Engin keðja er sterkari en veikasti hlekkurinn

Þessi handabakavinnubrögð minna óþægilega á vinnubrögð sama fólks í OR og REI málinu mikla, þegar borgarstjórinn þáverandi las ekki fundargögnin af því hann skildi ekki enskuna - og frekar en láta lögfræðingana hjá borginni fara í gegnum gögnin og gera samantekt um málið, reyndi hann að fela vanþekkingu sína. Hann ætlaði að sigla inn í stóra ákvarðanatöku án þess að vita hvað hann var að gera.

Nú myndar hann meirihluta með Ólafi F. Magnússyni - og báðum liggur svo á að komast að kjötkötlunum að hvorugur kannar baklandið. Hvorugur veit raunverulega hvað hann er að gera.

Þetta segir allt sem segja þarf um trúverðugleika og vinnubrögð þessa "nýja" meirihluta.  

Engin keðja er sterkari en veikasti hlekkurinn. Í hinni nýju valdakeðju borgarstjórnar er veikur hlekkur - mjög veikur.

Töldu Margréti með

Athugasemdir

[Gísli Baldvinsson (IP-tala skráð) 23.1.2008 kl. 10:57]

Smátt og smátt sé ég að þessi gjörningur mun skaða Sjálfstæðisflokkinn til framtíðar og draga verulega úr þeim líkum að hann nái nokkru sinni meirihluta einn í höfuðborginni.

[Hólmdís Hjartardóttir, 23.1.2008 kl. 10:58]

Þessi stjórn verður skammlíf. Ég hef  á tilfinningunni  að Vilhjálmur hafi lítið talað við sitt fólk eða blekkt það.

[Jón Ingi Cæsarsson, 23.1.2008 kl. 11:15]

Villi er vitlausari en ég hélt... satt að segja

[Sævar Helgason, 23.1.2008 kl. 12:30]

Enn og aftur sömu mistökin hjá Vilhjálmi oddvita sjálfstæðismanna í Borginni. Ekkert samráð við sitt fólk - ekkert athugað með bakland Ólafs F. - bara vaðið áfram í stjórnlausri valdahyggju-allir endar vanhnýttir eða lausir.

Vonandi verða borgarstjórnarmálin stokkuð upp hið fyrsta og mynduð ábyrg og öflug stjórn í  Reykjavík, þessi nýji gerningur er vesöldin uppmáluð og enganvegin boðleg við stjórn höguðborgarinnar.

[Ómar Sigurðsson (IP-tala skráð) 23.1.2008 kl. 15:35]

Það er alltaf sami hrokinn í þér Ólína, lærðiru ekkert á útreiðinni sem þú fékkst fyrir vestan, þar sem hrokinn varð þér að falli, eins og í pólitíkinni forðum. Í Reykjavík hefur verið starfandi meirihluti í 100 daga og gat ekki komið sér saman um stefnu í borgarmálum, fyrir nú utan að Framsóknarflokkurinn er óstjórntækur vegna framkomu Björns Inga við eigin flokksmenn. Fráfarandi meirihluti var ekki sterkari en veikasti hlekkurinn eins og dæmin hafa sannað. Guði sé lof fyrir að það sé að taka við samhenntur hópur að stjórna borginni.

[Gísli Baldvinsson (IP-tala skráð) 23.1.2008 kl. 17:03]

Ómar Sigurðsson er gott eintak af þessum sjöllum sem hugsar ekki um annað en að græða peninga á daginn og grilla á kvöldin. Kann líklegast ekki að skammast sín.

[Ólína Kjerúlf Þorvarðardóttir, 23.1.2008 kl. 17:03]

Sæll Ómar.

Ekki veit ég hvernig þú skilgreinir hugtakið "fall" - kannski þekkir þú það af eigin raun sjálfur, án þess ég viti það.

En víst er að þessi orð þín ljóma ekki af neinu lítillæti.

[Sigurbjörg Sigurðardóttir, 23.1.2008 kl. 20:47]

Þetta er sóðalegt,

[Þorgeir Hjaltason (IP-tala skráð) 23.1.2008 kl. 21:21]

" Í hinni nýju valdakeðju borgarstjórnar er veikur hlekkur - mjög veikur. " 

 Var hann ekki einnig í síðasta meirihluta ?

[Ásdís Sigurðardóttir, 23.1.2008 kl. 22:01]

Þessi skrif eru á leiðinlegum nótum og mér finnst persónulegt skítkast til mikils ama.  Ólína, ég hef talið mig sjálfstæðiskonu en er ekki blind á gjörðir þeirra frekar en annarra, í þessu máli tek ég heilshugar undir með þér.

[Brynhildur Jónsdóttir (IP-tala skráð) 23.1.2008 kl. 23:49]

Ég á bara ekki til orð, las hugleiðingu Ólínu -  svo athugasemdirnar - og svo textann aftur til að finna þessa óhæfu sem Ólína hefði látið út úr sér.  Ég hreinlega finn ekkert í textanum sem verðskuldar annan eins rudda og Ómar og Siggi æla út úr sér.  Svona bregst enginn við nema af því að það sem sagt var hafi snert  við einhverjum sannleiksstreng hjá þeim.  Þeir hljóta að hafa vondan málstað að verja og vita það greinilega.  Að öðrum kosti hefðu þeir brugðist við með rökum.

[Ólína Kjerúlf Þorvarðardóttir, 24.1.2008 kl. 08:01]

Gott fólk.

Ég harma það þegar menn koma hér inn á síðuna mína til að ausa úr sér persónulegum svívirðingum undir dulnefnum. Þið takið vonandi eftir því að "Ómar" og "Sigga" eru ekki skráðir notendur - og myndu sjálfsagt aldrei skrifa svona undir eigin nafni.

