Minn fyrsti sjónvarpsþáttur eftir 15 ár

 Fyrsti sjónvarpsþátturinn minn eftir 15 ára hlé var tekinn upp í morgun. Hann heitir "Mér finnst" og verður sendur út á föstudögum kl. 21, í vetur á nýju sjónvarpsrásinni ÍNN (rás-20). Þetta eru umræðuþættir þar sem ég fæ til mín reyndar og skemmtilegar konur með sterkar skoðanir til þess að rökræða við mig um hvaðeina sem þeim (og mér) brennur á hjarta. Sjálf verð ég með þáttinn annað hvert föstudagskvöld, en Maríanna Friðjónsdóttir sjónvarpsstjóri ÍNN tekur hann á móti mér tvisvar í mánuði.

Stöðin fer af stað með fullum þunga n.k. föstudagskvöld þannig að mér virðist sem þátturinn minn  verði upphafið - en raunar hafa tilraunaútsendingar staðið nú um nokkra hríð. Til stendur að senda efnið út alla virka daga kl. 20-22, og er stöðin fyrst og fremst helguð umræðu og talmáli. Þarna verða ýmsir þjóðkunnir þáttagerðarmenn, Margrét Frímannsdóttir, Mörður Árnason, Guðjón Bergmann, Randver Þorláksson, Illugi Gunnarsson og Katrín Jakobsdóttir - svo ég nefni nú þá sem ég man í augnablikinu. Ingvi Hrafn Jónsson verður að sjálfsögðu á sínum stað með Hrafnaþingið - enda eigandi stöðvarinnar og upphafsmaður. 

  En það var ótrúlega gaman að mæta í stúdíóið, þar sem Maríanna Friðjónsdóttir, fyrrverandi samstarfskona mín af RÚV,  tók á móti okkur og stjórnaði upptökunni af sinni alkunnu fagmennsku og fumleysi. Við endurfundina rifjuðust upp góðar minningar, m.a. frá leiðtogafundinum í Höfða þegar við lögðum nótt við dag undir stjórn Ingva Hrafns, okkar gamla yfirmanns (núverandi eiganda ÍNN).

Við tókum upp tvo þætti í morgun. Í þeim fyrri komu til mín þrjár bloggandi konur, þær Marta B. Helgadóttir, Salvör Gissurardóttir og Jóna Á Gísladóttir sem allar eru öflugir og litríkir bloggarar. Og þær brugðust mér ekki í dag - gáfaðar, mælskar og skemmtilegar. 

Í seinni þættinum, sem verður sendur út eftir tvær vikur, voru bókmenntafræðingarnir Soffía Auður Birgisdóttir og Silja Aðalsteinsdóttir. Við veltum okkur upp úr bókmenntum í miklum makindum - mest kvennabókmenntunum eins og gefur að skilja - og það var reglulega gaman að spjalla við þær stöllur svo fróðar og spakar sem þær eru - og margreyndar á þessum vettvangi.

Já, það er mikið vatn til sjávar runnið frá því ég vann síðast fyrir sjónvarp. Og það var vissulega ánægjulegt að vitja þess aftur eftir langa fjarveru. Þetta var BARA gaman, eins og börnin segja.  

Sjáumst vonandi á rás-20 á föstudagskvöldið kl. 21.

 

Athugasemdir

[María Anna P Kristjánsdóttir, 17.10.2007 kl. 22:27]

Til hamingju með þáttinn.

[Ólína Kjerúlf Þorvarðardóttir, 17.10.2007 kl. 22:36]

Takk

[Marta B Helgadóttir, 17.10.2007 kl. 23:04]

Takk innilega fyrir samveruna í dag og fyrir boðið Ólína.   

Þetta verða góðir þættir hjá þér, virkilega skemmtileg útfærsla. 

