér til skemmtunar og í virðingarskyni við löggjafasamkunduna skal ég fús senda þér eintak. Eins og ég segi, þá er þetta fyrirtaks svefnmeðal.

Svo óska ég þér alls hins besta.

[Sigurjón, 7.5.2009 kl. 11:38]

Ég heiti því hér með að fara aldrei á kaffihús meðan kreppan stendur, enda þarf ég að eyða þeim litlu peningum sem ég á í annað, eins og t.d. húsnæðislán sem hefur hækkað alveg voðalega mikið og mat sem hefur hækkað alveg voðalega mikið, fyrir laun sem hafa lækkað alveg voðalega mikið...

Það má vera að ég hafi misskilið þig og að þú hafir meint eitthvað annað en ég las út úr textanum, en fyrir mér er þetta svolítið ,,yfirstéttarlegt" hjal...

...en ég óska þér alls hins bezta.

[Ólína Kjerúlf Þorvarðardóttir, 7.5.2009 kl. 23:04]

Ég vona svo sannarlega að þú standir ekki við þetta "heit" þitt Sigurjón  - það er engum til gagns. Jafnvel þegar að herðir í fjármálum verður fólk að geta gert sér dagamun. Heimsókn á kaffihús einstöku sinnum er ekki synd eða óhóf. Það eru aðrir hlutir sem nær væri að spara en það að taka sér einstöku sinnum stund frá amstri dagsins í góðum félagsskap og kaupa sér kaffibolla. Jafnvel pönsu.

Bestu kveðjur og gangi þér allt í haginn.