Ég mun að sjálfsögðu ekki láta teyma mig út í umræðu við "Ómar" og "Siggu" eða aðra sem skrifa á þann hátt sem þau gera. Á skrifum þeirra sannast það einfaldlega sem löngum hefur verið sagt að þegar rökin þrjóta taka hnefarnir við.

Nú ganga hnefarnir - það segir allt sem segja þarf um rökfestuna.

[Gulli (IP-tala skráð) 24.1.2008 kl. 08:34]

Telst skráning á blog.is sem persónuskilríki á Íslandi? Hver sem er getur skráð sig undir hvaða nafni sem er á blog.is. Ert þú t.d. örugglega Ólína Þorvarðardóttir? blog.is er engin staðfesting á því!

[Ragnheiður Ólafía Davíðsdóttir, 24.1.2008 kl. 09:19]

Það er brjóstumkennanlegt þegar menn nota fúkyrðaflaum og persónulegar árásir til þess að fá útrás fyrir málefnalega fátækt sína og hið andlega harðlífi sem þeir eru haldnir. Þetta gerist oft þegar sterkar, greindar og málefnalegar konur viðra skoðanir sínar. Í örvæntingafullri leit að mótrökum, sem þeir hafa oftast ekki, grípa þessir vorkunnarsömu einstaklingar oft til þeirra ráða að fara út í svona skítkast.

Þetta á við tvo einstaklinga sem opinbera andlegan vanmátt sinn hér í athugasemdafærslum að ofan og kalla sig "Sigga´" og "Ómar" (Engin veit hver þeirra raunverulegu nöfn eru - enda hafa þeir ekki kjark til að koma fram undir nafni).

Við þá, og aðra hugleysingja sem kjósa að opinbera greindarskort sinn á þennan hátt, vil ég segja þetta:

Ólína Þorvarðardóttir hefur alla tíð verið sjálfri sér samkvæm í sínum störfum; heiðarleg, málefnaleg  og rökföst. Hún er afar traustur vinur og samstarfsmaður. Hún var sterkur og góður borgarfulltrúi á sínum síma og sá eini sem hélt uppi málefnalegri stjórnarandstöðu í borginni þann tíma sem hún sat þar. Um það geta allir vitnað sem unnu með henni og fylgdust með stjórnmálum á þeim tíma.

Allir hafa rétt til að  viðra skoðanir sínar en þá þurfa þær að vera málefnalegar og koma fram undir fullu nafni.

[Kristín Helga (IP-tala skráð) 24.1.2008 kl. 10:31]

Ef ég væri skráð á blog.is myndi ég koma hér fram undir bæði mynd og nafni - en ég vil taka undir með Ragnheiði Davíðsdóttur. Hún talar eins og út úr mínum munni.

[Svanfríður Lár, 24.1.2008 kl. 10:32]

Mikið er ég sammála þér Ragnheiður. Ólína hefur alltaf verið þekkt af því að vera sjálfri sér samkvæm og heiðarleg.  Reyndar eru svona aumkunnarverð skrif ekki svaraverð og gerði Ólína best með því að eyða jafnharðan út skrifum þessara skápa-penna. Reyndar legg ég til að allir bloggarar sem skrifa undir nafni og mynd og eru sannarlega þeir sjálfir segi þessu huldufólki stríð á hendur með því að eyða jafnharðan út athugasemdum þeirra. 

[Lára Hanna Einarsdóttir, 24.1.2008 kl. 11:00]

Þetta persónulega skítkast undir dulnefnum sem hér má sjá er hreint með ólíkindum. Þjóðfélagið hefur logað undanfarna daga vegna atburðanna í Reykjavík og eru þar margfalt fleiri ósáttir en sáttir, sem teljast má ofureðlilegt. Fólk hefur skrifað um málið og lýst skoðunum sínum, fengið athugasemdir þar sem flestir eru sammála en þó einhverjir ósammála. Það er eðlilegt og sjálfsagt að fólk hafi ólíkar skoðanir á málefnunum sem um er fjallað og færi sín rök fyrir þeim.

En hvergi hef ég séð umræðurnar litast af svo rætnu, persónulegu skítkasti eins og hjá þessum tveimur einstaklingum hér sem kalla sig Ómar og Sigga. Ég hef lesið bloggið lengi og oft koma athugasemdir um færslur frá fólki sem ekki er skráð á Moggabloggið en skrifar þó undir réttu nafni og er málefnalegt. En stundum notar fólk dulnefni og í flestum tilfellum eru það aumkvunarvert fólk sem virðist eiga mjög bágt og er að fá útrás fyrir annarlegar hvatir, oftast á annarra manna bloggsíðum.

Ólínu þekki ég ekki og hef aldrei hitt hana, en fylgst með henni í stjórnmálunum frá fyrstu tíð og lesið bloggið hennar lengi. Mér er lífsins ómögulegt að sjá út úr skrifum hennar neitt af því sem þeir "Sigurðs-bræður" nefna. Ólína hefur skoðanir, færir rök fyrir máli sínu og ef einhver er ekki sammála henni og vill tjá sig hlýtur að vera lágmarkskrafa að fólk setji fram viðlíka rök fyrir sínum skoðunum ef það vill láta taka mark á sér.

Nafnlaust skítkast dæmir sig sjálft og er bitlaust vopn hins huglausa manns.

[Magga (IP-tala skráð) 24.1.2008 kl. 11:11]

1. Ég tek heilshugar undir orð Ragnheiðar hér á undan. Ólína er traustur vinur, heiðarleg og rökföst og sem betur fer hefur hún skoðanir og það kann að trufla marga en menn vita líka alveg hvar þeir hafa hana. Hún læðupokast ekki um heldur er kona sem þorir að segja hlutina eins og þeir eru.