Til hamingju

[Jenný Anna Baldursdóttir, 18.10.2007 kl. 01:28]

Þú getur bókað mig sem fastan áhorfenda og ég mun "plögga" grimmt.  Mér finnst ekkert minna en frábært að þú skulir vera komin aftur í sjónvarp og það með þætti með konum.  Slagsíðan minnkar þó nokkuð.  Til hamingju með þáttinn þinn og til hamingju stelpur, svona almennt og yfirleitt.

[María Kristjánsdóttir, 18.10.2007 kl. 07:50]

Gaman að heyra þetta og til hamingju!

[Kolbrún Baldursdóttir, 18.10.2007 kl. 07:57]

Frábært, hlakka til að fylgjast með þessu.
Endilega máttu hóa í mig ef þig vantar umfjöllun um sálfræðileg málefni, já eða stjórnmál: prófkjörsreynsla mín var t.d. reynsla í lag.. verandi frekar ný í Flokknum, lítið bakland þar inni sérstaklega meðal ungliðanna.

[Matthildur Ágústa Helgadóttir Jónudóttir, 18.10.2007 kl. 09:32]

Til hamingju með þáttinn Ólína hann verður án efa í senn fróðlegur og skemmtilegur.  Veist þú hvort við munum geta horft á þessa stöð hérna á Ísafirði?

[Ólína Kjerúlf Þorvarðardóttir, 18.10.2007 kl. 09:46]

Takk fyrir allar saman,

Ég mun örugglega líta til ykkar, bloggandi kvenna, í leit að álitsgjöfum í þættinum framvegis - bíðið bara.

Þátturinn á að nást um allt land - ef menn eru með myndlykil að t.d. Stöð-2 sem fer í gegnum digital Ísland. Rás-20.

[Gísli Bergsveinn Ívarsson, 18.10.2007 kl. 13:23]

Ég fylgist örugglega með.  Gott einkaframtak þetta

Innilega til hamingju með þetta

[Svanur Sigurbjörnsson, 18.10.2007 kl. 14:08]

Til hamingju með þáttinn.  Ég verð þó að skemma aðeins stemminguna með því að spyrja; hvers vegna ætlarðu aðeins að ræða við konur í þættinum?  Verður þátturinn sérstakur vettvangur kvenréttindabaráttu?  Karlar eru jú liðtækir í þeirri baráttu líka.  Ég sé ekki ástæðuna fyrir þessu kynjavali í sjónvarpsþætti.  Ættu karlar að taka sig saman í sérstaka gesta- og umræðuþætti þar sem konur hefðu ekki kost á þátttöku?  Hvað er ég ekki að skilja?  Ef þér finnst þessi spurning fáránleg þá vinsamlegast fyrirgefðu skilningsleysi mitt og útskýrðu.

[Kristín Björg Þorsteinsdóttir, 18.10.2007 kl. 14:12]

Til hamingju með þáttinn þinn gamla samstarfskona. Hvenær unnum við saman að viðtalsþættinum þættinum hjá RÚV - var það 1991 - 1992? - já mikið rétt 15 ár síðan OMG!

[Ásdís Sigurðardóttir, 18.10.2007 kl. 14:47]

Hefurðu áhuga á að fjalla um það mál sem ég og vinkona mín vorum að hrinda af stað í tengslum við kjör öryrkja?? bendi þér hér á síðuna okkar.

http://www.petitiononline.com/lidsauki/   Innilega til hamingju með nýja þáttinn. Bíð spennt eftir útsendingunni.

[Ólína Kjerúlf Þorvarðardóttir, 18.10.2007 kl. 14:51]

Mjamm - tíminn líður Kristín mín.

En Svanur spyr hvers vegna bara konur í þættinum. Það er vegna þess að mér finnst halla á konur sem þátttakendur í opinberri umræðu. 

Karlar eru ágætir álitsgjafar, enda skortir þá yfirleitt ekki tækifæri til að koma skoðunum sínum að í íslenskum fjölmiðlum. Minn þáttur verður hinsvegar helgaður konum sem álitsgjöfum - eiginlega til þess að sýna fram á að gamla goðsögnin um að konur veigri sér við umræðunni og vilji ekki koma fram í fjölmiðlum sé röng.

