Góð messa á fallegum degi

 Það rættist úr helginni - svei mér ef það er ekki bara að koma vor.

Hvítasunnudagurinn í gær skein á himni "skír og fagur" eins og segir í sálminum góða. Ég mætti í fermingarmessu á Suðureyri og söng þar eins og herforingi með kirkjukórnum. Það gekk bærilega. Séra Karl V. Matthíasson hljóp í skarðið fyrir sóknarprestinn (sem var sjálfur að ferma sitt eigið barn í annarri sókn) og kom nú í sitt gamla prestakall - þangað sem hann vígðist sjálfur til prests fyrir 20 árum. Vel messaðist séra Karli og fallega fermdi hann börnin fjögur.

Það er ekki öllum prestum gefið að messa þannig að stundin lifi í sál og sinni eftir að henni er lokið. En séra Karl hefur einstaklega persónulega og hlýlega nærveru - og hann heldur nærverunni þótt kominn sé í fullan messuskrúða. Hann gerði þetta vel.

Ég hef ekki komið áður í Suðureyrarkirkju. Þetta er falleg lítil kirkja - og það var gaman að fá að vera með í þessari helgistund á sannkölluðum "drottins degi" - takk fyrir mig.

Athugasemdir

[Edda Agnarsdóttir, 28.5.2007 kl. 15:50]

Ég vildi að ég hefði verið með þér þarna.

[Ingólfur H Þorleifsson, 28.5.2007 kl. 21:17]

Sæl Ólína.

Held bara að þetta hafi tekist bærilega hjá okkur. Séra Karl er alveg stórgóður prestur og spurning hvort hann ætti ekki bara að sinna því áfram frekar en að vera í argaþrasi stjórnmálanna.

[Ólína Kjerúlf Þorvarðardóttir, 28.5.2007 kl. 23:04]

Sæll Ingólfur.

Já, ég held við höfum bara komist skammlaust í gegnum "heilagan" - og þá má segja að eftirleikurinn hafi verið auðveldur.  Víst er séra Karl góður prestur - en hann er líka góður alþingismaður, gleymdu því ekki.  

[Baldur Kristjánsson, 29.5.2007 kl. 00:01]

Gott að heyra þig (einhvern) tala vel um kollega. Séra Karl er frábær bæði í og utan hempu, í og utan Alþingis (þar sem þú ættir að vera).  Gaman væri að sjá þig meðal kirkjugesta í Strandarkirkju einhvern tíma í sumar. Kv.  B.

[Lilja Einarsdóttir (IP-tala skráð) 29.5.2007 kl. 23:25]

Sæl Ólína

 Já þetta tókst svo sannarlega bara vel hjá okkur svo ekki sé nú meira sagt.  Fallegur dagur og flott messa hjá séra Karli.  Gaman að fá nýtt blóð í kirkjuna.  Takk fyrir okkur og vertu velkomin með okkur í haust þegar við förum að æfa fyrir aðventuna.  Þá fyrst verður sko gaman.