Þrumugleði um jól

 Það var dásamlegt að heyra almættið þruma yfir höfuðborginni á sömu stundu og jólin gengu í garð. Kirkjuklukkurnar voru vart þagnaðar þegar elding lýsti upp himininn og mikilfengleg þruma fylgdi í kjölfarið. Og svo eins og verið væri að steypa hagli úr fötu.´

Við þessa óvæntu jólakveðju komst ég í alveg sérstakt hátíðarskap. Mér varð litið á fjölskylduna mína við veisluborðið - við vorum nýsest þegar þetta dundi yfir - og á einhvern óútskýranlegan hátt fannst mér eins og Drottinn sjálfur hefði sest að borðinu með okkur. Ég get ekki útskýrt það nánar. En hjarta mitt fylltist þakklæti og gleði - mér finnst ég hafa svo óendanlega margt að þakka fyrir.

Þetta var gott aðfangadagskvöld. Það var yndislegt að hafa næstum því alla fjölskylduna hjá sér - og hina innan seilingar sem ekki sátu með okkur til borðs. Vita af öllum ástvinum einhversstaðar í góðu yfirlæti. 

Eftir matinn fórum við mæðgurnar (ég, Saga og Maddý) í miðnæturmessu í Hallgrímskirkju. Það var falleg messa. Sérstaklega var ég glöð yfir því að kirkjugestir skyldu hvattir til þess að taka virkan þátt í söngnum. Það var augljóslega vel þegið, og kirkjan ómaði öll. Hátíðleg og yndisleg stund.

Eftir messu dró ég Sigga svo með mér í göngutúr með hundinn í tunglsljósinu, enda brostin á blíða með stjörnubliki og silfruðum sjávaröldum. Afar falleg jólanótt. 

      Jólanótt

      Norðurljósa litatraf
      liðast hægt um myrkrahvel,
      lýsir himinn, land og haf,
      litkar hjarn og frosinn mel.
      Rauðbleik merlar mánasigð
      á myrkum sæ um þögla nótt.
      Langt í fjarska bjarmar byggð
      - borgarljósin tindra rótt.     

      En yfir raflýst borgarból
      - á bak við heimsins ljósadýrð -
      ber sín helgu boð um jól
      björt en þögul nætursól,
      við skörðum mána skín í kyrrð
      skærum loga úr órafirrð
      er lúnum mönnum lýsti þrem
      langan veg til Betlehem.

Athugasemdir

[Gústi (IP-tala skráð) 25.12.2007 kl. 11:05]

Gleðileg jól og kveðja að vestan :)

[Gunnar Ó. Kvaran (IP-tala skráð) 25.12.2007 kl. 11:16]

Gleðilega hátíð

Ég sá að vitnað var í bloggið þitt á mbl.is og það er fallegt ljóð sem mér liggur forvitni á að vita hver orti svon a fallega ??

Væri þakklátur ef þú upplýstir mig um þetta

Jólakveðjur,

Gunnar Kvaran

[Ólína Kjerúlf Þorvarðardóttir, 25.12.2007 kl. 15:18]

Sæll Gunnar og gleðileg jól.

Hafi verið vitnað í ljóð af blogginu mínu síðustu daga, þá hlýtur það að vera eftir mig - annaðhvort vísan "Minningin er mild og tær" eða ljóðið "Jólanótt" hér fyrir ofan ("Norðurljósa litatraf ...). Nema þú sért að tala um nýja textann "Nú gleðileg jólahátíð er gengin í garð" (við lagið "We Wish You a Marry Christmas") - sem er reyndar líka eftir mig.  

Ég hef verið í óvenju miklu ljóðastuði síðustu daga - þó þetta sé ekki nýort (nema það síðastnefnda).  Það gleður mig að þér finnst það fallegt.

Kær kveðja.

[Níels A. Ársælsson., 25.12.2007 kl. 20:56]

Gleðileg jól til ykkar allra og takk fyrir Vestanvindinn. Mjög góð bók.

Kveðja frá Tálknafirði.

[Ásdís Sigurðardóttir, 25.12.2007 kl. 22:38]

Já, þetta vöru þrumujól í borginni. Takk fyrir fallegt ljóð. Kær kveðja.

[Edda Agnarsdóttir, 25.12.2007 kl. 23:28]

Gleðileg jól Ólína - er á leiðinni í rúmið með bókina eftir þig, fékk tvær af þinni bók.  Ég er svo hrifin af jólaljóðum og þitt er fallegt og kröftugt.