Umræðuefnin verða ekkert endilega tengd konum - enda geta konur talað um allt milli himins og jarðar. Fram á það verður vonandi sýnt í þessum þáttum. Við getum kallað þetta "jákvæða og tímabundna mismunun" til þess að sýna fram á ákveðna hluti.

[Ólína Kjerúlf Þorvarðardóttir, 18.10.2007 kl. 14:53]

Sæl Ásdís - ég sá ekki athugasemdina þína þegar ég svaraði hér fyrir ofan. Víst hefði ég áhuga á málefnum öryrkja. Við skulum vera í sambandi.

[Huld S. Ringsted, 18.10.2007 kl. 15:04]

Til hamingju með nýja þáttinn þinn, gaman verður að sjá þig aftur í sjónvarpinu. Það er alveg öruggt að þennan þátt kem ég til með að horfa á.

[Ásdís Sigurðardóttir, 18.10.2007 kl. 15:45]

Sæl Ólína. Ég er að kanna þetta með kennit. læt þig vita.

[Ásthildur Cesil Þórðardóttir, 18.10.2007 kl. 16:31]

Innilega til hamingju með þáttinn þinn Ólína, ég verð að reyna að horfa á hann, hvar getur maður sér þetta Ínn ?

[Ólína Kjerúlf Þorvarðardóttir, 18.10.2007 kl. 16:47]

Rás-20, ef þú ert með myndlykil að Stöð-2 læturðu hann leita og festir svo rás-20 inni. Þetta á að nást um allt land. Takk fyrir hamingjuóskir

[Svanur Sigurbjörnsson, 18.10.2007 kl. 19:56]

Takk fyrir svarið Ólína.  Vonandi verður þátturinn þinn þá hvatning fyrir konur til að koma fram í sjónvarpi / fjölmiðlum og taka þátt í pólitík.  Ég legg til að þú bjóðir sérstaklega ungum konum sem hafa skoðanir en eru ekki vanar fjölmiðlum (óþekktar).  Það þarf að byggja upp kynslóð sem tekur ríkari þátt.

[Jóna Á. Gísladóttir, 18.10.2007 kl. 23:04]

Takk fyrir mig aftur Ólína og innilega til hamingju með þáttinn. Það verður gaman að fylgjast með þér.

[Helga Guðrún Eiríksdóttir, 19.10.2007 kl. 03:39]

Hjartanlega til hamingju Ólína mín, þetta hljómar vissulega spennandi. Myndirðu nokkuð vera svo sæt að gefa mér vink þegar þú veist hver vefslóðin verður? Það má ekki skilja okkur útlendingana útundan.

[Jón Svavarsson, 19.10.2007 kl. 11:39]

Tilhamingju Ólína. það er þó nokkuð mikilvægt að minna á það að þa er aðeins hægt að horfa á þáttinn í gegnum myndlykil Digital Ísland á dagskrárrás 20. Ef það er hægt að sjá þáttinn í gegnum aðrar leiðir þá væri gaman að fá að vita um það. gangi þér allt í haginn, kær kveðja

[Ólína Kjerúlf Þorvarðardóttir, 19.10.2007 kl. 13:41]

Já, takk fyrir þetta Jón. Svo má taka fram að efnið verður sett á netið um miðja næstu viku, og þar verður hægt að sækja það á visir.is.

Útsendingarnar þessa dagana eru víst tilraunaútsendingar og því verður efnið sem þegar hefur verið sent út endursýnt með skipulegum hætti þegar allt er komið í fullan gang í næstu viku.

Svo krosslegg ég fingur og vona að allt gangi vel

En þátturinn verður sumsé kl 21 í kvöld.

[Gísli Hjálmar , 19.10.2007 kl. 19:55]

Til hamingju með þessa líka frábæru mynd af heimabænum. Og að sjálfsögðu þáttinn einnig.