Vestanvindur úr prentun

 Ég er að handleika fyrstu ljóðabókina mína - hún var að koma úr prentun. Lítil og nett - ósköp hógvær. Það er undarleg tilfinning að handleika þessa litlu bók - allt öðruvísi en aðrar bækur sem ég hef gefið út. Þær hafa verið stórar og fyrirferðarmiklar - fjallað um fræði og fólk. Þessi bók er allt öðru vísi. Hún er svolítill sálarspegill - nokkurskonar fordyri að sjálfri mér - eða þeirri konu sem ég hef verið fram til þessa.

Mig langar að segja ykkur svolítið frá myndinni á kápunni - hvernig hún varð kveikja að titilljóði bókarinnar.

Þannig var að myndlistarmennirnir Ómar Smári Kristinsson og Nína Ivanova, kona hans voru beðin að hanna myndina. Þau fengu nokkur ljóð til að vinna út frá - og sýndu mér svo fyrstu drög. Ein mynd varð mér svo hugstæð að hún fylgdi mér allan daginn og inn í nóttina. Ég var lögst til svefns og eiginlega í svefnrofunum þegar orðin tóku að streyma til mín. Loks varð ég að fara á fætur, ná mér í blað og penna. Titilljóð bókarinnar var komið - næstum því fullskapað. Ég get ekki skýrt það nánar en morguninn eftir varð það orðið eins og það er í bókinni.

Hallgrímur Sveinsson, útgefandi minn, var þolinmæðin uppmáluð þegar ég hringdi til hans um morguninn til að vita hvort ljóðið kæmist inn í bókina. Þá var komin þriðja próförk, og ekki sjálfgefið að verða við þessari bón. En Hallgrímur er ljúfmenni - og í samvinnu við prentsmiðjuna varð þessu bjargað.

Nú er bókin komin í verslanir - og svo er að sjá hvernig hún fellur lesendum og gagnrýnendum í geð. Ég krosslegg fingur og vona það besta.

 

Athugasemdir

[Jóna Á. Gísladóttir, 25.10.2007 kl. 16:44]

 Ohhhh er þetta ekki yndisleg tilfinning? Innilega til hamingju.

[Gísli Bergsveinn Ívarsson, 25.10.2007 kl. 17:17]

Frábært Ólína

Innilega til hamingju

[Magnús Geir Guðmundsson, 25.10.2007 kl. 17:25]

Nú vestur á bógin, ég veifa til þín,

á vinarkveðjur svo gjarn.

Af fenginni reynslu, er fullvissa mín,

þitt fagurt sé NÝFÆDDA BARN!

[Marta B Helgadóttir, 25.10.2007 kl. 17:34]

Innilega til hamingju

[Ásdís Sigurðardóttir, 25.10.2007 kl. 17:49]

Hjartanlega til hamingju með afkvæmið, ætla að kíkja eftir henni þegar ég kemst í Eymundsson næst. Kannski Bjarni Harðar í bókakaffi selji hana hér á Selfossi, ég kanna málið.

[Ólína Kjerúlf Þorvarðardóttir, 25.10.2007 kl. 17:55]

Takk, takk

[Arna Lára Jónsdóttir, 25.10.2007 kl. 18:16]

Innilega til hamingju með bókina. Þar sem ég hef nú þegar hlýtt á fyrsta upplesturinn úr bókinni við setningu Veturnótta þá get ég ekki annað sagt en að hún lofar góðu.  

[Jenný Anna Baldursdóttir, 25.10.2007 kl. 20:29]

Til hamingju og nú verður bloggað um bókina eins og líf liggi við á næstunni.  Auðvitað plöggum við okkar konu.  Þó það nú væri.

Úje

[Guðsteinn Haukur Barkarson, 25.10.2007 kl. 20:52]

Þetta verður jólagjöfin í ár! Ég hlakka til að lesa hana ! Guð blessi þig og þína fjölskyldu Ólína mín, og þakka ég fögur orð á minni síðu.

[Friðrik Lunddal (IP-tala skráð) 25.10.2007 kl. 21:19]

Ólína til hamingju með bókina og mér er heiður að hafa stýrt henni um prentsmiðjuna og fáið þið Hallgrímur stórt prik að hafa prentað hana á íslandi ! Og vona ég svo sannarlega að þjóðin bregðist við og kaupi hana í bílförmum enda flottur gripur þar á fer.

Enn og aftur til hamingju ! 

[Hallgrímur Óskarsson (IP-tala skráð) 25.10.2007 kl. 21:33]

Hjartanlega til hamingju með ljóðabókina.  Ég hlakka til að lesa hana.

[Högni Jóhann Sigurjónsson, 25.10.2007 kl. 23:20]

Til hamingju Ólína.

[Halldór Egill Guðnason, 26.10.2007 kl. 09:22]

Mikið held ég að það sé góð, en samt undarleg tilfinning, að halda á bók eftir sjálfan sig. Óska þér til hamingju með verkið.

[Guðrún Jónína Magnúsdóttir (IP-tala skráð) 26.10.2007 kl. 12:34]

Til hamingju Ólína! Ég ætla að skondrast í bókakaffi til Bjarna Harðar um leið og tækifæri gefst og kaupa eintak. Við eigum reyndar sama útgefanda, ég skrifa ástarsögur fyrir Hallgrím, í fyrra var það Harpa og nú er sjálfstætt framhald Silja alveg að fara að líta dagsins ljós. Ágæt lesning til að sofna út frá

Hlakka til að lesa bókina þína, sofna örugglega ekki yfir henni.

kveðja

Ninna

[Ólína Kjerúlf Þorvarðardóttir, 26.10.2007 kl. 14:32]

Ég þakka ykkur öllum hjartanlega fyrir góðar hamingjuóskir og kveðjur. Þær ylja mér svo sannarlega um hjartarætur.

Takk kæru vinir og velunnarar.

[Edda Agnarsdóttir, 26.10.2007 kl. 15:22]

Til hamingju Ólína frá Kaupmannahöfn. Ég kaupi bókina þegar ég kem heim!

[Margrét Össurardóttir (IP-tala skráð) 27.10.2007 kl. 22:25]

Innilega til hamingju Ólína

[Sigurður Þór Guðjónsson, 29.10.2007 kl. 16:45]

Til hamingju!